በ21ኛው ክፍለ ዘመን የሀገራት የውድድር አቅም የሚወሰነው በተፈጥሮ ሀብት እና በምርት አቅም ብቻ ሳይሆን በሰው ሀብት ልማት እና በሳይንሳዊ አቅም የላቀ ደረጃ ላይ በመድረስ ጭምር ነው።

የሰው ሀብት የቴክኖሎጂ ሉዓላዊነት እና የረጅም ጊዜ የኢኮኖሚ ዕድገት መሠረት ሲሆን፣ የዚህ ሀብት ጥራት የሚቀረጸው በትምህርት ሥርዓት አማካይነት ነው።

የዓለም ኢኮኖሚ መድረክ ትንበያ እንደሚያመለክተው እስከ 2030 ድረስ ቴክኖሎጂን፣ የውሂብ ትንተናን እና የተፈጥሮ ሳይንስን የሚያቀናጁ አዳዲስ የሥራ መደቦች በከፍተኛ ሁኔታ ይፈጠራሉ።

የብሪክስ አባል ሀገራት ከዓለም አቀፉ ሕዝብ ውስጥ አንድ ሦስተኛውን የሚሸፍኑ በመሆናቸው፣ ይህንን የቴክኖሎጂ እና የኢኮኖሚ ሽግግር እንደ አብዮታዊ ፈተና በመውሰድ ከፍተኛ ትምህርታቸውን ስትራቴጂካዊ መሠረተ ልማት አድርገው በመቅረጽ ላይ ይገኛሉ።

ዩኒቨርሲቲዎች ከማህበራዊ ዘርፍ ተቋማት ባለፈ ከኢነርጂ፣ ከሎጂስቲክስ እና ከዲጂታል መድረኮች ጋር እኩል የሚታዩ አገራዊ የስትራቴጂካዊ መሠረተ ልማት ማዕከላት እየሆኑ መጥተዋል።

ይህ በእንዲህ እንዳለ፣ የብሪክስ አባል ሀገራት የትምህርት ሥርዓቶች ወጥ የሆነ ነጠላ ንድፍ ከመከተል ይልቅ እርስ በርስ የሚደጋገፉ እና እያንዳንዱ ሀገር የራሱን ብሔራዊ የጥንካሬ ማዕከላት በሚያለማበት አሰራር ላይ ተመስርተዋል።

ቻይና የትምህርት ሪፎርሞችን ከቴክኖሎጂ ዘመናዊነት ጋር በማቀናጀት ዓለም አቀፍ የትምህርት መሪ ለመሆን ስትሰራ፣ ህንድ የዲጂታል ቴክኖሎጂ እና የሰለጠነ የሰው ሀብት ልማት ላይ አተኩራለች።

ሩሲያ በኢንዱስትሪ እና በእውነተኛው ኢኮኖሚ ፍላጎት ላይ የተመሰረቱ የምርምር ዩኒቨርሲቲዎችን በመገንባት ላይ ትገኛለች።

ብራዚል በትሮፒካል ግብርና ቴክኖሎጂዎች፣ ኤምሬትስ በጠፈር ቴክኖሎጂ እና በሰው ሰራሽ አስተውሎት (AI)፣ ደቡብ አፍሪካ ለኃይል ሽግግር ወሳኝ በሆኑ ማዕድናት ባለሙያዎች ስልጠና ላይ የተሰማሩ ሲሆን፤ ሀገራችን ኢትዮጵያ ደግሞ ለኢንዱስትሪያላይዜሽን እና ለፓርኮች መስፋፋት የሚጠቅም የቴክኒክና ሞያ ትምህርት ሥርዓት በመገንባት ረገድ ከፍተኛ የማድረግ አቅሟን እያሳየች ትገኛለች።

ይህ የተከፋፈለ እና የተቀናጀ የባለሙያዎች ስልጠና ሞዴል ሀገራት ተመሳሳይ የምርምር አቅሞችን እንዳይደግሙ በማድረግ ሀብትን በብቃት እንዲያስተባብሩ አስችሏቸዋል።

በሌላ በኩል የቴክኖሎጂ ሽግግር እና የሰው ሰራሽ አስተውሎት (AI) መስፋፋት የሥራ ገበያውን መልክ ሙሉ በሙሉ እየቀየረው ይገኛል።

የወደፊቱ የሥራ ገበያ በዲጂታል ትራንስፎርሜሽን፣ በአረንጓዴ ኢነርጂ፣ በጤና እንክብካቤ፣ በትምህርት እና በዘመናዊ መሠረተ ልማት ዘርፎች ላይ ከፍተኛ የባለሙያዎች ፍላጎት እንደሚኖረው ይጠበቃል።

ለዚህም ምላሽ ለመስጠት የብሪክስ ኔትወርክ ዩኒቨርሲቲ እንደ ኢነርጂ፣ ኮምፒዩተር ሳይንስ፣ ኢኮሎጂ እና ኢኮኖሚክስ ባሉ ቁልፍ ዘርፎች የጋራ ማስተር ዲግሪ ፕሮግራሞችን እና ዲግሪዎችን በመዘርጋት ድንበር የለሽ የሰለጠነ የሰው ሀብት ገበያ እየፈጠረ ይገኛል።

የትምህርት ተቋማት የጋራ ምርምሮችን ማካሄድ፣ የላቦራቶሪ መሠረተ ልማቶችን ማጣጣም እና የአካዳሚክ ልውውጦችን ማጠናከር ለደቡበ ዓለም ሀገራት የጋራ ልማት እና የቴክኖሎጂ ሉዓላዊነት ማረጋገጫ ሆኗል።

የብሪክስ አባል ሀገራት የትምህርት ሥርዓታቸውን በማቀናጀት እና የዩኒቨርሲቲዎችን አውታረ መረብ በማጠናከር የወደፊቱን የኢኮኖሚ እና የቴክኖሎጂ መሠረት በመገንባት ላይ ይገኛሉ።

የሰው ሀብት ልማትን፣ የሳይንስ ምርምርን እና የኢንዱስትሪ ትስስርን ማቀናጀት ለሀገራት የረጅም ጊዜ ዕድገት ወሳኝ መሆኑ ታምኖበታል።

ኢትዮጵያ በፅኑ መሠረት ላይ የተገነባች #ትልቅሀገር፣ የሰው ሀብቷን እያደራጀች ያለች #ትልቅሕዝብ እና ለወደፊቱ የተዘረጋ #ታላቅርዕይ ያላት ሀገር በመሆኗ፣ የትምህርት ፖሊሲዎቿን ከዓለም አቀፍ የቴክኖሎጂ ለውጦች ጋር በማጣጣም፣ ድንበር የለሽ የባለሙያዎች ስልጠናን እውን በማድረግ እና የጋራ የኢኮኖሚ ሉዓላዊነቷን በማረጋገጥ ረገድ ታሪካዊና አህጉራዊ ሚናዋን በብቃት እየተወጣች ትቀጥላለች።

በሰለሞን ገዳ