Back

የአዲስ አበባን የውሃ ችግር ይፈታሉ የተባሉ 3 ፕሮጀክቶች በሚቀጥሉት 3 ዓመት ይጠናቀቃሉ፦ባለስልጣኑ

ጥር 01፣2011

የአዲስ አበባን የውሃ ችግር ይፈታሉ የተባሉ ሶስት ፕሮጀክቶች በሚቀጥሉት ሶስት ዓመታት ተጠናቀው ወደ ስራ እንደሚገቡ  የመዲናዋ ውሃና ፍሳሽ ባለስልጣን አስታወቀ፡፡

አሁን በአዲስ አበባ ያለው የውሃ ስርጭት በፈረቃ የሚዳረስና ፍላጎቱና አቅርቦቱ ተመጣጣኝ ባለመሆኑ በተለያዩ አካባቢዎች የውሃ እጥረት እንደሚከሰት ከተገልጋዮች በቅሬታ መልክ ይደመጣል፡፡

ለአብነትም ሰሞኑን በአስኮ አካባቢና በተወሰኑ የመኖሪያ ኮንዶሚኒየሞች የተከሰተው የውሃ እጥረት ነዋሪዎችን ቅር ያሰኙ ችግሮች እየሆኑ መምጣታቸውን ተገልጋዮቹ ይገልፃሉ፡፡

የአዲስ አበባ ውሃና ፍሳሽ ባለስልጣንም ችግሩን በዘላቂነት ለመፍታት የውሃ አቅርቦትና ፍላጎቱን በማጣጣም የፈረቃ ስርጭትን ለማስቀረት እየሰራ እንደሆነ በተለይ ለኢቢሲ ተናግሯል፡፡

ይህንንም እውን ለማድረግ መስሪያ ቤቱ በሚቀጥሉት ሶስት ዓመታት የሚጠናቀቁ ሶስት የውሃ ፕሮጀክቶች ነድፎ እየተንቀሳቀሰ መሆኑን በባለስልጣኑ የኮሚኒኬሽን የስራ ሂደት መሪ ወ/ሮ ሰርካለም ጌታቸው ገልፀዋል፡፡

ከእነዚህ ውስጥ በአያት አካባቢ የሚለማና በቀን 68 ሺህ ሜትር ኪዮብ የማምረት አቅም ያለው ፕሮጀክት በሚቀጥለው ዓመት ተጠናቆ አገልግሎት እንደሚሰጥ ይጠበቃል ብለዋል፡፡

የለገዳዲ የከርሰ ምድር ውሃና የገርዲ ግድብ ፕሮጀክቶች በቀን 159 ሺህ ሜትር ኩዮብ የማምረት አቅም ያላቸው ሲሆን እስከሚቀጥለው 2014 ይጠናቀቃሉ ተብሏል፡፡

እነዚህም ፕሮጀክቶች ሙሉ ለሙሉ ተጠናቀው ወደ ስራ ከገቡ የመዲናዋን የውሃ ችግር ይፈታሉ ብለዋል ወ/ሮ ሰርካለም፡፡

አሁን በአዲስ አበባ ያለው የውሃ ፍላጎት በቀን 930 ሺህ ሜትር ኩዩብ ቢሆንም የመዲናዋ የውሃ የማምረት አቅም ግን በቀን 574 ሺህ ሜትር ኩዮብ እንደሆነ ከባለስልጣኑ የተገኘው መረጃ ያመለክታል፡፡

ይሁን እንጂ በኤሌክትሪክ መቆራረጥ፣ በውሃ ምርት መቀነስ፣ በመንገድ ግንባታ ወቅት በውሃ መስመሮች ላይ በሚደርስ ጉዳትና በመሰል ችግሮች ሳቢያ በከተማው ያለው የውሃ አቅርቦት በቀን 530 ሺህ ሜትር ኩዮብ ብቻ እንደሆነ ተመልክቷል፡፡

ሪፖርተር፦ ሰለሞን አብርሃ