የተቀለበሰው የተዛባ ትርክት ‘ኢትዮጵያውያን ምርጫ ሊያደርጉ አይችሉም፤ መሪያቸውን በራሳቸው ድምፅ ሊመርጡ አቅም የላቸውም፤ ለመምረጥም ቢሞክሩ እርስ በርሳቸው ይባላሉ፤ ምርጫው የጦርነት እና የግጭት መነሻ ነው’ የሚለውን የተሳሳተ ስሌት እና የተዛባ ትርክት፣ ሕዝባችን በድምፁ እና በተግባሩ ሜዳ ላይ አስቀርቶታል!

ኢትዮጵያ መሪዎቿን በራሷ የምትመርጥ ሉዓላዊት ሀገር ናት! እኛ ኢትዮጵያውያን ለራሳችን ክብር ያለን፣ ለዘመናት የኖረ የዴሞክራሲ እሴት እና የዳበረ የአብሮነት ባህል ያለን ሕዝቦች ነን።

የሚያደምጥ ጆሮ ያለው፣ ልቡን ከፍቶ እውነትን የሚሻ ሁሉ የሕዝቡን የልብ ትርታ በሚገባ አድምጦታል። የሰሞኑ ምርጫ ኢትዮጵያውያን በጋራ የገነቡት ታሪካዊ ከፍታ፣ የዛሬው ትውልድ በኩራት የሚያወራለት፣ የነገውም በታሪክ ማኅደር በወርቅ ቀለም የሚያነብበው አንጸባራቂ የድል ምዕራፍ ነው።

የጨለምተኞቹ ስላቅ እና የሕዝቡ ፅናት

ይህንን ሀገራዊ ድል እና የሕዝብን ትዕግሥት ለማሳነስ፣ የጨለምተኝነት አባዜ የተጠናወታቸው ኃይሎች ያላደረጉት ሙከራ፣ ያልፈነቀሉት የጥፋት ድንጋይ አልነበረም። በተለይም በብርድ እና በቁር፣ በጨለማ እና በሌሊት ወረፋቸውን ጠብቀው የቆሙት እናቶች፣ ፅንስ የተሸከሙ ነፍሰ ጡሮች፣ ቤተሰቦቻቸውን በሞት ኀዘን የተነጠቁ እና ስብራት ያረፈባቸው ዜጎች፣ እንዲሁም በአካል ጉዳት ሳይበገሩ በዊልቸር የተገኙት ጽኑ ኢትዮጵያውያን ላይ ለማላገጥ እና እውነታውን ወደ ስላቅ እና ፌዝ ለመቀየር አሳፋሪ ሙከራ ተደርጓል።

ይህ ድርጊት የነቃፊዎቹን የሞራል ውድቀት እና የሕሊና ድህነት ከማሳየት የዘለለ ትርጉም የለውም። እነዚህን የዘመናችን ጀግኖች ፅናት ወደ ቧልት ለመቀየር መሞከር፣ ሀገርን የማፅናት ገድልን ካለማወቅ የመነጨ ታሪካዊ ክሽፈት ነው።

በቧልት የማይሰበረው የሞራል ከፍታ

ነገር ግን፣ አንድ ሊሰመርበት የሚገባ ዐቢይ እውነት አለ፤ ይህ የፌዘኞች ውርጅብኝ የእነዚህን ጀግኖች ሞራል ለአንዲት ደቂቃም ቢሆን ዝቅ የሚያደርገው አይደለም! ስላቅ እና ፌዝ ከውስጥ የሚንበለበለውን የሀገር ፍቅር ስሜት ሊያደበዝዘው አይችልም። ምርኩዛቸውን ተደግፈው፣ ዊልቸራቸውን እየገፉ፣ ኀዘናቸውን በሆዳቸው ውጠው ወደ ምርጫ ጣቢያ ያቀኑት ዜጎች፣ ያን ያደረጉት ለተመልካች ወይም ለታዛቢ ብለው አይደለም።

ይልቁንም ዴሞክራሲያዊ መብታቸውን ተጠቅመው የነገዋን ኢትዮጵያ ዕጣ ፈንታ ለመወሰን ካላቸው እጅግ የላቀ የሞራል ከፍታ እና የጠለቀ የሀገር ፍቅር የመነጨ ነው። የእነርሱ ከፍታ በፌዘኞች አፍ ከሚወጣ ቧልት የማይነካ፣ በታሪክ ሚዛን የማይነቃነቅ ክብደት ያለው የጽናት ዐለት ነው።

ሕያው የሆነው የዴሞክራሲ ልምምድ እውነት ነው፤ የተሟላ እና እንከን የለሽ ዴሞክራሲ በአንድ ጀንበር እንደ ጤዛ አይወርድም። ዴሞክራሲ የረጅም ጊዜ የትግል ጉዞ፣ የዕለት ተዕለት ልምምድ፣ ተቋማዊ ግንባታ እና እያደገ የሚሄድ ማኅበራዊ ባህል ነው። ይሁን እንጂ፣ ሕዝቡ የዴሞክራሲያዊ ልምምድ እርከኑን ምን ያህል ከፍ እንዳደረገው በተጨባጭ አረጋግጧል። በኀዘን ልብ ውስጥ ሆነው ለሀገር ተስፋ የቆሙት፣ በብርድ እየተንቀጠቀጡ ለሀገር ሙቀት የሰጡት እነዚህ ዜጎች፣ ዴሞክራሲን በተግባር የኖሩት እና የገነቡት ሕያው ምስክሮች ናቸው።

ዜጎች መሪዎቻቸውን በካርዳቸው መምረጥ እንደሚችሉ በጽኑ አምነው፣ ለድምፃቸው ክብር ሲሉ የተጋደሉበት አውድ የየትኛውንም ነቃፊ አንገት የሚያስደፋ ነው።

የነገዋን ኢትዮጵያ ብሩህ ተስፋ ለመወሰን፣ ካርዱን በእጁ ይዞ ንጋትን የጠበቀው ሕዝብ፣ ድምፁ የሀገርን ሉዓላዊነት የሚያስጠብቅ፣ ጠላትን የሚያሳፍር እና ዘላቂ ሰላምን የሚያመጣ መሆኑን በሚገባ ተረድቷል።

የምርጫውን ጀግንነት እና የሕዝቡን ገድል በስላቅ ማሳነስ ፈጽሞ አይቻልም! የምርጫው ስኬት ከነቃፊዎቹ የባዶ ጩኸት በላይ በክብር ከፍ ብሎ የታየ ነው። ሕዝቡ በድምፁ ሀገርን የማጽናት ኃይሉን ለዓለም አሳይቷል። በፌዝ ሊያሳንሱት የሞከሩት የሕዝብ ጽናት፣ ለትውልድ የሚተላለፍ የሀገር ፍቅር ትምህርት፣ የሞራል ከፍታ፣ እና በማንም ሊደፈጠጥ የማይችል የዴሞክራሲያዊ ባህል ሽግግር ማሳያ ሆኖ በክብር ይኖራል።

በአዶኒያስ ወልደአረጋይ