ኢትዮጵያ ከጥንት ሥልጣኔ ማማ ላይ የቆመች፣ የታሪክ እና የክብር ባለቤት የሆነች ታላቅ ሀገር። ሆኖም ግን ይህችን ግዙፍ እና ባለብዙ ሚሊዮን ሕዝብ ሀገር ያለ ባሕር በር ማስቀረት፣ ክንፏን እንደመቁረጥ እና መተንፈሻዋን እንደመዝጋት ይቆጠራል።

ለዚህ ነው ዛሬ ላይ "የባሕር በር ጉዳይ" ከማንኛውም የልማት፣ የፖለቲካም ሆነ የዲፕሎማሲ አጀንዳዎች በላይ ሆኖ፣ የኢትዮጵያ ቀዳሚ ብሔራዊ አጀንዳ እና የሕልውና ማረጋገጫ ሆኖ በአደባባይ የበራው። ይህ የትውልድ ቀጣይነት፣ የሉዓላዊነት እና የኢኮኖሚ ነጻነት ዋስትና ማረጋገጫ ቀይ መስመር ነው።

የሥነ-ልቦናው ስብራት እና የ"ነውር ነው" ዘመን

ታሪክን ወደኋላ መለስ ብለን ስንመረምር፣ ላለፉት ጥቂት ዐሥርት ዓመታት የባሕር በር ጉዳይ በሀገራችን የፖለቲካ መድረክ ላይ ስሙ እንዳይነሣ ታግዶ የኖረ ድብቅ አጀንዳ ነበር።

የቀድሞ ገዢዎች ይህንን ታላቅ ሀገራዊ መብት እና ፍላጎት እንደ ትልቅ "ነውር" (taboo) በመቁጠር፣ እንዳይነገር እና እንዳይወራ ክልክል አድርገውት ቆይተዋል።

የኢትዮጵያ የባሕር በር ባለቤትነት ጥያቄ ተቀብሮ፣ ሕዝብ በሥነ-ልቦናዊ ተፅዕኖ ውስጥ እንዲወድቅ እና መውጫ ቀዳዳ እንደሌለው አድርጎ እንዲያስብ ተፈርዶበት ነበር።

ትውልዱ በውስጡ እያረረ፣ በባሕር አልባነት ስሜት እየተብሰለሰለ፣ ነገር ግን ድምፁን አውጥቶ ለመጠየቅ ድፍረት ያጣበት ያ የጨለማ ዘመን ነበር። ስለ ባሕር በር ማውራት እንደ ወንጀል፣ እንደ ጦርነት ናፋቂነት ወይም እንደ ዲፕሎማሲያዊ ስህተት ተቆጥሮ የሀገር መተንፈሻ ታፍኖ የኖረበት ታሪክ የቅርብ ጊዜ ትውስታችን ነው።

የለውጡ ማዕበል እና የመደመር ትውልድ ንቅናቄ

ነገር ግን እውነት ሁልጊዜ ተቀብራ አትቀርም። ከለውጡ ማግስት ጀምሮ የመጣው አዲሱ የለውጥ መንግሥት እና የ"መደመር" ትውልድ ይህንን ለዘመናት የኖረ የሥነ-ልቦና ስብራት እና የፍርሃት ድባብ ሰብሮ ወጥቷል።

የባሕር በር ጉዳይ የፖለቲካ ቁማር ወይም የሩቅ ምኞት ሳይሆን፣ የኢትዮጵያ ሕዝብ የቀን ተቀን ሕይወት እና የሕልውና መሠረት መሆኑን በከፍተኛ ድፍረት እና ስትራቴጂካዊ ዕይታ ወደ አደባባይ አውጥቶታል።

ይህ ትውልድ “ለምን?” ብሎ የመጠየቅ እና የሀገራችንን ታሪካዊ እና ተፈጥሯዊ መብቶች የማስከበር አዲስ ታሪክ እየጻፈ ይገኛል። ከለውጡ ማግስት ጀምሮ መንግሥት ይህንን አጀንዳ በዲፕሎማሲው፣ በኢኮኖሚው እና በማኅበራዊ መድረኮች ላይ በተደጋጋሚ በማስረጽ፣ የኢትዮጵያውያን ዋነኛ የትኩረት ማዕከል እንዲሆን አድርጓል።

