Back

7 ፓርቲዎች ተዋህደው የሚፈጥሩት አዲስ ውህድ ፓርቲ የመመስረቻ ጉባኤውን በአዲስ አበባ እያካሄደ ነው

ግንቦት 01፣2011

7 ፓርቲዎች ተዋህደው የሚፈጥሩት አዲስ ውህድ ፓርቲ የመመስረቻ ጉባኤውን በአዲስ አበባ እያካሄደ ነው፡፡

ማህበራዊ ፍትህን መሰረት አድርጎ የሚመሰረተው አዲስ ውህድ ፓርቲ የዜግነት ፖለቲካን መሰረት አድርጎ ወደ ስራ እንደሚገባ በመመስረቻ ጉባኤው መክፈቻ ላይ ተመልክቷል፡፡

ራሳቸውን አክሰመው አንድ የተወሃደ ፓርቲ ለመመስረት የተሰባሰቡት ከዚህ ቀደም የኢትዮጵያ ዴሞክራሲያዊ ፓርቲ፣ የመላ ኢትዮጵያ ዴሞክራሲያዊ ፓርቲ ፣ የአርበኞች ግንቦት 7፣ ሰማያዊ ፓርቲ፣አዲስ ትዉልድ ፓርቲ፣ የጋምቤላ ክልላዊ ንቂናቄና የቀድሞ አንድነት ለፍትህ ለዴሞክራሲ ፓርቲ አባላት ናቸው፡፡

በአዲስ አበባ ስድስት ኪሎ አቅራቢያ በሚገኘው የስብሰባ ማዕከል እየተካሄደ በሚገኘው በዚሁ ጉባዔ የመክፈቻ ንግግር ያደረጉት የቀድሞዉ የአርበኞች ግንቦት 7 ዋና ፀኃፊ አቶ አንዳርጋቸዉ ጽጌ፣ ፓርቲዎች ሲመሰረቱ ለአመራር አንድነት ትኩረት ሊሰጡ ይገባል ብለዋል፡፡

ሰላማዊ ትግል ወሳኝ ነው ያሉት አቶ አንዳርጋቸው " እኛ ኃላፊነታችንን በመወጣት መንግስት ኃላፊነቱን እንዲወጣ ማድረግ አለብን" ብለዋል፡፡

አዲሱ ፓርቲ ማህበራዊ ፍትህን መሰረት ያደረገ እና ይህንን መሰረት ባደረገ ፓሊሲ የሚመሰረት ይሆናልም ተብሏል፡፡

ጉባኤው ለሁለት ቀን የሚቆይ ሲሆን በዛሬ ውሎው በፓርቲው ደንብ፣ መዋቅር ስያሜ እና አርማ ላይ መክሮ ውሳኔ እንደሚያሳልፍ ይጠበቃል።

ወረዳን መሰረት ያደረገው የፓርቲው አደረጃጀት ሁሉን በወኪል የሚሸፍን የፓለቲካ ፓርቲ እንደሚሆንም ተመልክቷል፡፡

አዲሱ የሚመሰረተው ፓርቲ በ310 ወረዳዎች መደራጀቱም በጉባኤው ላይ ተመልክቷል፡፡

በእዮብ ሞገስ