Back

የምዕራብ ኦሮሚያና የቤኒሻንጉል ጉሙዝ ክልል አዋሳኝ አካባቢዎች ማረጋጋት ተችሏል-ኮማንድ ፖስት

ታህሳስ 28፡ 2011 ዓ.ም

በምዕራብ ኢትዮጵያ የጥፋት ኃይሎች በስፋት ሲንቀሳቀሱበት የነበረውን የምዕራብ ኦሮሚያና የቤኒሻንጉል ጉሙዝ ክልል አዋሳኝ አካባቢዎች የምዕራብ ኢትዮጵያ ኮማንድ ፖስት በወሰደው እርምጃ ማረጋጋት እንደተቻለ የኢፌዴሪ መከላከያ ምክትል ኢታማጆር ሹም ጀኔራል ብርሃኑ ጁላ ተናገሩ፡፡

የምዕራብ ኢትዮጵያ ኮማንድ ፖስት ዛሬ በአሶሳ ከተማ ባካሄደዉ ግምገማ የቤኒሻንጉል ጉሙዝ ክልል አዋሳኝ አካባቢዎችን ጨምሮ በምዕራብ ኦሮሚያ ግጭት የነበረባቸውን አካባቢዎች ሰላምና መረጋጋት እንዲፈጠር ስራዎች መስራቱን አስታዉቋል፡፡

ህብረተሰቡ ከነበረበት የሥጋት ስሜት ወጥቶ በአካባቢው ሠላማዊ በሆነ መንገድ እየተንቀሳቀሰ መሆኑን የገለጸው ኮማንድ ፖስቱ ቀጣይነቱን ለማረጋገጥ የህዝብ ለህዝብ ግንኙነቱን ማጠናከር ይገባል ብሏል፤፡

የኢፌዴሪ መከላከያ ም/ ኢታማጆር ሹም ጀኔራል ብርሃኑ ጁላ በግምገማዉ ወቅት እንዳሉት አሁን የታየው ለውጥ የመጣው ህብረተሰቡ ባካሄደዉ ተሳትፎ መሆኑን ተናግረዋል፡፡

ሠላማዊ እንቅስቃሴዉን በዘላቂነት ለማስቀጠል የክልሎቹ መንግስታትና የጸጥታ መዋቅሮች የተጠናከረ የጋራ ስራ መስራት እንዳለባቸዉ ገልፀዋል፡፡

የመንግስት መዋቅርን ተገን አድርገው በህብረተሰቡ ላይ ስጋት ለመፍጠር የሚንቀሳቀሱ አካላት አሁንም እንዳሉ የገለፁት ጄኔራሉ በህግ ይጠየቃሉ ብለዋል፡፡

በግጭቱ ምክንያት ከቀያቸው የተፈናቀሉ ዜጎችን እስከ መጋቢት 20 2011 ዓ.ም ድረስ ወደ አካባቢያቸው ለመመለስና ለማቋቋም ከኮማንድ ፖስቱ ጋር የሚሰራ ኮሚቴ መዋቀሩን የተናገሩት ደግሞ የቤኒሻንጉል ጉሙዝ ክልል ርዕሰ መስተዳድር አቶ አሻድሊ ሃሰን ናቸዉ፡፡

የኦሮሞ ዴሞክራሲያዊ ፓርቲ ማዕከላዊ ኮሚቴ ጽ/ቤት ኃላፊ ዶ/ር ዓለሙ ስሜ በበኩላቸው በኮማንድ ፖስቱ የተከናወነዉን ሰላም የማስከበር ስራ አድንቀዉ ምዕራብ ኢትዮጵያን ለማመስ መልሶ የሚያንሰራራ ጸረ-ሠላም ኃይል እንዳይኖር የፖለቲካ ስራዎች እስከ ታችኛዉ መዋቅር መስራት አለበት ብለዋል፡፡

ለዚህም ኦዴፓ ቁርጠኛ መሆኑን ዶ/ር ዓለሙ ገልጸዋል፡፡

ሪፖርተር ያለለት ወንድዬ (ከአሶሳ)