Back

ፕሬዝደንት ሣህለ ወርቅ ዘውዴ ኢቫንካ ትራምፕን አነጋገሩ

ፕሬዝደንት ሣህለ ወርቅ ዘውዴ በኢትዮጵያ የሁለት ቀናት ጉብኝት ለማድረግ አዲስ አበባ የምትገኘውን የዋይት ሃውስ አማካሪ ኢቫንካ ትራምፕን ተቀብለው አነጋገሩ፡፡

ውይይታቸውም የሴቶችን እኩልነትና ተጠቃሚነት ለማረጋገጥ የሚደረጉ ስራዎች ላይ ትኩረት ያደረገ ነው፡፡

 

ኢቫንካ ትራምፕ ፕሬዝደንት ዶናልድ ትራምፕ በዓለም ላይ እስከ 2025 ድረስ 50 ሚሊዮን ሴቶችን ተጠቃሚ የሚያደርግ ኢኒሽየቲቭ ይፋ ማድረጋቸውን አስታውሳለች ፡፡

 

ይህ ባለፈው የካቲት ወር ይፋ የተደረገው ፕሮግራም በሶስት መሰረታዊ ጉዳዮች ላይ እንደሚያተኩር የገለጸችው ኢቫንካ ትራምፕ የሴቶችን አቅም ማጎልበት፤ የሴቶችን የሥራ ፈጣሪነት እድል ማስፋትና ለሴቶች አጋዥ የሆኑ ህጎችና ደንቦችን ማጠናከር የሚሉ የፕሮግራሙ ማጠንጠኛዎች እንደሆኑ ነው በማብራራሪዋ ያመለከተችው፡፡

 

ከዚህም አንጻር በኢትዮጵያ የሴቶችን ተሳትፎና ተጠቃሚነት ለማጎልበት የሚከናወኑ ተግባራት የሚደነቁ መሆኑን የጠቀሰችው ኢቫንካ ትራምፕ ይህን ሂደትም አሜሪካ በተለያየ መንገድ እንደምትደግፈው ተናግራለች፡፡

በአጠቃላይ ኢትዮጵያ በሁሉም መስክ የተያያዘችውን የለውጥ ሂደትም አስደናቂ እንደሆነ ገልጻለች፡፡

 

በፕሬዝደንት ትራምፕ የተቀረጸውና በአለም ላይ ያሉ ሴቶችን ለመደገፍ ያለመው ኢንሽየቲቭ ጥሩ እርምጃ መሆኑን የገለጹት ፕሬዝደንት ሣህለ ወርቅ ዘውዴ ፕሮግራሙ ሴቶችን ማዕከል እስካደረገና ከፍ ወዳለ ደረጃ የሚያሸጋግር እስከሆነ ድረስ ተቀባይነት አለው ብለዋል፡፡

 

ኢትዮጵያ የሴቶችን አቅም ለማጎልበት በአዲስና በተለየ የለውጥ አቅጣጫ እየተንቀሳቀሰች መሆኑን አንስተው በተለይም ሴቶች ወደ ከፍተኛ ትምህርት ተቋማት ከገቡ በኋላ የሚያጋጥሟቸውን ችግሮች በመፍታት ትምህርታቸውን በስኬት ጨርሰው እንዲወጡ ለማድረግ በሚቻልባቸው መንገዶች ላይ ትኩረት መደረጉን ነው ያብራሩት፡፡

 

በሴቶች ዙሪያ ከሚሰሩ መንግስታዊ ያልሆኑ ድርጅቶችንም ጋር በመቀናጀት የተሻለ ስራ መፈጸም የሚቻልባቸው ጉዳዮችም ላይ በስፋት እንደሚሰራበት ጠቅሰዋል፡፡

 

ምንጭ፡ የፕሬዝዳንት ፅ/ቤት