ጠቅላይ ሚኒስትር ዐቢይ አሕመድ (ዶ/ር) የደብረ ማርቆስ አውሮፕላን ማረፊያን በመረቁበት ወቅት የሀገራችንን ወቅታዊ ሁኔታ የተመለከተ መልዕክት አስተላልፈዋል፡፡

መልዕክታቸውም ከመሠረተ ልማት ግንባታ ባለፈ ጥልቅ ሀገራዊ የሰላም እና የአንድነት ጥሪን ያዘለ ነው።

መልዕክቱ የልማት ፕሮጀክቶችን ከማኅበራዊ እና ፖለቲካዊ ትስስር ጋር በማቆራኘት ጠንካራ ሀገረ መንግሥት የመገንባትን አጠቃላይ ራዕይ የሚያንጸባርቅ ነው።

ጠቅላይ ሚኒስትሩ የደብረ ማርቆስን አውሮፕላን ማረፊያ እንደ አንድ የተነጠለ ፕሮጀክት ብቻ ሳይሆን በመላው ሀገራችን እየተከናወነ ያለውን የፍትሃዊ ልማት ስርጭት ማሳያ አድርገው አቅርበውታል።

የደብረ ማርቆስን ታሪካዊ ፋይዳ እንደ ቀድሞ የቴሌፎን፣ የቴሌግራፍ እና የትምህርት ማዕከልነቷ በማስታወስ፣ በአሁኑ ጊዜ ይህንን የልማት ቁመና ወደ ቀደመው ክብሩ ለመመለስ መንግሥት በትኩረት እየሠራ መሆኑን ገልጸዋል።

ልማት በጥቂት ማዕከላት ብቻ ሳይወሰን ወደ ሁሉም ክልሎች እና መስመሮች እንዲሰፋ መደረጉ መንግሥት የልማትን ተደራሽነት ለማረጋገጥ ያለውን ጽኑ ቁርጠኝነት ያሳያል።

የአውሮፕላን ማረፊያው መገንባት የዜጎችን የመንቀሳቀስ ነፃነት ከማሳደጉም ባሻገር፣ ከኢኮኖሚያዊ ትስስር አንጻር የክልሉን ማኅበረሰብ ከሀገራዊው ኢኮኖሚያዊ ሥርዓት ጋር ይበልጥ ለማስተሳሰር የሚደረግ ጥረት አካል ነው።

ጠቅላይ ሚኒስትሩ ባስተላለፉት የትብብር መልዕክት ደብረ ማርቆስን ለሀገራዊ አንድነት ማሳያ የተጠቀሙበት መንገድ እጅግ አስተማሪ ነው።

ደብረ ማርቆስን ታሪካዊት "የልብ ድልድይ" በማለት የጠሯት ሲሆን፣ ወሎን ከወለጋ እንዲሁም ሌሎች የሀገራችን ክፍሎች በንግድ እና በባህል ስታስተሳሰር የኖረች የኢትዮጵያዊነት ተምሳሌት መሆኗን አስምረውበታል።

በአሁኑ ወቅት በተለያዩ አካባቢዎች የሚስተዋሉ መቃቃሮች እና በልዩነቶች ላይ ብቻ ያተኮሩ ትርክቶች የማኅበረሰቡን ጥብቅ ቤተሰባዊ ትስስርን ጭምር እየፈተኑ ናቸው።

በመሆኑም ልዩነቶችን ወደ ጎን በመተው መለያየትን በሚሰብኩ አፍራሽ መንገዶች ፈንታ ችግሮቻችንን በውይይት፣ በመቻቻል እና በጋራ ልማት መፍታት የዘመኑ ጥያቄ መሆኑን ጠቅላይ ሚኒስትሩ አሳስበዋል።

ግጭት እና አለመግባባት የጋራ እጣ ፈንታችንን እንደሚያጨልሙት ሁሉ፣ ሰላም እና ትብብር ደግሞ ለሁላችንም የምትበቃ የበለጸገች ሀገር ለመገንባት ብቸኛው መንገድ ነው።

ሰላም በሌለበት አካባቢ ልማት ሊታሰብ እንደማይችል እና በግጭት ውስጥ ያለ ማኅበረሰብ የሚፈልገውን ዕድገት ሊጎናጸፍ እንደማይችል በጽኑ ተነስቷል።

ይህ በየትኛውም የኢትዮጵያ ክፍል የሚታይ የጋራ ፈተና በመሆኑ፣ የደብረ ማርቆስ እና የአካባቢው ነዋሪዎች እንደ ታሪክ አርአያነታቸው ለሌሎች የሀገራችን ክፍሎች የመቻቻል፣ የመደማመጥ እና የአብሮነት ትምህርት ሊሆኑ እንደሚገባ ጥሪ ቀርቧል።

ጠቅላይ ሚኒስትሩ የልማትን ሂደት "እንቁላልና ጫጩት" በሚል ምሳሌ የገለጹት ሀሳብ ትልቅ መልዕክት አለው።

ልማት በአንድ ጀምበር የሚመጣ ሳይሆን የጊዜ፣ የጥረት፣ የትብብር እና የመተማመን ፍሬ ነው።

መንግሥት የጀመራቸውን የልማት ሥራዎች ከዳር ለማድረስ የሕዝቡ ትዕግሥት እና ንቁ ድጋፍ ወሳኝ ነው።

የልማቱ ፍሬ ለሁሉም ዜጋ በእኩል የሚተርፍ መሆኑን በመገንዘብ፣ የደብረ ማርቆስ አውሮፕላን ማረፊያ ከመሠረተ ልማትነቱ ባሻገር ሁላችንም ተቀራርበን እና ተደማምጠን ለቀጣዩ ትውልድ የተሻለች ሀገር እንድንገነባ የሚያነሳሳን የጋራ ተስፋችን ምልክት ሊሆን ይገባል።

በለሚ ታደሰ