Back

የአፍሪካ እግር ኳስ በእድገት ጎዳና ላይ ነው፡ ካኑ

ሀምሌ 03 2011

በግብፅ እየተካሄደ ያለዉን አህጉራዊ ዉድድር እየተከታተለ ያለው የቀድሞ የአፍሪካ ኮከብ ተጫዋች ንዋንኩ ካኑ የአፍሪካ እግር ኳስ በእድገት ጎዳና ላይ መሆኑን ተናገረ፡፡

የአፍሪካ እግር ኳስ  ፌዴሬሽን  ለቀድሞ ኮከቦች ባቀረበው ግብዥ መሰረት ግብፅ የሚገኘው ካኑ ሀገሩ ናይጄሪያ በሩብ ፍፃሜው ዛሬ ከደቡብ አፍሪካ  በካይሮ አለም አቀፍ ስታዲም ከሚያደርጉት ጨዋታ በፊት አስተያየቱን ሰጥቷል፡፡

ከጨዋታው በፊት በአህጉሪቱ አጠቃላይ እግር ኳስ  ዙሪያ ከካፍ ኦንላይን ቆይታ ያደረገው የቀድሞው የናይጄሪያ ኮከብና የሁለት ጊዜ የአፍሪካ ኮከብ ተጫዋች በእግር ኳሱ በርካታ መሻሻሎች መኖሩን ተናግሯል፡፡

በአህጉሪቱ እግር ኳስ እኔ ተጫዋች ከነበርኩበት ጊዜ  ወዲህ  በርካታ ለውጦች ተመዝግበዋል፡፡ የትላንቱ ካፍ  አሁን በብዙ መልኩ ተቀይሯል፡፡ ስታዲየሞች በከፍተኛ ሁኔታ እየዘመኑ ናቸው፡፡አሁን እድሜ ለቴክኖሎጂ የፈለከዉን  ዉድድር ወይም ተጫዋቾችን በዲጂታል ቴክኖሎጂ  በመታገዝ ቤታችን ዉስጥ ሆነን መከታተል የምንችልበት ዘመን ላይ ነን፡፡ ይህ እኔ ተጫዋች በነበርኩበት ወቅት ከነበረው ሁኔታ በምንም መልኩ አይነፃፀርም፡፡  እነዚህና መሰል ጉዳዮች የአፍሪካ እግር ኳስ  እንዲያድግና የተሻለ እንዲሆን ረድተውታል ብሏል፡፡