በቻይናዋ የቴክኖሎጂ ማዕከል ሼንዘን ከተማ ሊካሄድ ይችላል የተባለው የአሜሪካ፣ የቻይና እና የሩሲያ መሪዎች የሦስትዮሽ ውይይት በእርግጥም በታሪክ የመጀመሪያው ይሆናል።

የአሜሪካው ፕሬዚዳንት ዶናልድ ትራምፕ ከሩሲያው ፕሬዚዳንት ቭላድሚር ፑቲን እና ከቻይናው ፕሬዚዳንት ሺ ጂንፒንግ ጋር በአንድ የውይይት ጠረጴዛ ዙሪያ ለመቀመጥ በጎ ፍላጎት ማሳየታቸውን ተከተሎ፣ አዲስ የጂኦፖለቲካ ግንኙነት ይፈጥራል ስለተባለው መድረክ በርካታ አስተያየቶች መሰንዘር ጀምረዋል።

ምንም እንኳን የክሬምሊን ቃል አቀባይ ዲሚትሪ ፔስኮቭ ውይይቶች እየተካሄዱ መሆናቸውን ቢያረጋግጡም፣ በጉባኤው አጀንዳ ዙሪያ ገና ግልጽ መግባባት አልተደረሰም። ይህ ሊደረግ የታሰበው የሦስትዮሽ ስብሰባ በዓለም አቀፍ የፖሊሲ ጥናት ማዕቀፍ መነጽር ሲታይ፣ በእርግጥም ከመደበኛ የዲፕሎማሲ ንግግር ያለፈ የዓለም አቀፍ የኃይል ሚዛንን፣ የኑክሌር ፖሊሲን እና የጂኦፖለቲካዊ ተፅዕኖ ክፍፍልን ዳግም የመቅረጽ አቅም ያለው ክስተት ሊሆን እንደሚችል ከወዲሁ ይገመታል።

በዚህ ስትራቴጂያዊ የፖሊሲ ሂደት ውስጥ የሦስቱ ኃያላን ሀገራት አቋም ሲፈተሽ፣ ፕሬዚዳንት ዶናልድ ትራምፕ ለስብሰባው ከፍተኛ ፍላጎት እንዳላቸው ገልጸዋል። የስብሰባው ዋና ማዕከል የዩክሬን ጦርነት ሳይሆን የኑክሌር መሣሪያዎች ቅነሳ እና ቁጥጥር መሆን እንዳለበትም አመላክተዋል።

ትራምፕ “ፕሬዚዳንት ሺ ፍላጎቱ ካላቸው ስብሰባውን አደርገዋለሁ፤ ስለ ንግድ ጉዳዮችም የምንነጋገር ይሆናል” ማለታቸው፣ አሜሪካ ከሩሲያ ጋር የናፍጣ ስምምነት በማድረጓ እና ማዕቀቦችን በማንሣቷ ዳራ ውስጥ፣ ከተለምዷዊ የኔቶ (NATO) አጋሮች ተፅዕኖ ውጭ ከሌሎቹ ሁለት የዓለም ኃያላን ጋር በቀጥታ የመደራደር አቅማቸውን ለማሳየት የመሻታቸው መገለጫ ተደርጎ ይወሰዳል።

በሌላ በኩል፣ የሩሲያው ፕሬዚዳንት ቭላድሚር ፑቲን የሦስትዮሽ ስብሰባው ሐሳብ ጠንሳሽ ናቸው። በዋናነት አምስተኛ ዓመቱን የያዘውን የዩክሬን ጦርነት በድርድር ለመቋጨት እንደ ዋና መድረክ መጠቀም ይፈልጋሉ። ለሞስኮ ከእነዚህ ሁለት ኃያላን ሀገራት ጋር በአንድ ጠረጴዛ ዙሪያ መቀመጥ በራሱ፣ ምዕራባውያን የጣሉባት ዓለም አቀፍ የዲፕሎማሲ መገለል ማብቃቱን የሚያበስር እና የኃያልነት ማዕረጓን የሚያረጋግጥ ትልቅ ፖለቲካዊ ድል ተደርጎ ይወሰዳል።

