Back

የማዳጋስካር ፍርድ ቤት የራጆሊናን አሸናፊነት አረጋገጠ

ጥር 01/ 2011

የማዳጋስካር ፍርድ ቤት የራጆሊናን አሸናፊነት አረጋገጠ

የማዳጋስካር ከፍተኛ ፍርድ ቤት የቀድሞውን መሪ የአንድሪ ራጆሊናን ፕሬዝዳንታዊ  ምርጫ ውጤት አፅድቆ የተቀናቃኙን ክስ ውድቅ አድርጎታል ነው የተባለው::

የማዳጋስካር ከፍተኛ ሕገ-መንግሥታዊ ፍርድ ቤት ሊቀመንበር ጂን ኤሪክ ራኮቷሪሷ እንደገለፁት ባለፈው ወር በአገሪቱ በተካሄደው ምርጫ ራጆሊና 55.66 በመቶ ድምጽ በማግኘት ምርጫውን ያሸነፉ ሲሆን ማርክ ራቫሎማናና ደግሞ 44.34 በመቶ ድምፅ በማግኘት በምርጫው ተሸንፈዋል ብለዋል::

የ44 ዓመቱ ነጋዴ ራጆሊና የ69 ዓመቱን “ወተት አቅራቢ” ራቫሎማናና በ2009 በመፈንቅለ መንግስት አስወግደዋቸው እንደነበር ይታወሳል:: ወተት እና የወተት ውጤቶች ድርጅት ባለቤት የሆኑት ራቫሎማናና በህብረተሰቡ ዘንድ ወተት አቅራቢው በመባል ይታወቃሉ፡፡

ሁለቱም እጩዎች የፍርድ ቤቱን ውሳኔ እንደሚቀበሉ አስታውቀዋል::

ይሁን እንጂ በዲሴምበር 19 የተደረገውን ዳግም ምርጫ ተከትሎ የራቫሎማናና ቡድን ከድምፅ አሰጣጥና ቆጠራ ጋር የተያያዙ ከ200 በላይ ቅሬታዎችን በማቅረብ ፍርድ ቤቱ የምርጫውን ውጤት ውድቅ እንዲያደርገው ጠይቆ ነበር::

የአውሮፓ ሕብረት ታዛቢዎች ምርጫው የተረጋጋ እንደሆነና ምንም ዓይነት ማጭበርበር እንዳልተመለከቱ ነው ያስታወቁት::

ሁለቱም ተወዳዳሪዎች  ውሳኔውን ለመስማት ትናንት ፍርድ ቤት ተገኝተው የነበረ ቢሆንም ከውሳኔው በኋላ ምንም ዓይነት አስተያየት ሳይሰጡ ቀርተዋል::

ማዳጋስካር ከመጨረሻዎቹ ደሃ የአፍሪካ አገራት አንዷ ናት:: የህዝቧ ቁጥር 25 ሚሊዮን ሲሆን ከዚህ ውስጥ 80 በመቶው ዕለታዊ ገቢው ከ2 ዶላር በታች ነው::

በማዕድን እና ቱሪዝም ላይ የታለመ የእድገት ተስፋዎችን ይዟል ነው የተባለው::

ምንጭ፡- africa.cgtn.com