Back

የዘንድሮው የክረምት በጎ ፈቃድ ሥራ የትምህርት ቤቶችንና የጤና ተቋማትን እድሳት ያካተተ መሆኑ ተገለጸ

ሐምሌ 2 ቀን 2011 ዓ.ም

በጠቅላይ ሚኒስትር ዶ/ር ዐቢይ አህመድ የተጀመሩ የክረምት በጎ ፈቃድ ሥራዎች የትምህርት ቤቶችንና የጤና ተቋማትን እድሳት ያካተተ መሆኑ ተገልጿል፡፡

የጤና ተቋማትን የማደሱና አካባቢን አረንጓዴ የማድረጉ ሥራ የአዲስ አበባ ምክትል ከንቲባ ኢንጂነር ታከለ ኡማ እና የጤና ሚኒስትሩ ዶ/ር አሚር አማንን ጨምሮ ከፍተኛ የመንግሥት የሥራ ኃላፊዎች በተገኙበት ዛሬ በይፋ ተጀምሯል፡፡

በዚሁ መሰረት የጥቁር አንበሳ ስፔሻላይዝድ ሆስፒታል እና የጥቁር አንበሳ 2ኛ ደረጃ ትምህርት ቤት እድሳት በዛሬው ዕለት ተጀምሯል፡፡

የአዲስ አበባ ምክትል ከንቲባ ኢንጂነር ታከለ ኡማ ከተማይቱ ብዙዎችን ባሳተፈ የፅዳት ስራ ላይ መሆኗን ገልጸዋል፡፡

በአዲስ አበባ ከተማ 488 እንዲሁም በአገር አቀፍ ደረጃ 9 ሺህ የመንግሥት ትምህርት ቤቶች የሚገኙ ሲሆን ት/ቤቶቹን ለተማሪዎች ብሎም ለመማር ማስተማሩ ሂደት ምቹ ለማድረግ እንደሚሰራም ተናግረዋል፡፡

የጤና ሚኒስትሩ ዶ/ር አሚር አማን በበኩላቸው በአዲስ አበባ ለሚገኙ 12 የመንግሥት ሆስፒታሎች የሚደረገው እድሳት አገልግሎት አሰጣጡን ለማሻሻል እንደሚያግዝ ገልጸዋል፡፡

ሪፖርተር፡- አዲስ ዓለም ተሾመ