Back

የሥነ ምግባርና የጸረ ሙስና ኮሚሽን መክሰስም ሆነ መመርመርም አልቻለም- የህዝብ ተወካዮች ምክር ቤት አባላት

ሚያዝያ 30፣2011

የሥነ ምግባርና የጸረ ሙስና ኮሚሽን መክሰስም ሆነ መመርመር አለመቻሉ የበለጠ ደካማ እንዳደረገው የህዝብ ተወካዮች ምክር ቤት አባላት ተናገሩ።

ኮሚሽኑ በአሁኑ ጊዜ በማስተማር ስራ ላይ ተወስኖ  እንዳይከስ እና እንዳይመረምር መደረጉ ስራውን በአግባቡ እንዳይወጣ አድርጎታልም ብለዋል።

የአገሪቱ ትላልቅ የመንግስት ፕሮጀክቶች እየተመዘበሩ በመሆኑ ኮሚሽኑ የተሰጠውን ስልጣንና ኃላፊነት ዳግም ተጥንቶ እንዲመለስለት ጠይቀዋል።

አባላቱ ጠንከር ያለ ትችታቸውን ያቀረቡት በምክር ቤቱ የህግ፣ ፍትህና ዴሞክራሲ ጉዳዮች ቋሚ ኮሚቴ የፌዴራል ስነ ምግባርና ፀረ ሙስና ኮሚሽንን የ9 ወራት አፈፃፀም በገመገመበት ወቅት ነው፡፡

የሥነ ምግባርና የጸረ ሙስና ኮሚሽን ኮሚሽነር አቶ አየልኝ ሙሉዕለም በበኩላቸው ለኢቲቪ እንዳሉት ከዚህ ቀደም የነበሩት የኮሚሽኑ የመመርመርና የመክሰስ ስልጣን ለፌደራል ፖሊስና ለጠቅላይ ዓቃቤ ህግ በመሰጠቱ አሁን ላይ አቅም አሳጥቶታል ብለዋል፡፡

በተለይም ኮሚሽኑ በግለሰቦችም ዘንድ ሆነ በተቋማት ዘንድ የማስፈፀም አቅም ዝቅ ተደርጎ መታየቱ የፀረ ሙስና ትግሉን አዳጋች እንዳደረገበት ተናግረዋል፡፡

በመሆኑም ኮሚሽኑ የተቋቋመበትን የህግ ማዕቀፍ ለማሻሻል ጅምር ስራዎች እየተከናወኑ መሆኑን አቶ አየልኝ ተናግረዋል፡፡

በዳዊት በጋሻው