ዝምታው ተሰብሯል፤ ክልከላው ፈርሷል! አሁን የባሕር በር ጉዳይ ከቤት እስከ አደባባይ፣ ከፖሊሲ አውጪዎች እስከ ታችኛው የኅብረተሰብ ክፍል ድረስ የነጋ ጠባ የብሔራዊ ውይይት ማዕከል ሆኗል።

የሕዝብ ተቀባይነት እና የተከፈተው አዲስ ምዕራፍ

ዛሬ አዲሱ ትውልድ ይህንን ታሪካዊ ጥሪ በደስታ እና በሙሉ ልብ ተቀብሎታል። ለዘመናት በልቡ ውስጥ ሲብሰለሰል፣ "ለምን የባሕር በር አልባ ሆንን?" እያለ ሲቆጭ እና ሲቆዝም የነበረው ሕዝብ፣ አሁን አጀንዳውን ከፍ አድርጎ ማውለብለብ ጀምሯል። ይህ ንቅናቄ የመንግሥት ብቻ ሳይሆን የሁሉም ኢትዮጵያውያን የጋራ የልብ ትርታ ሆኗል።

ከአራቱም ማዕዘናት የሚሰማው ሕዝባዊ ድምፅ ፍፁም ቁርጠኝነት የተሞላበት ነው፦

"ኢትዮጵያ ታሪካዊ እና ሕጋዊ መብቷ የሆነውን የባሕር በር በሰላማዊ፣ በሕጋዊ እና በጋራ ተጠቃሚነት መርሕ ታረጋግጣለች!" የሚለው መርሕ የሁሉም ዜጋ ጽኑ እምነት ሆኗል።

ይህ ሕዝባዊ መነቃቃት የሀገራችንን የድርድር አቅም እና የዲፕሎማሲ ሚዛን ከመቼውም ጊዜ በላይ ከፍ አድርጎታል። ትውልዱ የባሕር በርን አስፈላጊነት በጥልቀት ተረድቶ፣ ለወደፊት ዕድገቱ እና ለልጆቹ ብሩህ ተስፋ ሲል አዲስ ሀገራዊ የጀግንነት ስሜትን ተጎናጽፏል።

የክብር እና የሕልውና ጉዞ

የባሕር በር አጀንዳ ወደኋላ የማይመለስ፣ የኢትዮጵያ ሕልውና እና የሉዓላዊነት ማረጋገጫ ቀዳሚ ምሰሶ ነው። ትናንት ተፈርቶ እና ተደብቆ የነበረው አጀንዳ፣ ዛሬ በለውጡ መንግሥት መሪነት እና በሕዝብ ጽናት የሀገራችን የነገው ተስፋ መብራት ሆኗል። ኢትዮጵያ ከባሕር በር ውጭ ያላት አማራጭ የድህነት እና የጥገኝነት ዑደት ውስጥ መኖር ብቻ መሆኑን ይህ ትውልድ ጠንቅቆ ያውቃል።

ስለሆነም፣ ይህንን የተጀመረውን ብሔራዊ ንቅናቄ በዕውቀት፣ በሥነ-ልቦና ዝግጁነት እና በአንድነት ይበልጥ በማጠናከር፣ የታሪክ ዕዳችንን ከፍለን፣ ለነገዋ የበለጸገች እና ኩሩ ኢትዮጵያ የባሕር በር ባለቤትነትን ማረጋገጥ የሁላችንም የማይታጠፍ ታሪካዊ ኃላፊነት ነው። የባሕር በራችን - የብልጽግናችን ማረጋገጫ፣ የነጻነታችን እና የክብራችን ታላቅ ደጃፍ ነው!

በአዶኒያስ ወልደአረጋይ