Back

በአዲስ አበበ የስራ ፍቃዳቸዉን ባላሳደሱ የንግድ ተቋማት ላይ ህጋዊ እርምጃ እየተወሰደ ነው

የካቲት 22፣2011

በአዲስ አበበ የስራ ፍቃዳቸዉን ባላሳደሱ የንግድ ተቋማት ላይ ህጋዊ እርምጃ እየወሰደ መሆኑን የከተማ አስተዳደሩ የንግድና ኢንዱስትሪ ቢሮ አስታወቀ፡፡

በአዲስ አበበ ከተማ ዉስጥ በ2011 የንግድ ፍቃዳቸዉን ማደስ የሚጠበቅባቸው 251 ሺ 6 መቶ የንግድ ተቋማት ቢኖሩም፣ፍቃዳቸዉን እስከ ታህሳስ 30፣2011 ዓ.ም ድረስ ማደስ የቻሉት ግን ከ218ሺ አይበልጡም፡፡

በከተማ አስተዳድሩ የንግድና ኢንዱስትሪ ልማት ቢሮ የንግድ ምዝገባ እና ፍቃድ ዳይሬክተር አቶ ብርሃኑ ተገኝ በተለይ ለኢቢሲ እንደገለፁት እስካሁን የንግድ ፍቃዳቸዉን ማደስ ከሚገባቸው ተቋማት መካካል 33ሺ ያህሉ በተቀመጠው የጊዜ ገደብ አላሳደሱም፡፡

የንግድ ፍቃዳቸዉን ባላዳሱ ተቋማት ላይ አንዲያሳድሱና ህጋዊ ስርዓት እንዲይዙ አስተዳዳራዊ እርምጃ መውሰድ መጀመሩን አቶ ብርሃኑ ተናግረዋል፡፡
ይህም ማንኛዉም ነጋዴ ህግና ስርዓትን መሰረት በማድረግ ስራዉን እንዲሰራ ለማስቻል ያለመ መሆኑንም ጠቁመዋል፡፡

በበጀት ዓመቱ እስካሁን የንግድ ፍቃዳቸዉን ባላደሱ ተቋማት ላይ ከጥር 1፣2011 ዓ.ም ጀምሮ በቅጣት ፍቃዳቸዉን ማደስ የሚችሉበት ስርዓት መኖሩንም ኃላፊው ገልፀዋል፡፡

ቅጣቱ እስከ ሰኔ 30 ድረስ በየወሩ የ1500 ብር ተጨማሪ ቅጣት እንደሚያስከትልም ከከተማ አስተዳደሩ የተገኘው መረጃ ያመለክታል፡፡

የንግድ ፍቃድ በጊዜ ባለማሳደስ የንግድ ቦታቸው የታሸገባቸው ተቋማት ፍቃዳቸዉን እንዳሳዳሱ አስተዳደራዊ እርምጃው እንደሚነሳላቸውም ቢሮው አስተውቋል፡፡

በላሉ ኢታላ