ከነሐሴ አጋማሽ እስከ ህዳር ባሉት ወራት የስሜን ተራሮች ብሔራዊ ፓርክ እጅግ ማራኪ እና ህያው የሆነ ተፈጥሯዊ ውበቱን የሚገልጥበት ወቅት በመሆኑ፣ ለአካባቢው ጉብኝት ከተመቹ ተመራጭ ጊዜያት መካከል አንዱ ያደርገዋል።

በእነዚህ ወራት የመሬቱ ገጽታ በሙሉ በለመለመ አረንጓዴ ምንጣፍ የሚሸፈን ሲሆን፣ ድንቅና ጥርት ያሉ ነጫጭ ፏፏቴዎች ከቁልቁለት ገደሎች ላይ እየወረዱ መንፈስን ያድሳሉ። በተጨማሪም በቀለማት ያሸበረቁ የአልፓይን አበቦች በስፋት በማበብ የተራሮቹን ተፈጥሯዊ ውበት ይበልጥ ያደምቁታል።

ከፓርኩ ጽሕፈት ቤት የተገኘው መረጃ እንደሚያመለክተው፣ በአሁኑ ወቅት በርካታ ሀገር ውስጥ እና የውጭ ሀገር ጎብኚዎች በነጠላም ሆነ በቡድን ወደ ስፍራው እየተጓዙ ይገኛሉ።

በተለይም በመስከረም ወር በስሜን ተራሮች ብሔራዊ ፓርክ መገኘት እነዚህን አስደናቂ የተፈጥሮ ገጽታዎች ለማየት፣ በዚያ ብቻ የሚገኙ ድንቅ ሀገር በቀል የዱር እንስሳትን ለመመልከት እና ንጹህ የተራራ አየር ለመተንፈስ እጅግ አመቺ አጋጣሚን ይፈጥራል።