Back

በኦሮሚያና ሶማሌ የህዝብ ለህዝብ መድረክ የሚካፈሉ የሶማሌ ክልል ተወካዮች በተለያዩ አካባቢዎች አቀባበል እየተደረገላቸው ነው

ሚያዝያ 22፣2011
የኦሮሚያና የሱማሌ ህዝቦች ወንድማማችነት የምክክር መድረክ ከአሁን ቀደም ያጋጠሙ ችግሮች የሚፈቱበት ነው ተባለ።

በመድረኩ የሚሳተፉ የሱማሌ ክልል ልዑካን ቦሌ አለም አቀፍ አየር ማረፊያ ሲደርሱ በኦሮሚያ ክልል ከፍተኛ ባለስልጣናት ደማቅ አቀባበል ተደርጎላቸዋል።

መድረኩን ስንጠብቀው ነበር ያሉት የልዑካኑ መሪ እና የክልሉ ጎሣ መሪዎች ሰብሳቢ ገራድ ኩልሚ ገራድ መሃመድ ገራዶል፣ ያለውን ችግር ለመፍታትና ወንድማማችነትን ለማጠናከር መጥተናል ብለዋል።

በልዑኩ የሃገር ሽማግሌዎችን እና ኡጋሶችን ጨምሮ የኦብነግ ከፍተኛ አመራሮች መካተታቸው ተገልጿል።

አንድ ሆነን ሳለ ህዝብ ሳይሆን ከአሁን በፊት የነበረው የሱማሌ ክልል መንግስት በፈፀመው ጥፋት ብዙዎች ተፈናቅለዋል ያሉት ገራድ ኩልሚ፣ተፈናቃዮችን ወደ ቀያቸው የመመለስና የማቋቋም ስራ በክልሉ እየተሰራ መሆንኑ እና በመድረኩ ስለ ወቅታዊ ሃገራዊ ችግሮች ውይይት እንደሚደረግም ተናግረዋል።

ልዑካኑን በእንኳን ደህና መጣችሁ መልዕክት የተቀበሉት የኦሮሚያ ክልል ምክር ቤት አፈ ጉባዔ ወ/ሮ ሎሚ በዶ በበኩላቸው የሁለቱ ክልል ህዝቦች ከባህልና ቋንቋም በላይ በደምና በስጋ የተሳሰሩ ናቸው ብለዋል።

አፈጉባዔዋ ህዝብ መሰረታዊ ቅራኔ ሳይኖረው ጥቅማቸው የተነካባቸው ወገኖች በሰሩት ጥፋት በሚሊዮኖች ተፈናቅለዋል ያሉ ሲሆን፣ ወይይቱ ችግሮች የሚፈቱበትና ተምሳሌት ሊሆን የሚችል ተግባር የሚፈፀምበት እንደሆነ ገልፀዋል።

መድረኩ ወደሚዘጋጅበት አዳማ ከተማ በመጓዝ ላይ ለሚገኙት የሶማሌ ክልል የአገር ሽማግሌዎችና ተሳታፊዎች በባቢሌ፣ በሐረር፣ አወዳይ፣ ሻሸመኔ፣ ባሌ እና በመሳሰሉ ከተሞችም በየአካባቢው ማህበረሰብ የሞቀ አቀባበል እያደረገላቸው መሆኑን ተመልክቷል፡፡

ነገ በአዳማ በሚጀመረው የምክክር መድረክ ከሱማሌ ክልል 11 ዞኖች የተውጣጡ 5 መቶ የህዝብ ተወካዮች እንደሚሳተፉ ተገልጧል።

በአልዓዛር ተረፈ