Back

4ዐ ሚሊዮን ዮሮ የሚፈጅ የልብ ህክምና ማዕከል ግንባታ የመሰረት ድንጋይ በአዲስ አበባ ተቀመጠ

ሚያዝያ 20፣2011

4ዐ ሚሊዮን ዮሮ የሚፈጅ አዲስ የልብ ህክምና ማዕከል ግንባታ የመሰረት ድንጋይ  በአዲስ አበባ ጥቁር አንበሳ ስፔቫላይዝድ ሆስፒታል ተቀመጠ፡፡

በዛሬው ዕለት የተቀመጠው የልብ ህክምና ማዕከል ከሁለት አመት በኋላ ተጠናቆ አገልግሎት ይበቃል ተብሎ ይጠበቃል፡፡

ማዕከሉ በኢትዮጵያ መንግስትና በኔዘርላንድ መንግስት የእኩል በእኩል ትብብር የሚሰራ መሆኑን በስነ ስርዓቱ ላይ ተመልክቷል፡፡

የመሰል ዓይነት ማዕከላት እውን መሆን የጤና ሜዲካል ቱሪዝም አመቺ ሁኔታ ለመፍጠር  የጐላ ድርሻ እንደሚፈጥር የኘሮጀክቱ አስተባባሪና የልብ ህክምና ከፍተኛ አማካሪ የሆኑት ዶ/ር ብርሃኑ ነጋ ገልጸዋል፡፡

የጤና ሚኒስትሩ ዶ/ር አሚር አማን እንደገለጹት ፕሮጀክቱ  በሀገሪቱ ከፍተኛ የጤና ቀውስ የሆኑትን ተላላፊ ያልሆኑ በሽታዎች ለመከላከል የሚያስችሉ ኘሮጀክቶችን ለማከናወን ከተያዙት እቅዶች መካከል መሆኑንም ተናግረዋል፡፡

በቀጣይም ለካንሰር የጨረር ህክምና እና ለኩላሊት ንቅለ ተከላ እንዲሁም  ተያያዥ ህክምናዎች የሚያገለግሉ ኘሮጀክቶች በጥቁር አንበሳ ግቢ ውስጥ እውን እንዲሆኑ እየተሰራ ነው ብለዋል፡፡

በኢትዮጵያ የኔዘርላንድ አምባሳደር ቤንግት ቫን በበኩላቸው መንግስታቸው  በእንደዚህ አይነትና ሌሎች ፕሮጀክቶችም ከኢትዮጵያውያን ጋር ተባብረው ለመስራት በመቻላቸው ደስተኛ መሆናቸውን የጤና ሚኒስቴር ያወጣው መረጃ አመልክቷል፡፡