ኢትዮጵያ የሉዓላዊነቷን ክብር በጀግንነት እና በመሥዋዕትነት አስጠብቃ የቆየች ሀገር ናት። በታሪክ የተመዘገቡት ድሎች የሕዝባችንን የአንድነት፣ የቆራጥነት እና የአሸናፊነት መንፈስ የሚያሳዩ ሕያው ምስክሮች ናቸው።
ይህንኑ ታሪካዊ አደራ ተሸክሞ ሀገርን ከውጭ ጥቃት የመጠበቅ እና የሕዝቦችን ሰላም የማስከበር ተልዕኮ የተረከበው የኢፌዴሪ መከላከያ ሠራዊት፣ በዘመኑ የደኅንነት ፈተናዎችን ለመመከት የወታደራዊ ብቃቱን ከማሳደግ ባሻገር የቴክኖሎጂ አቅሙንም እያጠናከረ ይገኛል።
ዓለም በቴክኖሎጂ ፈጣን ሽግግር ውስጥ በምትገኝበት በዚህ ዘመን፣ ድሮኖች የደኅንነት እና የመከላከያ ዘርፍን እየቀየሩ ከሚገኙ ዋነኛ ቴክኖሎጂዎች መካከል ተጠቃሽ ናቸው።
ፈጣን መረጃ ለማሰባሰብ፣ የአካባቢ ሁኔታዎችን ለመከታተል እና የሚያጋጥሙ ስጋቶችን ቀድሞ ለመለየት የሚያስችላቸው አቅም፣ በዘመናዊ መከላከያ ሥርዓት ያላቸውን ሚና እያሳደገ መጥቷል። ይህም የሠራዊቱን የመረጃ አቅም፣ የውሳኔ ፍጥነት እና የሥራ ቅንጅት ለማሻሻል ወሳኝ መሣሪያ እየሆነ ነው።
በሀገራችንም የድሮን ቴክኖሎጂን ከመጠቀም ወደ ማምረት የተጀመረው ሽግግር ለሀገራዊ የቴክኖሎጂ ነፃነት እና ለመከላከያ አቅም ግንባታ አዲስ ምዕራፍ ከፍቷል።
ከሀገር በቀል የድሮን አምራቾች መካከል ኤሮአባይ ለግብርና፣ ለግንባታ፣ ለማዕድን ፍለጋ፣ ለኤሌክትሪክ መስመሮች ክትትልና ለካርታ ዝግጅት የሚያገለግሉ ድሮኖችን እያመረተ ይገኛል።
በሌላ በኩል በኢፌዴሪ አየር ኃይል አማካኝነት የተቋቋመው ስካይ ዊን ኤሮኖቲክስ ኢንዱስትሪ፣ ለደኅንነት እና ለወታደራዊ ተልዕኮዎች የሚውሉ ድሮኖችን በማምረት የሠራዊቱን የቴክኖሎጂ ዝግጁነት ለማጠናከር እየሠራ ነው።
የሀገር ውስጥ የድሮን ምርት አንዱ ዋነኛ ጥቅም ቴክኖሎጂውን ከሀገራችን መልክዓ ምድራዊ ሁኔታና ከተለያዩ የሥራ ፍላጎቶች ጋር ማጣጣም መቻሉ ነው። በተለይም ከፍተኛ ከፍታ ባላቸው አካባቢዎች የሚሠሩ ድሮኖችን በሀገር ውስጥ መፈተንና ማሻሻል፣ ለአካባቢያዊ ሁኔታዎች የተሻለ የአፈጻጸም ብቃት እንዲኖራቸው ያግዛል።
ከዚህ በተጨማሪ የሰው ሠራሽ አስተውሎትን፣ የሳተላይት ግንኙነትን እና ተለዋጭ የግንኙነት ሥርዓቶችን በምርቶቹ ውስጥ ማካተት የሥራ ብቃታቸውንና የቴክኖሎጂ ደረጃቸውን ለማሳደግ ያስችላል።
የድሮን ምርት ከወታደራዊ ጥቅሙ ባሻገር ለኢኮኖሚያዊ ዕድገትም ከፍተኛ ዕድል ይዞ መጥቷል። በግብርና ዘርፍ የሰብል ሁኔታን ለመከታተልና ጸረ ተባይ ለመርጨት፣ በግንባታ ሥራዎች ሂደትን ለመከታተል፣ በማዕድን ፍለጋና በኤሌክትሪክ መስመሮች ቁጥጥር የሚውሉ ድሮኖች የሥራ ፍጥነትንና ቅልጥፍናን ለማሳደግ ያግዛሉ። ይህም ሀገራዊ የምርት አቅምን ከማሳደግ ባሻገር አዳዲስ የሥራ ዕድሎችን ለመፍጠርና የቴክኖሎጂ ዕውቀትን ለማስፋፋት የሚያስችል መሠረት ይፈጥራል።
ጠቅላይ ሚኒስትር ዐቢይ አሕመድ (ዶ/ር) የሀገር ውስጥ የድሮን ምርት ፈጣን መረጃ የማግኘት፣ ስጋቶችን አስቀድሞ የመለየት እና የመከላከያ፣ የፖሊስ እና የደኅንነት ተቋማትን አቅም የማጠናከር ጠቀሜታ እንዳለው አመልክተዋል።
ይህ አቅም የሠራዊቱን ታሪካዊ የጀግንነት ባሕል በዘመናዊ የቴክኖሎጂ ዕውቀት እና ብቃት ለማጠናከር የሚያስችል ነው። ዘላቂ ውጤት ለማስገኘት ቀጣይነት ያለው ምርምር፣ የተካነ የሰው ኃይል ልማት፣ የምርት ጥራት ማሻሻያ እና የግሉን ዘርፍ የሚያሳትፍ ትብብር ያስፈልጋል።
በአጠቃላይ፣ የኢትዮጵያ የድል ታሪክ በጀግንነት እና በመሥዋዕትነት ብቻ የተገነባ ሳይሆን በየዘመኑ የሚያጋጥሙ ፈተናዎችን ለመመከት የሚያስፈልገውን አቅም በማዳበርም የሚቀጥል ነው።
የመከላከያ ሠራዊታችንን ዘመናዊ የቴክኖሎጂ አቅም ማጎልበት እና የድሮን ምርትን በሀገር ውስጥ ማሳደግ የሉዓላዊነት ጥበቃን፣ የቴክኖሎጂ ነፃነትን እና የኢኮኖሚ እመርታን በአንድነት የሚያጠናክር ስትራቴጂያዊ እርምጃ ነው።
የትናንቱን ድል ያስመዘገበው ጀግንነት ዛሬ በዕውቀት፣ በፈጠራ እና በቴክኖሎጂ አቅም ሲደገፍ፣ ሀገራችን የራሷን ደኅንነት በተሻለ አቅም ከመጠበቅ ባሻገር የወደፊት የልማት ጉዞዋንም የምታጠናክርበት መሠረት ይሆናል።
በኢንቲሃድ አብራር
አስተያየትዎን እዚህ ያስፍሩ: