ዓለም በፍጥነት ወደ ዲጂታል ዘመን እየተሸጋገረች ባለችበት በዚህ ወቅት፣ ሀገራችን ኢትዮጵያም ይህንን የቴክኖሎጂ ሩጫ በከፍተኛ ፍጥነት ተቀላቅላዋለች።

አገልግሎት ለማግኘት በየተቋማቱ በረጅም ሰልፍ መንገላታትና ከቢሮ ቢሮ መመላለስ ቀስ በቀስ ታሪክ እየሆነ፣ ሁሉንም ነገር በስማርት ስልካችን ወይም በኮምፒውተራችን በአንድ ጠቅታ የምናገኝበት ዘመን ላይ ደርሰናል።

ከወረቀት ወደ ዲጂታል አሠራር መሸጋገር ማለት ግን የድሮውን አሰልቺ ሂደት በኮምፒውተር ላይ መድገም ሳይሆን፣ የአገልግሎት አሰጣጡን ሙሉ በሙሉ በዘመናዊ ቴክኖሎጂ በማደራጀት የጊዜና የወጪ ብክነትን ማስቀረት ማለት ነው።

ይህ ዘመናዊ አሠራር የሥራ ሂደቶችን ከማቀላጠፍና ተደጋጋሚ የወረቀት ሥራን ከመቀነስ ባለፈ፣ የተፈጸሙ ግብይቶችን በትክክል በመመዝገብ የሙስና ቀዳዳዎችን በመድፈን ፍትሃዊና ግልፅ የሆነ የአገልግሎት ሥርዓትን ይፈጥራል።

የዲጂታል ኢትዮጵያ ግንባታ የመንግሥት ኃላፊነት ብቻ ሳይሆን፣ የግል ዘርፉ፣ የቴክኖሎጂ ኩባንያዎች፣ የፋይናንስና የትምህርት ተቋማት እንዲሁም መላው ዜጋ በጋራ የሚረባረቡበት ትልቅ ሀገራዊ ፕሮጀክት ነው።

በተለይም በቴክኖሎጂው ዘርፍ ከፍተኛ ፍላጎትና የፈጠራ አቅም ያላቸው ወጣቶቻችን ይህንን የዲጂታል ኢኮኖሚ በማሳደግ ረገድ የጎላ ሚና እየተጫወቱ ይገኛሉ። እርግጥ ነው፣ ይህ ዲጂታል አገልግሎት ይበልጥ እየተስፋፋ ሲመጣ የዜጎችን የግል መረጃ በአስተማማኝ ሁኔታ መጠበቅ፣ የሳይበር ጥቃቶችን በንቃት መከላከልና በሥርዓቱ ላይ ሙሉ እምነት እንዲኖር ማድረግ እጅግ ወሳኝ ጉዳይ ነው።

ዲጂታል ኢትዮጵያ ማለት ወረቀትን በቴክኖሎጂ መተካት ብቻ ሳይሆን፣ ዜጋን ያማከለ፣ ፈጣን፣ ተደራሽና ደኅንነቱ የተጠበቀ የአገልግሎት ባህልን በመገንባት የልማት ጉዟችንን ማፋጠኛ ሞተር መፍጠር ማለት ነው።

በኢንቲሃድ አብራር