Back

አየርላንድ ለኢትዮጵያ የምታደርገውን ድጋፍ አጠናክራ እንደምትቀጥል ገለፀች

ጥር 01/2011  

አየርላንድ ለኢትዮጵያ የምታደርገውን ድጋፍ አጠናክራ እንደምትቀጥል ገለፀች

ጠቅላይ ሚኒስትር ዐቢይ አሕመድ የአየርላንድ ሪፑብሊክ ጠቅላይ ሚኒስትር ሊዮ ቫራድካርን ዛሬ በጽህፈት ቤታቸው ተቀብለው አነጋግረዋል።

በሁለትዬሽ ውይይቱ ወቅት ጠቅላይ ሚኒስትር ዐቢይ እንደተናገሩት የአየርላንድ ጠቅላይ ሚኒስትር ጉብኝት በኢትዮጵያና አውሮፖ መካከል ያለው የጠነከረ ግንኙነት ማሳያ ነው::

የአየርላንዱ መሪ በበኩላቸው በኢትዮጵያ በተለይ ባለፉት ጥቂት ወራት የተመዘገቡትን ፖለቲካዊና ኢኮኖሚያዊ ለውጦች አድንቀዋል፡፡

አገራቸው ለኢትዮጵያ በተለይም በአግሮ ፕሮሰሲንግ ኢንቨስትመንት ድጋፏን አጠናክራ እንደምትቀጥል ገልፀዋል።

ይህ የጠቅላይ ሚኒስትር ቫራድካር የ3 ቀናት ይፋዊ ጉብኝት በኢትዮጵያና በአየርላንድ መካከል ያለውን ከ20 አመታት በላይ የዘለቀ ግንኙነት ይበልጥ ያጠናክራል ተብሎ ይታመናል።

አየርላንድ የኢትዮጵያን ልማት ከሚደግፉ አገራት መካከል አንዷ ናት፡፡ አገሪቱ በአይሪሽ ኤድ በኩል የ3ዐ ሚሊዮን ዩሮ ድጋፍ እንደምታደርግ ባለፈው ዓመት አስታውቃለች፡፡ ድጋፉ ለገጠር ልማት፣ ለጤና አገልግሎት እና ለተለያዩ ማህበራዊ እንቅስቃሴዎች እንደሚውል ተገልጿል፡፡

ሁለቱ አገራት ዲፕሎማሲያዊ ግንኙነታቸውን ከጀመሩ 25 ዓመታትን አስቆጥረዋል፡፡

በአስማማው አየነው