በተመሳሳይ መልኩ፣ የመሪዎቹን ውይይት ልታስተናግድ ትችላለች የተባለችው ቻይና እና ፕሬዚዳንት ሺ ጂንፒንግ በበኩላቸው፣ በጉዳዩ ላይ ከፍተኛ ጥንቃቄ የተሞላበት ሚዛናዊ አቋም ይዘዋል። ቤጂንግ እንደ የዓለም ኢኮኖሚ ማገገም፣ የምግብ እና የኢነርጂ ደኅንነት እንዲሁም የአየር ንብረት ለውጥ ባሉ አዎንታዊ ጉዳዮች ላይ ለመወያየት ዝግጁ ብትሆንም፣ የራሷ የኑክሌር መሣሪያ ከዋሽንግተን እና ሞስኮ ጋር በቁጥር የሚመጣጠን ስላልሆነ ባለሦስት ወገን የኑክሌር ድርድር ውስጥ እንድትገባ የሚቀርቡ ጥያቄዎችን በጽኑ ትቃወማለች።

የቻይና የውጭ ጉዳይ ሚኒስቴር ቃል አቀባይ ማኦ ኒንግ ስለ ስብሰባው የተደራጀ መረጃ የለም ማለታቸውም የዚሁ አቋም አካል ተደርጎ ነው የተወሰደው።

ይህ የሦስትዮሽ ንግግር በዓለም አቀፍ ደረጃ ከፍተኛ የፖሊሲ ስጋቶችን እና የጂኦፖለቲካዊ ሥነ ልቦና መናጋትን ማስከተሉም አልቀረም። በተለይም የውጭ ፖሊሲያቸውን በአሜሪካ የደኅንነት ዋስትና ላይ የገነቡት እንደ አውሮፓ ሀገራት እና ጃፓን ያሉ የአሜሪካ አጋሮች፣ ትራምፕ ከተለምዷዊ ጥምረት ውጭ ከሞስኮ እና ቤጂንግ ጋር የሚያደርጉት ድርድር በስትራቴጂያዊ መደናገጥ ውስጥ እንዲወድቁ አድርጓቸዋል።

ከዚህ በተጨማሪም፣ ትራምፕ የዩክሬኑን ፕሬዚዳንት ቮሎዲሚር ዜሌንስኪን በግጭቱ ተጠያቂ ማድረጋቸው እና “በዩክሬን ስም የሚደራደር ሌላ አካል የሚያስፈልግበት ጊዜ አሁን ነው” ማለታቸው፣ በኪየቭ እና በምሥራቅ አውሮፓ ሀገራት ዘንድ ሀገራቸው ለኃያላኑ የፖለቲካ ድርድር ሰለባ ልትሆን ትችላለች የሚል ስጋት ፈጥሯል።

ሀገራዊ እና ዓለም አቀፋዊ የፖሊሲ ተመራማሪዎች እንደሚጠቁሙት፣ ጉባኤው በሚካሄድባት የቴክኖሎጂ ማዕከል ሼንዘን፣ በኃያላኑ መካከል ያለው የሰው ሠራሽ አስተውሎት (AI)፣ የሳይበር ደኅንነት እና የሴሚኮንዳክተር አቅርቦት ሰንሰለት ውድድር በሁለትዮሽ እና በሦስትዮሽ ንግግሮች ውስጥ ዋና የውጥረት ምንጭ ሆኖ ቀጥሏል።

ስለሆነም፣ የዓለም አቀፍ የፖሊሲ ተንታኞች ምልከታ እንደሚያመላክተው፣ ይህ የሦስትዮሽ ስብሰባ የዩክሬን ጦርነትን በአንድ ጀምበር የመፍታት ወይም የዓለም ሥርዓትን ሙሉ በሙሉ የመቀየር አቅም ይኖረዋል ተብሎ አይጠበቅም። ሆኖም ግን፣ ለዘላቂ ዓለም አቀፍ መረጋጋት ሲባል በኃያላኑ ሀገራት መካከል ሊከሰቱ የሚችሉ ወታደራዊ እና ስትራቴጂያዊ ስህተቶችን ለመከላከል የሚያስችል የችግር ጊዜ መገናኛ መስመር መዘርጋት መሠረታዊ መፍትሔ ነው።

እናም፣ ስብሰባው ስኬታማ እንዲሆን የሦስቱ ሀገራት ቀይ መስመሮች ሳይጣሱ በዓለም አቀፍ የኢኮኖሚ ማገገም፣ በምግብ እና ኢነርጂ ደኅንነት ላይ የጋራ መግባባት መፍጠር እንደሚገባ ተመላክቷል።

አሜሪካ ከባለሦስት ወገን ውይይቱ ጎን ለጎን ከተለምዷዊ የአውሮፓ እና የእስያ አጋሮቿ ጋር ያላትን የደኅንነት ትሥሥር ሳታናጋ የኃይል ሚዛኑን ማስጠበቋ ለቀጣናዊ እና ዓለም አቀፋዊ ሰላም ወሳኝ አቅጣጫ መሆኑም ተነሥቷል።

በሰለሞን ገዳ