ዓለም በአራተኛው የኢንዱስትሪ አብዮት ውስጥ በምትገኝበት በዚህ ዘመን፣ የቴክኖሎጂ ሽግግር የቅንጦት ሳይሆን የህልውና መሠረት ሆኗል።

ኢትዮጵያ ለዘመናት በወረቀት እና በረጅም የቢሮክራሲ ሰንሰለት ሲንገላታ የነበረውን አሠራር ሰብራ፣ 'ዲጂታል ኢትዮጵያ 2025' ስትራቴጂን በስኬት ተግባራዊ በማድረግ እንዲሁም 'ዲጂታል ኢትዮጵያ 2030'ን ነድፋ ወደ ዘመናዊ መረጃ-መር ኢኮኖሚ ፈጣን ሽግግር እያደረገች ትገኛለች።

ይህ ጉዞ ዜጎችን ከማኅደር ማገላበጥ እንግልት ታድጎ የአገልግሎት አሰጣጥን ከማቅለሉም በላይ አዲስ ሀገራዊ የኢኮኖሚ ሞተር ፈጥሯል።

የዲጂታል ሽግግሩ እጅግ ጎልቶ ከታየባቸው ዘርፎች አንዱ የፋይናንስ ኢንዱስትሪው ነው። "ከመሶብ እስከ ዲጂታል ፋይናንስ" በሚለው መርሕ ቀደም ሲል ከባንክ ሥርዓት ውጭ የነበረው በሚሊዮን የሚቆጠረው የገጠር እና የከተማ ነዋሪ፣ በቴሌብር እና በሌሎች የሞባይል ፋይናንስ መተግበሪያዎች አማካኝነት የዲጂታል ኢኮኖሚው ተዋናይ መሆን ችሏል።

ይህ አካታች የፋይናንስ ሥርዓት ማኅበራዊ መስተጋብርን ከማዘመን ባለፈ የንግድ ልውውጥን በማፋጠን የማክሮ-ኢኮኖሚውን ፍሰት ጤናማ አድርጎታል።

ከዚህም ባሻገር ኢትዮጵያ "የቆመ ጠብቀኝ ዘመን ተለውጦ በአንድ ጊዜ ብዙ ኢላማዎችን መምታት" ወደሚያስችላት የሰው ሠራሽ አስተውሎት ዘመን ገብታለች።

የኢትዮጵያ ሰው ሠራሽ አስተውሎት ኢንስቲትዩት መቋቋም ቴክኖሎጂውን በጤናው ዘርፍ፣ በግብርና ምርምር፣ በትምህርት እና በብሔራዊ ደኅንነት አውታሮች ላይ በስፋት ለመተግበር አስችሏል።

ወጣቱ ትውልድ የትናንቱን የጥላቻ ፖለቲካ ኩሬ ትቶ፣ በፈጠራ እና በቴክኖሎጂ ሰፊ ውቅያኖስ ውስጥ እንዲዋኝ ምቹ ምሕዳር ተፈጥሯል።

በዲጂታላይዜሽን ሂደት ውስጥ እጅግ ወሳኙ እና ሊዘነጋ የማይችለው ጉዳይ ብሔራዊ የመረጃ ሉዓላዊነት (Data Sovereignty) ነው።

በ21ኛው ክፍለ ዘመን መረጃ ልክ እንደ ነዳጅ ውድ ሀብት ነው። የዜጎችን፣ የተቋማትን እና የሀገር ደኅንነትን የሚመለከቱ መረጃዎች በውጭ አካላት ሰርቨሮች ላይ ከመቀመጥ ይልቅ፣ በሀገር ውስጥ ዘመናዊ የዳታ ማዕከላት እንዲጠበቁ መደረጉ ትልቅ የደኅንነት ድል ነው።

ይህ የኢትዮጵያን ብሔራዊ ጥቅም ከሳይበር ጥቃቶች እና ከባዕዳን የስለላ ጣልቃ ገብነት የሚጠብቅ የሉዓላዊነት ማረጋገጫ ነው።

የቴክኖሎጂ ሽግግሩ ሕጋዊ አሠራሩንም አዘምኖታል። የዲጂታል መታወቂያ ተግባራዊ መሆን፣ የኤሌክትሮኒክ ንግድ ሕጎች መውጣት እና የሳይበር ደኅንነት ሕጎች መተግበር ሕጋዊ ማዕቀፎችን ጠንካራ አድርገዋቸዋል።

ወንጀልን ለመከላከል፣ ታክስን በፍትሐዊነት ለመሰብሰብ እና ሙስናን በቴክኖሎጂ ለማምከን ዲጂታል መድረኩ የማይተካ ሚና እያጫወተ ይገኛል።

ይህንን ስኬት መሠረት በማድረግ መንግሥት በቀጣይ ዓመታት ኢትዮጵያ በአፍሪካ የዲጂታል እና የቴክኖሎጂ ማዕከል ለማድረግ ሰፊ ስትራቴጂ ነድፎ ወደ ተግባር ገብቷል።

በቀጣይም የመንግሥት አገልግሎቶችን ሙሉ በሙሉ ወደ አንድ የዲጂታል መስኮት በማምጣት የዜጎችን ጊዜና ጉልበት ለመቆጠብ፣ የከፍተኛ ፍጥነት ኢንተርኔት መሠረተ ልማትን እስከ ገጠር ቀበሌዎች ድረስ በማስፋፋት የዲጂታል ክፍፍልን ለማጥበብ ጠንካራ ሥራዎችን ያከናውናል።

በተጨማሪም የሰው ሠራሽ አስተውሎትን በመጠቀም የግብርና ምርታማነትን በእጥፍ ለማሳደግ፣ ስማርት ከተሞችን ለመገንባት እና የጤናውን ዘርፍ ሙሉ በሙሉ በዲጂታል ቴክኖሎጂ ለማስተሳሰር እየሠራ ይገኛል።

በአጠቃላይ ዲጂታል ኢትዮጵያን መገንባት ማለት በዘመናዊነት እና በቴክኖሎጂ መሪነት በአፍሪካ ቀንድ ውስጥ ተፅዕኖ ፈጣሪ ሆኖ መውጣት ማለት ነው።

የሰው ሠራሽ አስተውሎት፣ የመረጃ ሉዓላዊነት እና የዲጂታል ፋይናንስ መስፋፋት፣ ኢትዮጵያ የነገውን ዓለም ዛሬ ለመኖር የምታደርገውን የሥልጣኔ ዝላይ የሚያረጋግጡ የብልጽግና አምዶች ናቸው።

በበረከት ሽመልስ

#የመደመርመንግሥት #ትልቅ_ሀገር! #ትልቅ_ሕዝብ! #ታላቅ_ርዕይ!