Back

ለሰብአዊ መብት ዋና ኮሚሽነርነት የተመዘገቡ ዕጩዎች ተጣርተው በቀጣዩ ሳምንት ለምክር ቤቱ ይቀርባሉ

መጋቢት 25፣2011

ለሰብአዊ መብት ዋና ኮሚሽነርነት የተመዘገቡ ዕጩዎችን አጣርቶ በቀጣዩ ሳምንት ለህዝብ ተወካዮች ምክር ቤት እንደሚያቀርብ እጩ አቅራቢ ኮሚቴው አስታወቀ፡፡

የኢትዮጰያ ሰብዓዊ መብት ኮሚሽንን በዋና ኮሚሽነርነት ይመራሉ ያላቸውን ዕጩዎች  ህዝብ እንዲጠቁም በቀረበው ጥሪ መሰረት ከውጭና ከአገር ውስጥ ሁሉም አካባቢዎች ጭምር የተወከሉ ግለሰቦች ቀርበዋል፡፡

በህዝብ ተወካዮች ምክር ቤት የቋቋመው የሰብዓዊ መብት ኮሚሽን እጩ አቅራቢ ኮሚቴ ፀሐፊ ዶ/ር ተመስገን ባይሳ ለኢቲቪ እንደገለፁት በተለያዩ የመገናኛ ዘዴዎች በቀረበው ጥሪ መሰረት ለ20 ቀናት ያህል  ሲካሄድ የነበረው ዕጩ ጥቆማ መጋቢት 20፣2011 ተጠናቋል፡፡  

ህብረተሰቡም በየአካባቢዎቹ ከሚሽኑን ይመራሉ የሚላቸውን 89 ዕጩዎችን በኢሜል፣በፋክስ፣ በስልክና በተለያዩ ዘዴዎች ማቅረቡ ተመልክቷል፡፡

ለኮሚሽነርነት ከተጠቆሙት ግለሰቦች መካከል መስፈርቱን የሚያሟሉትን ዕጩዎች መጋቢት 30 ደረስ የመለየት ተግባሩን እንደሚያከናውንም ኮሚቴው አስታውቋል፡፡

የዕጩ አቅራቢው ኮሚቴ ፀሐፊ ዶ/ር ተመስገን ባይሳ ኮሚቴው የማጣራቱን ስራ ሙሉ ለሙሉ አጠናቆ  የውሳኔ ሀሳቡን በቀጣዩ ሳምንት ሚያዚያ 5፣2011 ለህዝብ ተወካዮች ምክር ቤት እንደሚያቀርብ ተናግረዋል፡፡

የኢትዮጵያ ሰብዓዊ መብት ኮሚሽን ዲሞክራሲን ለማጠናከር ከተቋቋሙት ተቋማት ውስጥ አንዱ ነው፡፡አሁን ከቀረቡት ዕጩዎች ውስጥ ተቋሙን በብቃት ይመራል ተብሎ የሚታሰብ ዕጩ ኮሚሽነርን በመለየት  የህዝብ ተወካዮች ምክር ቤት አማካኝነት ይሾማል ተብሎ ይጠበቃል፡፡

በመስፍን ገ/ማርያም