Back

ሽመልስ በቀለ በመጀመርያ ጨዋታው ግብ አስቆጠረ

ጥር 8፡ 2011 ዓ.ም

ከሁለት ቀናት በፊት ሶስት ዓመታት የተጫወተበትን  ፔትሮጀትን ለቆ ወደ ሌላው የግብፅ ክለብ ምስር ኤል ማቃሳ ያመራው ሽመልስ በቀለ በጥር 7 2010 የመጀመሪያ ጨዋታው ሁለት ግቦች በማስቆጠር ቡድኑ ከመመራት ተነስቶ ድል እንዲያደርግ ረድቷል

በግብፅ ፕሪምየር ሊግ 19ኛ ሳምንት ዛሬ ምስር ኤል ማቃሳ በአረብ ኮንትራክተርስ ስታድየም አል ሞካውሉን አስተናግዶ 2-1 አሸንፏል።

ማቃሳዎች 31ኛው ደቂቃ ላይ መሐመድ ሰሚር ለአል ሞካውሉን በፍፁም ቅጣት ምት ባስቆጠራት ግብ እየተመሩ ወደ ዕረፍት ቢያመሩም በ57ኛው ደቂቃ ተቀይሮ ወደ ሜዳ በመግባት የመጀመርያ ጨዋታውን ያደረገው ሽመልስ በቀለ ግብ ለማስቆጠር የፈጀበት ጊዜ ሰባት ደቂቃ ብቻ ነበር።

በ64ኛው ደቂቃ የአቻነቱን እና በ90ኛው ደቂቃ ላይ ደግሞ ወሳኟን የማሸነፊያ ግብ በማስቆጠር ቡድኑ ከመመራት ተነስቶ አሸንፎ እንዲወጣ ቁልፍ ሚና ተወጥቷል።

በፔትሮጀት ሰባት ጎሎች የነበሩት ሽመልስ በውድድር ዓመቱ ያስቆጠራቸውን ግቦች ወደ ዘጠኝ በማሳደግም በከፍተኛ ግብ አስቆጣሪዎች ተርታ መመደብ ችሏል።

ምስር ኤል ማቃሳም በድሉ በመታገዝ ደረጃውን ወደ ሦስተኛነት ሲያድግ በቀጣይ ሁለት ጨዋታዎቹ ታላላቆቹ አል አህሊ እና ዛማሌክን ይገጥማል።

ምንጭ ሶከር ኢትዮጵያ