ሀገር ግንባታ በጊዜያዊ ስብሰባዎች፣ በስሜት አሊያም በአንድ ጀምበር የሚጠናቀቅ ክንዋኔ ሳይሆን በጽናት፣ በመከባበር እና በትውልዶች ቅብብል የሚቃና ረጅም ሀገራዊ ጉዞ ነው።

ላለፉት አራት ዓመታት ወደ ተጨባጭ የውይይት መድረክ ለመሸጋገር በርካታ የቅድመ ዝግጅት ሥራዎችን ሲያከናውን የቆየው የኢትዮጵያ ሀገራዊ ምክክር ኮሚሽን፣ አሁን ላይ ወሳኙን ምዕራፍ በስኬት በማጠናቀቅ ለቀጣዩ ሀገራዊ መግባባት አስተማማኝ መሠረት ጥሏል።

የታሪካዊው የአጀንዳ ማሰባሰብ እና የምክክር ጉባኤ ስኬት

ማንኛውም የተሳካ ሀገራዊ ውይይት የሚመነጨው ሕዝብ የራሱን አጀንዳ በራሱ ሲቀርጽ ነው። የኢትዮጵያ ሀገራዊ ምክክር ኮሚሽን ጥቂት ልሂቃን በዝግ በር ከሚያደርጉት ድርድር ወጥቶ ከታች ወደ ላይ (Bottom-up) የሚል አካታች አሠራርን በመከተል ሰፊ የአጀንዳ ማሰባሰብ ሥራ አከናውኗል።

ይህ ሒደት ከ40 ቀናት በላይ በተካሄደው እና 4,000 የሚጠጉ ተወካዮች በተሳተፉበት ታሪካዊ የሀገራዊ ምክክር ጉባኤ ማጠቃለያ አግኝቷል።

በጠረጴዛ ውይይቶች የተሰበሰቡት አጀንዳዎች የዘመናት ሀገራዊ ስብራቶችን እና መዋቅራዊ ጥያቄዎችን መሠረት ያደረጉ በመሆናቸው፣ ወደ ተጨባጭ መፍትሔ ለመሸጋገር የሚያስችል ግብዓት ሆነዋል።

በዚህ ታሪካዊ ጉባኤ ከተለያዩ የሀገራችን ክፍሎች የመጡ የፖለቲካ ፓርቲዎች፣ የሲቪል ማኅበረሰብ፣ የሃይማኖት ተቋማት፣ አርሶ አደሮች፣ ወጣቶች፣ ሴቶች፣ ታዋቂ ግለሰቦች እና የዳያስፖራ ተወካዮች በአንድ ጠረጴዛ ዙሪያ ተቀምጠዋል። በውይይቱም ከሕዝብ የተሰበሰቡት አጀንዳዎች በዋናነት በስምንት አንኳር ምሰሶዎች ሥር ተጠቃልለው ቀርበዋል።

የአጀንዳ ማሰባሰቡ በስኬት መጠናቀቅ የመጨረሻው ግብ ሳይሆን፣ ወደ ዋናው የመፍትሔና የሀገራዊ መግባባት ምዕራፍ መሸጋገሪያ ነው። በውይይቱ ወቅት የሐሳብ ልዩነቶች እና ክርክሮች ቢንጸባረቁም፣ ተሳታፊዎቹ በስምንቱ ዋና ዋና አጀንዳዎች ዙሪያ ወደ 400 የሚጠጉ የመፍትሔ አቅጣጫዎችን አቅርበው 99 በመቶ ከስምምነት ላይ መድረስ ችለዋል።

በሠለጠነ ውይይት የተደገፈው ይህ ታሪካዊ ሒደት የልዩነቶችን ምንጭ በመቀነስ ለተፋጠነ ሀገራዊ ዕድገት ምቹ ሁኔታ ይፈጥራል።

ሀገር ግንባታ በአንድ ጉባኤ ወይም በአንድ ምዕራፍ ፍጻሜ የሚደመደም ሳይሆን፣ በየጊዜው በሚገነቡ ጠንካራ ተቋማት እና በጋራ ዕሴቶች የሚጸና ቀጣይነት ያለው ጉዞ ነው።

ከምክክሩ የወጡት ስምምነቶች እና ምክረ ሐሳቦች ወደ ፖሊሲ፣ የሕግ ማሻሻያ እና የተቋማት ሪፎርም ሲቀየሩ እውነተኛው የሀገር ግንባታ ሒደት ይበልጥ ይፋጠናል።

የኢትዮጵያ ሀገራዊ ምክክር ኮሚሽንም በቀጣይ እነዚህን የሕዝብ ድምፆች መሬት ላይ ለማውረድ ከሚመለከታቸው አካላት ጋር በቅንጅት መሥራት ይጠበቅበታል።

ሀገር ግንባታ በአንድ ታሪካዊ አጋጣሚ ተጠናቅቆ የሚዘጋ መጽሐፍ ሳይሆን፣ በየዕለቱ በሚደረግ ሀገራዊ ጥረት የሚጻፍ የጋራ ታሪክ ነው።

የኢትዮጵያ ሀገራዊ ምክክር ኮሚሽን የአጀንዳ ማሰባሰቡን እና ታሪካዊውን ጉባኤ በውጤታማነት ማጠናቀቁ፣ ኢትዮጵያውያን የልዩነት እና የጠላትነት ታሪካቸውን በመዝጋት፤ በመከባበር፣ በአካታችነት እና በጋራ መግባባት ላይ የተመሠረተ አዲስ ሀገራዊ ታሪክ ለመጻፍ መዘጋጀታቸውን የሚያበስር ደማቅ ተስፋ ነው።

በሃና ምንዳሁን