Back

ምክር ቤቱ የቀድሞ ፕ/ት ዶ/ር ነጋሶ ጊዳዳ ህልፈትን ተከትሎ የፊታችን ሰኞ የአንድ ቀን ብሄራዊ የሃዘን ቀን ሆኖ እንዲውል አወጀ

ሚያዝያ 26፣2011
የኢፌዴሪ የቀድሞ ፕሬዝዳንት ዶ/ር ነጋሶ ጊዳዳ ህልፈትን ተከትሎ የህዝብ ተወካዮች ምክር ቤት የአንድ ቀን ብሄራዊ የሃዘን ቀን አውጇል።

የምክር ቤቱ የህዝብ ግንኑነት ኃላፊ አቶ ያዕቆብ ወልደሰማያት ለኢቲቪ እንደተናገሩት ዕለቱ የፓርላማው የስራ ቀን ባለመሆኑ የሰንደቅ ዓላማ ዓዋጁ በሚፈቅደው መሰረት አፈ ጉባኤ ታገሰ ጫፎ ብሄራዊ የአንድ ቀን ሀዘኑን አውጀዋል፡፡

በዚህም መሰረት ሰኞ ሚያዚያ 28 ቀን 2011 በመላ አገሪቱ ብሄራዊ የሀዘን ቀን ሆኖ የሚውልና ሰንደቅ ዓላማ ዝቅ ብሎ የሚውለበለብ ይሆናል፡፡

ምክር ቤቱ ትናንት ባካሄደው 5ኛ ልዩ ስብሰባው በቀድሞ ፕሬዚዳንት ዶ/ር ነጋሶ ጊዳዳ ህልፈትን ምክንያት በማድረግ የአንድ ቀን የብሔራዊ የሃዘን ቀን እንዲታወጅ የቀረበለትን የውሳኔ ሃሳብ ማፅደቁ ይታወቃል።

የዶክተር ነጋሶ ጊዳዳ አስክሬን ከነበረበት ጀርመን ዛሬ አዲስ አበባ ሲገባም መንግስታዊ አቀባበል ተደርጎለታል።

በነገው እለትም በሚሌኒየም አዳራሽ አስክሬናቸው የሽኝት ስነ ስርዓት የሚከናወንለት ሲሆን፥ ከሰዓት በኋላም የቀብር ስነ ስርዓታቸው የሚከናወን ይሆናል።