Back

ጊዜያዊ የዑለማዎች ኮሚቴ 1440ኛውን የረመደን ፆም አስመልክቶ የመጀመሪያውን መግለጫ ሰጠ

ሚያዝያ 26፣2011

የረመዳን ፆም ሙስሊሙ ህብረተሰብ በጎ ምግባራትን በማከናወን ወደ ፈጣሪው በተሻለ የሚቀራረብበት ወቅት እንዲሆን አዲሱ የዑለማዎች ኮሚቴ አሳሰበ፡፡

ከቀድሞው የኢትዮጵያ እስልምና ጉዳዮች ምክር ቤት ኃላፊነቱን የተቀበለው ጊዜያዊ የዑለማዎች ኮሚቴ 1440ኛውን የረመዳን ፆምን በማስመልከት መግለጫ ሰጥቷል።

የኮሚቴው ሰብሳቢ ተቀዳሚ ሙፍቲ ሃጂ ዑመር እንድሪስ እንደተናገሩት የረመዳን ፆም ሙስሊሙ ህብረተሰብ በጎ ምግባራትን በማከናወን ከፈጣሪ ዋጋ የሚያገኝበት ሊሆን ይገባል ብለዋል፡፡

የዘንድሮው የረመዳን ወር ህዝበ ሙስሊሙ ከልዩነት ወጥቶ አንድነት የመሰረተበት ወቅት በመሆኑ ለየት እንደሚያደርገውም ተናግረዋል።

በቀጣይም ህዝበ ሙስሊሙ አንድነቱን በማጠናከር ለራስ፤ ብሎም ለአገር ዘብ እንዲቆም ጥሪያቸውን አቅርበዋል።

ተቀዳሚ ሙፍቲ ሃጂ ኡመር እንድሪስ ባስተላለፉት መልእክት የረመዳን ፆም የመተሳሰብ ፣የመከባበር እና የመፈቃቀር ወር ነው ብለዋል።

እናም ምዕመኑ በፆም ወቅት የተቸገሩ ወገኑቹን የሚረዳበትና እና ሁልጊዜም የሚስብበት ሊሆን ይገባል ብለዋል።

በተለያዩ አካባቢዎች የሚደርሰውን መፈናቀል በየደረጃው ያለ የመንግስት መዋቅር መፍትሄ ሊያበጅ እንደሚገባም ጠቁመዋል።

አዲስ የተደራጀው የዑላማዎች ኮሚቴም የተጣለበትን ኃላፊነት ለመወጣት ጥረት ያደርጋልም ብለዋል።

ተቀዳሚ ሙፍቲ ሐጂ ዑመር እንድሪስ ለመላው የእስልምና ሃይማኖት ተከታዮች “እንኳን ለተከበረው የረመዳን ወር በሰላም አደረሳችሁ” ብለዋል።

በይድነቃቸው ሰማው