በዘመናዊው ዓለም የሀገራት ሉዓላዊነትና ብሔራዊ ጥቅም የሚከበረው በዲፕሎማሲያዊ ጥረት ብቻ ሳይሆን፣ ያንን ዲፕሎማሲ ሊያስከብር በሚችል የማይደፈር ወታደራዊ አቅም ጭምር ነው።

የዓለም አቀፍ ግንኙነትና የደህንነት ሊቃውንት እንደሚስማሙበት፣ ሰላምን በዘላቂነት ለማረጋገጥና ማንኛውንም ሉዓላዊነትን የሚፈታተን ትንኮሳ ገና ከጅምሩ ለማምከን (Deterrence) ወይም ጥቃትን ቀድሞ የማስቀረት ስትራቴጂካዊ አቅም መገንባት የግድ ይላል።

ኢትዮጵያም ይህንኑ መርህ በተግባር የሚያረጋግጥና በአፍሪካ ቀንድ እንዲሁም ከሰሃራ በታች ባለው ቀጣና የኃይል ሚዛኑን መሰረታዊ በሆነ መልኩ የሚቀይር ታሪካዊ እርምጃ ወስዳለች።

የኢፌዲሪ ጠቅላይ ሚኒስትር ዐቢይ አሕመድ (ዶ/ር) ይፋ እንዳደረጉት ኢትዮጵያ ከሩሲያ መንግሥት ጋር በደረሰችው ስምምነት መሰረት የመጀመሪያዎቹን አስራ ሁለት የሱ-35 (Su-35 4++ Generation) የጦር ጄቶች የተረከበች ሲሆን፣ በተጨማሪም አራት የኤስ-400 (S-400) የአየር መከላከያ ሥርዓት ባትሪዎችን ትረከባለች።

ይህ ወታደራዊ ስኬት እንደ ተራ የጦር መሳሪያ ግዥ ብቻ የሚታይ ሳይሆን፣ የኢትዮጵያን የመከላከያ እሳቤ ወደ ላቀ ስትራቴጂካዊ ደረጃ ያሸጋገረ ነው። ጠቅላይ ሚኒስትሩ፣  ኢትዮጵያ በመከላከያ ኃይል እያደረገች ያለው ዝግጁነት ጥቃትን ቀድሞ ማስቀረት የሚያስችላትን አቅም እያላበሳት ነው ሲሉ የገለጹት ነጥብ የዘመናዊ ወታደራዊ ሳይንስን ቁልፍ ሚስጥር ይይዛል።

እውቁ የስትራቴጂ ምሁር ቶማስ ሼሊንግ በዲቴራንስ ንድፈ-ሀሳብ ትንታኔያቸው እንዳስቀመጡት፣ የወታደራዊ አቅም ትልቁ ስኬት መዋጋቱ ሳይሆን ጠላት ጥቃት ለመሰንዘር ሲያስብ የሚጠብቀው የአጸፋ ምትና የሚከፍለው ዋጋ ከሚያገኘው ትርፍ እጅግ የከፋ መሆኑን አስቀድሞ እንዲረዳ በማድረግ ከድርጊቱ እንዲታቀብ ማስገደዱ ላይ ነው።

ታዋቂው የጦር ስትራቴጂስት ሱን (Sun Tzu) "የጦር ጥበብ የመጨረሻው ልዕልና ጠላትን ያለ ውጊያ ማንበርከክ ነው" እንዳለው፣ ጦርነትን ከመጀመሩ በፊት በሥነ-ልቦና እና በቴክኖሎጂ የበላይነት ማሸነፍ የዚህ ትጥቅ ዋነኛ ግብ ነው።

ዛሬ ኢትዮጵያ የተረከበቻቸው የሱ-35 የጦር ጄቶች በ4ኛ++ ትውልድ የሚመደቡና የአምስተኛ ትውልድ ቴክኖሎጂን የተላበሱ ዘመናዊ የውጊያ አውሮፕላኖች ናቸው። አውሮፕላኑ የተገጠመለት "Irbis-E" ራዳር እስከ 400 ኪሎ ሜትር ርቀት ላይ የሚገኙ የጠላት ዒላማዎችን አስቀድሞ የመለየት፣ በአንድ ጊዜ 30 የአየር ላይ ዒላማዎችን የመከታተልና 8ቱን በአንድ ጊዜ የመምታት አቅም አለው።

በሰዓት እስከ 2ሺህ 400 ኪሎ ሜትር በሚደርስ ፍጥነት የሚበረው ይህ ጄት፣ ያለ ነዳጅ መሙያ እስከ 3 ሺህ 600 ኪሎ ሜትር ይጓዛል። በተጨማሪም ሞተሩ አቅጣጫውን በየትኛውም አንግል ማዞር የሚያስችል (Thrust-Vectoring) በመሆኑ፣ በአየር ላይ ውጊያ ወደር የለሽ የመገለባበጥ ብቃት እና 8 ቶን የሚመዝኑ ዘመናዊ ሚሳኤሎችንና ቦምቦችን የመሸከም አቅም አለው።

