Back

በኮንጎ በተደረገ ምርጫ የተቃዋሚው መሪ ፌሊክስ ሺሰከዲ አሸነፉ

በዲሞክራክ ሪፐብሊክ ኮንጎ በተደረገ ፕሬዚዳንታዊ ምርጫ የተቃዋሚው ዩዲፒኤስ መሪ ፌሊክስ ሺሰከዲ 7 ሚሊዮን ድምፅ በማግኘት ማሸነፋቸውን የአገሪቱ የምርጫ ኮሚሽን ገለጸ፡፡

በምርጫው ጊዜያዊ ውጤት መሰረት የሌላኛው ተቃዋሚ ተወዳዳሪ የሆኑት ማርቲን ፋዩሉ 6.4 ሚሊዮን ድምጽ ያገኙ ሲሆን፣ ምርጫው ተጭበርብሯል ብለዋል፡፡ ፈረንሳይም የምርጫው ውጤት ላይ ጥያቄ አንስታለች፡፡

ሚስተር ፌሊክስ ሺሰከዲ ከቅኝ ግዛት ነፃ ከሆነች ወዲህ የመጀመሪያው በሰላም ስልጣን የያዙ የተቃዋሚ መሪ ፕሬዚዳንት እንደሚሆኑ ነው ቢቢሲ በዘገባው የገለጸው፡፡

የወቅቱ ፕሬዚዳንት ጆሴፍ ካቢላ አገሪቱን መምራት ከጀመሩ ከ18 ዓመት በኋላ ስልጣን እንደሚለቁ ነው የተዘገበው፡፡

ሚስተር ፌሊክስ ሺሰከዲ ለደጋፊዎቻቸው ባደረጉት ንግግር፣ ፕሬዝዳንት ጆሴፍ ካቢላን ከዚህ በኋላ እንደ ተቀናቃኝ ሳይሆኑ እንደ ዴሞክራሲ ሽግግር አጋር ማየት ይጠበቅብናል ብለዋል፡፡