Back

የሀረሪ ብሄራዊ ሊግ የማዕከላዊ ኮሚቴ ግምገማ ውሳኔዎችን በማሳለፍ ተጠናቀቀ

ሐምሌ 2 ቀን 2011 ዓ.ም

የድርጅቱ ማዕከላዊ ኮሚቴ ለሶስት ተከታታይ ቀናት ባካሄደው ግምገማ የድርጅቱን ስራ አስፈፃሚ ኮሚቴ ስራዎች ገምግሟል።

ድርጅቱ ውጤታማ ስራዎችን እንዲሁም የታዩ ድክመቶችን በጥልቀት በመገምገም የቀጣይ የትኩረት አቅጣጫዎችን ማስቀመጡ ተገልጿል።

መድረኩ በአጠቃላይ ሀገራዊ ጉዳዮችና ክልላዊ ነባራዊ ሁኔታዎች ዙሪያ በዝርዝር ተወያይቶ የተጀመረውን ሀገራዊና ክልላዊ ለውጥ ለማስቀጠል የሚያስችሉ ውሳኔዎችንም አሳልፏል።

የክልሉን የፀጥታ ሁኔታ በተሻለ ደረጃ የማስቀጠል እንዲሁም የህግ የበላይነትን የማስከበር   ስራዎች ትኩረት ተሰጥቷቸው እንዲሰሩ ወስኗል።

በተጨማሪም በክልሉ የከተማና የገጠሩን ህብረተሰብ የመልካም አስተዳደር ችግሮች ለመፍታት አመራሩ በቁርጠኝነት እንዲሰራ አቅጣጫ ተቀምጧል።

በግምገማው ማጠቃለያም ለቀጣይ ስራዎች ድርጅቱን ለማጠናከር በስራ አስፈፃሚ ኮሚቴ ደረጃ የአመራር ሽግሽግ መደረጉን የሀብሊ ማዕከላዊ ጽህፈት ቤት ለኢቲቪ የላከው መግለጫ ያስረዳል።