Tapha eeggamaa Arsenaalii fi Biraaytan, Liivarpuulii fi Kiristaal Paalaas
***************************
Liigiii kubbaa miilaa Ingilaandiin kan qophaahuu waancaa Karabawoo marsaa 4ffaan kaleessaa taphatamuu eegaleera.
Taphoota kaleessa taphatamaniin kilaboonni Piriimiyer Liigii hundinuu morkattoota isaanii injifataniiru.
Haaluma kanaan kilaba marsaa 3ffaa irratti Maanchister Yuunaayitid moo’ate Girimsiby Taawun waliin dirree isaatiin ala kan taphate Bireentifoord goolii 5 fi 0n moo’ate.
Tapha Liivarpuul goolii 3 fi 2n injifatan irraa Daangoo Otaraa fi Vandenberg qofa qabataniii dirree kan seenan leenjisaan Bireentiford Keeyiz Andireews goolii Jeensen, Liwus Pooter, Neelsan, Kaarvahalloo fi Koolins galchaniin 5 fi 0n injifachuudhaan nuusa xumuraaf darbanii jiru.
Kilaba Liigii 1ffaa Woykaambee waliin kan taphate Fuulhaamis rukuttaa adda baastuun injifachuudhaan taphoota shan walitti aansee moo’amuu jalaa miliqeera.
Taphni daqiiqaa idilee garee lamaanii goolii Wuudroow Woykaambeef galche fi Kiing Fuulhaamiif galcheen 1 qixa xumuramus rukuttaa adda baastuun Fuulhaam 5 fi 4n injifachuun nuusa xumuraaf darbeera.
Morkiiwwan waancaa Karbawoo marsaa 4ffaan hara’s yoo itti fufan taphni Arsenaal Biraaytan waliin galgala sa’aatii 4:45n irraa eegaluun taphatu ni eeggama.
Piriimiyer Liigii Ingilaand qabxii 22n dursaa kan jiru gareen Mikeel Arteettaa, tapha har’aatiin taphattoota Piriimiyer Liigii irratti hiriiruf carraa hinarganne fayyadama jedhameet eeggama.
Maartiin Odeegaard, Noonii Maaduweekkee, Kaayii Haavertizii fi Gabri’eel Heesus ammas miidhama irra hin fayyine.
Wiiliyaam Saalibaa fi Gabri’eel Maartineelinis miidhmani salphaan muudateera.
Erga waancaa Karabawoo injifatee waggaa 30 kan guute Arsenaal, akkuma bara darbe Niiwkaastiliin qorame hara’s Imireetitti Biraaytaniin qormaata cimaatu isa eeggata.
Dorgommii kanaan Arsenaal kilaboota Pirimiyer Liigii waliin yoo taphatu hedduu rakkata.
Garichi taphoota waancaa Karabawoo 10n kilaboota Pirimiyer Liigii waliin taphate keessaa 7n moo’amee jira.
Biraaytan dorgommii kanaan bara kana Okisfoord Yuunaayitidii fi Barnisley goolii 6 fi 0n injifatee sadrkaa kanarra gahuun kilaba jalqabaa ta’ee jira.
Kilabichi Pirimiyer Liigiin Niiwkaastiil Yuunaayitii fi Cheelsii injifachuun isaa Arsenaaliif hin salphatu.
Ta’us Biraaytan taphoota afran darbe Arsenaal waliin taphatee hininjifanne.
Pirimiyer Liigin bara kana taphoota afur kan moo’ame gareen Arnee Isloot Liivarpuulis sa’aatiidhuma walfakkaataatti Kiristaalpaalaas simata.
Aleeksander Yiishaak, Riyaan Giravenberchii fi Kurtis Joonsi miidhamaan taphni kun jala darba.
Liivarpuul kan bara kanaa lama dabalatee taphoota saddeet Kiristaalpaalas waliin taphate keessa lama qofa injifate.
Gareen Oligunar Gaalsiner bara darbe marsaa 4ffaan Astoonviilaa injifatus taphoota marsaa kanaan taphate Saddeet keessa jahaan moo’ameera.
Faallaa isaatiin Liivarpuul taphoota 14 marsaa kanaan kilaboota Piriimiyer Liigii waliin taphate keessa 12n marsaa itti aanuf darbee jira.
Taphoota birootiin Cheelsiin dirree isaatiin ala Wolvis waliin yoo taphatu, Maanchister Siitiinis Suwaansii waliin taphata.
Sa’aatii shan irraa eegaluun ammoo Niiwkaastil Yuunaayitid Tootenhaam Hootispers waliin taphata.
Nuuroo Amaanootu gabaase
