Back

የኢትዮጵያ ቡና ባለፉት 8 ወራት ከአለም ገበያ ያስገባው ገቢ ዝቅተኛ መሆኑ ተገለፀ

ሚያዚያ 14፣2011

የኢትዮጵያ ቡና የበጀት ዓመቱ 8 ወራት የወጪ ንግድ  አፈፃፀም ካለፈው ዓመት ጋር ሲነፃፀር ቅናሽ ማሳየቱን የኢትዮጵያ ቡናና ሻይ ባለስልጣን አስታወቀ።

ባለስልጣኑ እንዳመለከተው እስካለፈው የካቲት መጨረሻ ድረስ ከ130ሺህ በላይ ቶን ቡና ለውጭ ገበያ ቀርቦ የተገኘው 422 ሚሊየን የአሜሪካን ዶላር ነው።

ለአፈፃፀሙ መውረድ  የቡና ዋጋ በዓለም ገበያ ቅናሽ ማሳየቱ በቀዳሚነት አስተዋፅኦ ማድረጉን በቡናና ሻይ ባለስልጣን የገበያ ልማት እና ፕሮሞሽን ዳይሬክተሩ አቶ ባሻ ዳኔሶ ለኢቲቪ ተናግረዋል።

ያለፈው ዓመት የቡና ዋጋ በዓለም ገበያ ከነበረበት ዋጋ አንፃር ባለፈው መጋቢት  በ15 ከመቶ መቀነሱን ዳይሬክተሩ በማሳያነት ገልፀዋል፡፡

በሌላ በኩል ያልተገባ ውድድርን ለመፍጠር የቡናውን ዋጋ ከገበያ በታች የሚሸጡ ቡና ላኪዎች የፈጠሩት ችግር ለአፈፃፀሙ መቀነስ ሌላኛው ምክንያት መሆኑን አቶ ባሻ አስረድተዋል።

በአንፃሩ አንዳንድ ቡና ላኪዎች ግን በዳይሬክተሩ ሃሳብ አይስማሙም፡፡ የኢትዮጵያ ቡና በዓለም ገበያ ድርሻው ዝቅ ያለበትን ምክንያት ሲያስረዱ የሚመረተው ቡና አነስተኛና ከትናንሽ የገበሬ ማሳ ላይ በመሆኑና ጥራቱ ዝቅተኛ ስለሆነ ነው ይላሉ፤ ይህም በዓለም ገበያ ተወዳዳሪ እንዳንሆን አድጎናል ባይ ናቸው።

ባለስልጣኑ በበኩሉ የኢትዮጵያ የቡና  ገበያ ድርሻን ለማሳደግ ከተፈለገ የቡና ምርቱን ጥራትና ብዛት ላይ ትኩረት አድርጎ እየሰራ መሆኑን አመልክቷል፡፡

በአሁኑ ጊዜ የኢትዮጵያ የቡና በአለም ገበያ ያለው ድርሻ 3 በመቶ መሆኑን መረጃዎች ያሳያሉ፡፡

በማትያስ የማነ