Back

በህገ ወጥ መንገድ የተገኙ 894 የስልክ ሞባይሎችና ተያያዥ እቃዎች ተያዙ

መጋቢት 26፣ 2011 ዓ.ም

በህገ ወጥ መንገድ የተገኙ 894 የስልክ ሞባይሎች፣ አንድ ሺህ 578 የሞባይል ባትሪና ቻርጀሮች መያዙን በገቢዎች ሚኒስትር የኮምቦልቻ ቅርንጫፍ ጽህፈት ቤት አስታወቀ፡፡

ህገ ወጥ እቃው የተያዘው ህጋዊ ፈቃድም ሆነ ሌላ ማስረጃ ሳይኖረው ትናንት ከመቀሌ ወደ አዲስ አበባ ይጓዝ በነበረ ሚኒባስ የህዝብ ማመላለሻ ተሽከርካሪ ውስጥ ነው፡፡

የታርጋ ቁጥሩ ኮድ 3- 65109 አዲስ አበባ የሆነ ሚኒባስ ተሽከርካሪ ውስጥ የተያዙት ሞባይሎችና ተያያዥ እቃዎች በወልድያ ፍተሻ ጣቢያ እንደሆነ የጽህፈት ቤቱ ስራ አስኪያጅ አቶ ሰልማን ዳውድ ለኢዜአ ገልጸዋል፡፡

ከ750 ሺህ ብር በላይ ግምት ያላቸው እቃዎቹ በሚኒባሱ ውስጥ በዶሮ ጫጩት መጫኛ ሳጥን ስር በመደበቅ የተገኙ ናቸው፡፡

አሽከርካሪውን ጨምሮ 4 ተጠርጣሪዎች ተይዘው ምርመራ እየተደረገባቸው መሆኑን ስራ አስኪያጁ አስታውቀዋል፡፡