Back

በከባድ የሙስናና ሽብር ወንጀል የተጠረጠሩ ሰዎች በቁጥጥር ስር ዋሉ

ሚያዚያ 04፣ 2011

የፌደራል ጠቅላይ ዐቃቤ ሕግ አቶ ብርሃኑ ፀጋዬ ሰሞኑን በከባድ የሙስና ወንጀል ተጠርጥረው በቁጥጥር ስር በዋሉ ባስልጣናትና ተያያዥ ጉዳዮች ላይ ዛሬ ለመገናኝ ብዙኃን መግለጫ ሰጥተዋል፡፡

አቶ ብርሃኑ በመግለጫቸው በከባድ ሙስና ወንጀል የተጠረጠሩ ባለስልጣናት በቁጥጥር ስር እየዋሉ መሆናቸውንና ተጨማሪ ምረመራ እየተደረገ መሆኑን አስታውቀዋል፡፡

ከተፈፀሙ የሙስና ወንጆሎች ጋር በተያያዘ በቁጥጥር ስር የዋሉት የመንግስት ተቋማት የስራ ኃላፊዎች እና ባለሀብቶችን ጨምሮ 59 ሰዎች ናቸው፡፡  

ከነዚህ መካከል የውሃ ስራዎች ኮንስትራክሽን ኮርፖሬሽንና የመድሃኒት ፈንድ ኤጀንሲን ጨምሮ የአራት ተቋማት ኃላፊዎች ባለሙያዎች እንዲሁም ባለሀብቶች እንደሚገኙበት በመግለጫው ተጠቅሷል፡፡

ተጠርጣሪዎቹ ስልጣናቸውን በመጠቀም ከአገሪቱ የግዢ ስርዓት ውጭ ከፍተኛ ግምት ያለው የሀብት ምዝበራ ማካሄዳቸውንም ነው አቶ ብሃኑ የጠቆሙት፡፡

ከተያዙት ሰዎች መካከል ከገቢያቸው በላይ ሀብት ያፈሩ እንዲሁም በብርበራ የተለያዩ የቤት ካርታዎች በመኖሪያ ቤታቸው የተገኙባቸውም አሉ ብለዋል፡፡

ከተለያዩ የውጭ አካላት ጋር ተቀናጅተው የሽብር ጥቃት ለመፈፀም ሲዘጋጁ የነበሩ ግለሰቦችም በቁጥጥር ስር መዋላቸውን ጠቅላይ ዐቃቤ ሕጉ አስታውቀዋል፡፡

በሌላ በኩል የተጀመረውን አገራዊ ለውጥ ለማስቀጠልና የዜጎችን ሁለንናዊ ተጠቃሚነት ለማረጋገጥ መንግስት በርካታ ህጎችን የማዘመንና የመከለስ ስራ እየሰራ መሆኑንም የፌደራል ጠቅላይ ዐቃቤ ሕግ አቶ ብርሃኑ ፀጋዬ ተናግረዋል፡፡

በላሉ ኢታላ