የኢትዮጵያ አገራዊ ምክክር ኮሚሽን ያዘጋጀውና በዓይነቱ መጠነ ሰፊ የሆነው “ኢትዮጵያ እየመከረች ነው” የተሰኘው የ5 ኪሎ ሜትር የጎዳና ላይ ሩጫ በሺዎች የሚቆጠሩ ዜጎች በተገኙበት በአዲስ አበባ ከተማ እየተካሄደ ነው።

ይህ ሕዝባዊ መድረክ በዋናነት በቅርቡ በሚካሄደው ሀገራዊ የምክክር ጉባዔ ላይ ማኅበረሰቡ ያለውን የዜግነትና የባለቤትነት ኃላፊነት ለማስታወስ ታስቦ የተሰናዳ መሆኑ ተገልጿል።

የኮሚሽኑ ዋና ኮሚሽነር ፕሮፌሰር መስፍን አርአያ ላለፉት አራት ዓመታት በአገሪቱ ውስጥ ለረዥም ዘመናት ዘልቀው የቆዩ እና ሕዝባዊ ትስስርን ሲፈታተኑ የነበሩ መሠረታዊ ልዩነቶችን በዘላቂነት ለመፍታት የሚያስችሉ በርካታ ስትራቴጂካዊ ተግባራትን በቁርጠኝነት ሲያከናውን መቆየቱን አስታውሰዋል።

ዋና ኮሚሽነሩ አክለውም ከመላው የአገሪቱ ክፍሎች የተወጣጡ አራት ሺህ ዜጎች ቁልፍ አገራዊ አጀንዳዎችን በጥንቃቄ በመለየት፣ መጪው ሐምሌ 8 ቀን ለሚጀመረው ታሪካዊ አገራዊ የምክክር ጉባኤ አስፈላጊውን ቅድመ-ዝግጅት ሙሉ በሙሉ ማጠናቀቃቸውን ይፋ አድርገዋል።

የሕብረተሰቡን ልዩ ልዩ የዕድሜና የሥራ ዘርፎች ያካተተውና በተለይም ሴቶች፣ ወጣቶች እንዲሁም የተለያዩ ባለድርሻ አካላት በነቂስ የተሳተፉበት ይህ የጎዳና ላይ ሩጫ፣ አገራዊ የምክክር ሂደቱ የሚፈልገውን ሕዝባዊ መነቃቃትና ድጋፍ በከፍተኛ ደረጃ ለማሳየት የቻለ መድረክ ነው።