ባለፉት አምስት ዓመታት የኢትዮጵያ የኮንስትራክሽን ዘርፍ የሀገራችንን የመሠረተ ልማት ገጽታ ሙሉ በሙሉ የቀየሩ በርካታ ታላላቅ ምዕራፎችን አስመዝግቧል።

ዘርፉ ለአጠቃላይ የሀገር ውስጥ ምርት (GDP) ያለው አስተዋፅዖም 21 በመቶ ደርሷል።

ይህ ከፍተኛ ዕድገት ዘርፉ በየዓመቱ ከ8 በመቶ በላይ በሆነ ፍጥነት በማደግ ላይ መሆኑን የሚያረጋግጥ ነው።

በተለይም ለግንባታ ኢንዱስትሪው የሚያስፈልጉትን ግብዓቶች እና ቁሳቁሶች 80 በመቶ ያህሉን በሀገር ውስጥ የማምረትና የማቅረብ አቅም መገንባት መቻሉ ለዘርፉ መዋቅራዊ ጥንካሬ ዋነኛ ማሳያ ነው።

በአዲስ አበባ ተጀምሮ በአሁኑ ወቅት ወደ 75 የሀገራችን ከተሞች የተስፋፋው የከተማ ኮሪደር ልማት ፕሮጀክት የከተሞችን ውበትና ምቾት ከመቀየር ባለፈ ሰፊ ማኅበራዊ እና ኢኮኖሚያዊ ፋይዳዎችን እያስመዘገበ ይገኛል።

ይህ ታላቅ ስትራቴጂካዊ ተነሳሽነት በከተማ ውበት እና በአረንጓዴ ልማት ላይ ለተሰማሩ ከ5 ሺህ በላይ አባላት ላሏቸው 560 ማኅበራት ሰፊ የሥራ ዕድል ፈጥሯል።

ለበርካታ ወጣት መሐንዲሶችም ንድፈ-ሐሳባዊ ዕውቀታቸውን ወደ ተግባር የሚቀይሩበት ትልቅ መድረክ ሆኗል።

በተለይም የብስክሌት መስመሮችን፣ ሰፊ የእግረኛ መንገዶችን፣ ዘመናዊና ኃይል ቆጣቢ የስማርት መብራት ምሰሶዎችን እና የኤሌክትሪክ ተሽከርካሪዎችን መሙያ ያካተቱ የትራፊክ ማስተንፈሻዎችን በማካተቱ የአካባቢውን የንግድ እንቅስቃሴና የሪል እስቴት ዋጋ በከፍተኛ ሁኔታ እንዲጨምር አድርጓል።

እንጦጦ ተራሮች ላይ በሀገር ልጆች ጥበብ እየተገነባ ያለው የወንዝ ዳር ልማት እና ተራሮችን የማስዋብ ሥራ ለብዙ ወጣቶች የዕድል በር የከፈተ ነው።

ይህ ሥራ በአንድ በኩል ኮንሶዎች ለዘመናት ያዳበሩትን የግንባታ ጥበብ ከማስፋቱ በተጨማሪ ለዘለቂ የአካባቢ ጥበቃ ውበት የተላበሰ ዘላቂ መፍትሔን የሰጠ ነው።

የዚህን ዘርፍ ግዙፍነት እና ዓለም አቀፍ ትኩረት ለመረዳት ከ30 በላይ ሀገራት የተውጣጡ ከ150 በላይ ዓለም አቀፍ አምራቾች የተሳተፉበትን የቢግ 5 ኮንስትራክት ኢትዮጵያ ኤክስፖን መጥቀስ በቂ ነው።

በዚህ የግንባታ ማዕበል ውስጥ ግንባር ቀደም ተጠቃሽ የሆነው እና በአፍሪካ ግዙፉ የሃይድሮ-ፓወር ፕሮጀክት የሆነው የታላቁ የኢትዮጵያ ሕዳሴ ግድብ ግንባታ ተመርቆ ሙሉ በሙሉ ወደ ሥራ መግባቱ ነው።

በአጠቃላይ 10.7 ሚሊዮን ሜትር ኩብ የሮለር-ኮምፓክትድ ኮንክሪት (RCC) የያዘውና የ74 ቢሊዮን ሜትር ኩብ የውሃ መያዝ አቅም ያለው ይህ ግዙፍ ግድብ፣ የኢትዮጵያን የኃይል አቅርቦት በእጥፍ ለማሳደግ ታቅዶ የተገነባ ነው።

ይህ ሜጋ ፕሮጀክት በኢትዮጵያ ሕዝብ አቅም በሀገር ውስጥ ፋይናንስ የተገነባ ሲሆን፣ በግንባታው ሒደት ውስጥ ከ25 ሺህ በላይ ለሚሆኑ ዜጎች ሰፊ የሥራ ዕድልና ከፍተኛ የቴክኒክ ክህሎት ሽግግር ማምጣት ችሏል።

በትራንስፖርት መሠረተ ልማት ረገድ፣ የኢትዮጵያ መንገዶች አስተዳደር የአርሶ አደሩን ምርት ወደ ማዕከላዊ ገበያ ለማድረስ የ2.51 ቢሊዮን ዶላር ዋጋ ያላቸውን የ3 ሺህ 287 ኪሎ ሜትር የመንገድ ግንባታ ውሎችን አፅድቆ እየገነባ ይገኛል። 

በተጨማሪም የከተማ ነዋሪዎች ቁጥር በፍጥነት እያደገ መምጣቱን ተከትሎ፣ መንግሥት በ10 ዓመቱ መሪ ዕቅዱ 4.4 ሚሊዮን አዳዲስ መኖሪያ ቤቶችን ለመገንባት ዓልሞ እየሠራ ነው።

ለዚህም የግል ዘርፉን ጭምር በስፋት አሳታፊ በማድረግ እና የፋይናንስ አማራጮችን በማስፋት ዘርፉን የማነቃቃት ሥራ እየተሠራ ነው።

በአንድ ወቅት ዘርፉ ላይ ከፍተኛ ፈተና ደቅኖ የነበረውን የሲሚንቶ እጥረት ለሚ ሲሚንቶ ፋብሪካን በመገንባት እና ሌሎች ማስፋፊያዎችን በማድረግ ችግሩን ሙሉ በሙሉ መቅረፍ መቻሉ ለዘርፉ የተሰጠውን ትኩረት ያሳያል።

በቀጣይም እንደ ብረት፣ ሴራሚክ፣ እብነ በረድ እና ሌሎች በከፍተኛ የውጭ ምንዛሬ ከውጭ የሚገቡ የግንባታ ግብአቶችን ሙሉ በሙሉ በሀገር ውስጥ ለመተካት የተጀመረው ሥራ የዘርፉ የኢኮኖሚ ምሰሶነት የሚያጠናክር ነው።