በአፋን ኦሮሞ የሙዚቃ ኢንዱስትሪ ውስጥ ፈር ቀዳጅና የበርካታ ድንቅ ሥራዎች ባለቤት የሆነችው አንጋፋዋ አርቲስት እልፍነሽ ቀኖ በዛሬው ዕለት ከዚህ ዓለም በሞት ተለይታለች።

በወጣትነት የዕድሜ ክልሏ የኦሮሞን ባህልና ኪነጥበብ ለማሳደግ ወደ ጥበቡ ዓለም የተቀላቀለችው ይህች የጽናት ምልክት፣ እስከ መጨረሻው የሕይወት ቆይታዋ ድረስ ከመድረክ ድምጿን ሳታርቅ ለበርካታ አድናቂዎቿ የማይረሱ የሙዚቃ ሥራዎችን አበርክታለች።

በምሥራቅ ወለጋ ዞን ነቀምቴ ከተማ አቅራቢያ በሚገኘውና ሲቡ ጉቶ በተባለች ታሪካዊ ስፍራ ተወልዳ ያደገችው አርቲስት እልፍነሽ ቀኖ፣ በሙዚቃዎቿ የምታንጸባርቀው ቁርጠኝነትና የዓላማ ጽናት በብዙዎች ዘንድ የኦሮሞ ሴት የጀግንነት ምሳሌ ተደርጋ እንድትወሰድ አድርጓታል።

በተለይም በ1969 ዓ.ም ወደ ትግል በመቀላቀል ጥበብን የመብትና የነፃነት ድምፅ አድርጋ በመጠቀም ረገድ የተጫወተችው ሚና በኦሮሞ የሥነ-ጽሑፍና የኪነጥበብ ታሪክ ውስጥ ትልቅ ቦታ የሚሰጠው ነው።

ለበርካታ ዓመታት በኖርዌይ ሀገር በስደት ከኖረች በኋላ በቅርቡ ወደ ሀገሯ ኢትዮጵያ የተመለሰችው አርቲስቷ፣ ባደረባት ሕመም ምክንያት በሕክምና ስትረዳ ቆይታ በዛሬው ዕለት ሕይወቷ አልፏል።

በሃይማኖት ከበደ