Back

ዛሬ በተካሄደው የኤርቴል የዴልሂ ግማሽ ማራቶን ውድድር ኢትዮጵያውያን አትሌቶች ድል ቀንቷቸዋል

ጥቅምት 11/2011

ዛሬ በተካሄደው የኤርቴል የዴልሂ ግማሽ ማራቶን ውድድር ኢትዮጵያውያን አትሌቶች ድል ቀንቷቸዋል

አትሌት ፀሃይ ገመቹ ዛሬ በኒው ዴልሂ፣ ህንድ በተካሄደው የኤርቴል የግማሽ ማራቶን ውድድር የቦታውን ክብረ ወሰን በማሻሻል አሸንፋለች፡፡

ፀሃይ ውድድሩን በ1፡06፡50 በማጠናቀቅ 1፡06፡50 የነበረውንና በኬኒያዊቷ ሜሪ ኬይታኒ ተይዞ የቆየውን የከዚህ ቀደሙን የቦታውን የሴቶች ክብረወሰን በ4 ሴኮንድ አሻሽላዋለች፡፡

ፀሃይ ውድድሩን ላሸነፈችበት 27 ሺህ ዶላር ክብረወሰን ላሻሻለችበት ደግሞ 10 ሺህ ዶላር በድምሩ የ37 ሺህ ዶላር ሽልማቷን ተረክባለች፡፡

የወቅቱ የርቀቱ የዓለም ክብረወሰን ባለቤትና ሌላኛዋ ኬኒያዊት ጆይሲሊን ጄፕኮስጌይ ፀሃይን ተከትላ እና ሌላኛዋን ኢትዮጵያዊት ዘይነባ ይመርን አስከትላ በመግባት የብር ሜዳሊያ ወስዳለች፡፡

በወንዶቹም ምድብ ኢትዮጵያዊው አትሌት አንድአምላክ በልሁ የገጠሙትን ጠንካራ ተፎካካሪዎች ድል በመንሳት የወርቅ ሜዳሊያውን አጥልቋል፡፡

አንድአምላክ ውድድሩን ለማጠናቀቅ 59 ደቂቃ ከ18 ሴኮንድ ፈጅቶበታል፡፡ ከእርሱ በአራት ሴኮንዶች በመዘግየት ውድድሩን ያጠናቀቀው ሌላኛው ኢትዮጵያዊ አትሌት ዋለልኝ የብር ሜዳሊያ አግኝቷል፡፡

በዚህ ቦታ ሲያሸንፉ ለሁለቱም ኢትዮጵያውያን አትሌቶች የመጀመሪያ ጊዜያቸው መሆኑ ተነግሯል፡፡

በተመሳሳይ ዜና በሆላንድ፣ አምስተርዳም ዛሬ በተካሄደ የሴቶች የማራቶን ውደደር ኢትዮጵያውያኑ ታደለች በቀለ፣ ሻሾ ኢንሴሙ እና አዝመራ ገብሩ በዚሁ ቅደም ተከተል ከ1ኛ እስከ 3ኛ በመውጣት ሶስቱንም ሜዳሊያዎች ጠራርገው ወስደዋል፡፡

ምንጭ፡- ሸፈቅና ድረ-ገፅ