Back

ማርሴይ የአየር መንገዱ 121ኛ መዳረሻ ሆናለች

ሰኔ 26 ቀን 2011 ዓ.ም.

የፈረንሳይ ሁለተኛ ትልቅ ከተማ የሆነችው ማርሴይ የኢትዮጵያ አየር መንገድ 121ኛ መዳረሻ ሆናለች።

ትናንት ከሌሊቱ 5 ሰዓት ከ45 ደቂቃ የአየር መንገዱ ዋና ስራ አስፈጻሚ አቶ ተወልደ ገብረማርያም በኢትዮጵያ የፈረንሳይ አምባሳደር ፍሬድሪክ ቦንቴምስና ሌሎች ተሳፋሪዎችን ይዞ የተነሳው የኤር ባስ 780 አውሮፕላን ዛሬ ጠዋት 2 ሰዓት ከ35 ደቂቃ ማርሴይ ከተማ ደርሷል።

የኢትዮጵያ አየር መንገድ ወደ ማርሴይ በረራ መጀመሩን አስመልክቶ የተዘጋጀ ስነ ስርአት ትናንት ማምሻውን በከተማይቱ ተካሄዷል።

የአየር መንገዱ ዋና ስራ አስፈጻሚ አቶ ተወልደ ገብረማርያም የበረራው መጀመር በአፍሪካና በአውሮፓ ከተሞች መካከል ያለውን የአየር ግንኙነት እንደሚያሰፋው ተናግረዋል።

አየር መንገዱ ከፓሪስ በመቀጠል ሁለተኛ የፈረንሳይ መዳረሻውን ወደ ማርሴይ ማድረጉ አዲስ አበባና ማርሴይን ከማገናኘቱ ባለፈ ማርሴይን ከተቀሩት 60 በላይ የአየር መንገዱ የአፍሪካ መዳረሻዎች ጋር እንደሚያገናኝም አመልክተዋል።

በተጨማሪም የበረራው መጀመር የፈረንሳይኛ ቋንቋ ተናጋሪ የሆኑ የአፍሪካ አገራትን ከፈረንሳይ ጋር ለማገናኘትም የራሱን አስተዋጽኦ እንደሚያበረክትም ገልጸዋል።

የፈረንሳይ መንግስት በየትኛውም ጊዜ አየር መንገዱ ለማስፋፋያ ሊጠቀምበት የሚችል የ120 ሚሊዮን ዩሮ ብድር ማዘጋጀቱንም ጠቅሰዋል።

በኢትዮጵያ የፈረንሳይ አምባሳደር ፍሬድሪክ ቦንቴምስ በበኩላቸው በረራው የአገራቱን የንግድ ትስስር እንዲሁም በአቪዬሽን ዘርፍ ያላቸው ግንኙነት ለማሳደግ እንደሚያግዝ ገልጸዋል።

ፈረንሳይ ለኢትዮጵያ አቪዬሽን አካዳሚና ለካርጎ ተርሚናል ማስፋፊያ የፋይናንስ ድጋፍ ማድረግዋን አስታውሰው በቀጣይም ለአየር መንገዱ የተለያዩ ድጋፎችን ለማድረግ ዝግጁ መሆኗን አረጋግጠዋል።

የኢትዮጵያ አየር መንገድ በሳምንት ሶስት ጊዜ ወደ ማርሴይ በረራ የሚያደርግ ሲሆን ከተማዋ በአውሮፓ የአየር መንገዱ 21ኛ መዳረሻው ሆናለች።

ምንጭ፡- ኢዜአ