በዘመናዊው ዓለም የሀገራት ዕድገት የሚለካው በጥራት በጎለበተው የሰው ኃይላቸው ሲሆን፣ በሕፃናት ቀዳማይ ልጅነት ዕድገት እና እንክብካቤ ላይ የሚደረግ ኢንቨስትመንት ለሀገር ዘላቂ ልማት ወሳኝ መሠረት ነው።

በኖቤል ተሸላሚው የምጣኔ ሀብት ተመራማሪ ጄምስ ሄክማን እና በዓለም ባንክ የተካሄዱ ጥናቶች እንደሚጠቁሙት፣ ከ0 እስከ 6 ዓመት ባለው የሕፃናት ዕድሜ ላይ የሚወጣ 1 ዶላር ወደፊት ለሀገር ኢኮኖሚ ከ7 እስከ 13 ዶላር የሚደርስ ምርታማነትን ያስገኛል።

የሰው ልጅ የአዕምሮ ሕዋሳት 90 በመቶ የሚሆነው የሚገነባው ዕድሜው ከ5 ዓመት በታች እያለ በመሆኑ፣ በዚህ ወቅት የሚደረግ የተመጣጠነ ምግብ አቅርቦት እና የትምህርት ማነቃቂያ የሕፃናትን የመማር እና የማሰላሰል አቅም በከፍተኛ ደረጃ ይወስነዋል።

ይህን ዓለም አቀፍ ሳይንሳዊ እውነታ በተግባር በመተርጎም መዲናችን አዲስ አበባ አርአያነት ያለው ሀገራዊ ስኬት ያስመዘገበች ሲሆን፣ የተስፋፉት የሕፃናት ማቆያ ማዕከላት እና የትምህርት ቤት የምገባ መርሐ ግብሮች የዚሁ አርቆ አሳቢነት ማሳያ ናቸው።

በዋና ከተማችን በስፋት የተገነቡት የሕፃናት ማቆያዎች እናቶች በተረጋጋ መንፈስ ወደ መደበኛ የኢኮኖሚ እንቅስቃሴ እንዲቀላቀሉ በማድረግ የሴቶችን ገቢ ከመገንባታቸው በላይ ሀገራዊ ጥቅል ምርትን እያሳደጉት ይገኛሉ።

ከዚሁ ጎን ለጎን ሕፃናት በተፈጥሯዊ የቤተሰብ ፍቅር እንዲያድጉ ማድረግ እና ተቋማዊ እንክብካቤዎችን እንደ መጨረሻ አማራጭ መጠቀም ዓለም አቀፍ የሕፃናት ጥበቃ ደረጃዎችን የተከተለ ዘመናዊ አሠራር ነው።

እነዚህን በአዲስ አበባ እና በሀገራችን የተጀመሩ የሕፃናት ልማት ሥራዎች የበለጠ ውጤታማ ለማድረግ የማዕከላቱን ንጽሕና እና የሠራተኞችን ሙያዊ ብቃት ማረጋገጥ፣ እንዲሁም የግል ባለሀብቶች እና አጋር አካላትን ጥምረት በማጠናከር ተዳራሽነቱን ማሳደግ አስፈላጊ ነው።

በሕፃናት ላይ ዛሬ የሚደረግ ማንኛውም ዓይነት የጤና፣ የምግብ እና የትምህርት ኢንቨስትመንት የበጎ አድራጎት ሥራ ብቻ ሳይሆን፣ የነገዋን ተወዳዳሪ፣ በፈጠራ የበለጸገች እና በጽኑ መሠረት ላይ የተገነባች ኢትዮጵያን የማረጋገጥ ትልቅ ውሳኔ ነው።

በሰለሞን ገዳ