ኢትዮጵያ እነዚህን ጄቶች በመታጠቅ ከሰሃራ በታች ባሉ የአፍሪካ ሀገራት ቀዳሚ መሆኗ፣ ማንኛውንም ስጋት በእንጭጩ የመቅጨትና ፍጹም የሆነ የሰማይ ላይ የበላይነትን ያጎናጽፋታል። ይህንን የማጥቃት እና የመከላከል አቅም ይበልጥ የሚያሟላው ደግሞ የኤስ-400 (S-400 Triumf) የአየር መከላከያ ሥርዓት ነው።

የዓለም አቀፍ ጥናቶች እንደሚያመለክቱት ኤስ-400 በዓለም ላይ ካሉ እጅግ ምርጥ የአየር መከላከያ ቴክኖሎጂዎች ግንባር ቀደም ነው። የሥርዓቱ ራዳር እስከ 600 ኪሎ ሜትር ርቀት የመቃኘት አቅም ያለው ሲሆን፣ እስከ 400 ኪሎ ሜትር ርቀት እና እስከ 30 ኪሎ ሜትር ከፍታ ድረስ የሚመጡ ስውር የጠላት አውሮፕላኖችን፣ ክሩዝ እና ባለስቲክ ሚሳኤሎችን እንዲሁም ሰው አልባ አውሮፕላኖችን (Drones) በአየር ላይ የማምከን ብቃት አለው።

 አስራ ሁለቱ የሱ-35 ጄቶች ከአራቱ የኤስ-400 ባትሪዎች ጋር ሲቀናጁ፣ በወታደራዊ ሳይንስ የማይደፈር የአየር ክልል ይፈጥራሉ። ይህም እንደ ታላቁ የኢትዮጵያ ሕዳሴ ግድብ ያሉ ብሔራዊ የልማት ተቋማትን፣ የኢኮኖሚ አውታሮችንና ሀገራችንን ከማንኛውም የአየር ጥቃት በአስተማማኝ ሁኔታ ለመጠበቅ ያስችላል።

ከዚህ ጎን ለጎን የጦር ጄቶቹ ከተያዘላቸው የጊዜ ሰሌዳ አንድ ዓመት አስቀድመው መድረሳቸው፣ የኢትዮጵያን የዲፕሎማሲ ጥንካሬ እና ከሩሲያ ጋር ያላትን ስትራቴጂካዊ አጋርነት ጥልቀት ያመላክታል። ኢትዮጵያ ከዚህ ቀደም የሱ-27 (Su-27) ተዋጊ ጄቶችን በመታጠቅና በአፍሪካ ቀንድ የአየር የበላይነትን በማስጠበቅ የካበተ ልምድ ያላት ሀገር መሆኗ፣ አብራሪዎቿና መሐንዲሶቿ አዲሱን የሱ-35 ቴክኖሎጂ በፍጥነት ተላምደው ወደ ስምሪት እንዲገቡ ትልቅ መደላድል ይፈጥራል።

ጠቅላይ ሚኒስትር ዐቢይ አሕመድ (ዶ/ር) ለፕሬዝዳንት ቭላድሚር ፑቲን ያቀረቡት ምስጋና፣ ወታደራዊ አቅም ግንባታው ከጠንካራ የውጭ ግንኙነትና የመሪዎች መተማመን ጋር የተሳሰረ መሆኑን ያሳያል። በዓለም አቀፍ የጦር መሳሪያ ገበያ ላይ ከፍተኛ የአቅርቦት ውጥረትና ውስብስብ ጂኦ-ፖለቲካዊ ጫናዎች ባሉበት በዚህ ወቅት፣ እንዲህ ያሉ ስትራቴጂካዊ መሳሪያዎችን ከቀነ ገደቡ ቀድሞ መረከብ በራሱ ትልቅ ዲፕሎማሲያዊ ድል ነው።

በአጠቃላይ ይህ ታሪካዊ እርምጃ የኢትዮጵያን ሉዓላዊነት በማይነቃነቅ መሰረት ላይ የሚያቆም ነው። በጂኦ-ፖለቲካዊ እይታም፣ በአፍሪካ ቀንድና በቀይ ባሕር አካባቢ የሚስተዋለውን የኃይል ፉክክር ለመመከት እንዲህ ያለው ስትራቴጂካዊ ጡንቻ ወሳኝ ነው።

ኢትዮጵያ ያላት ወታደራዊ የበላይነት በቀጣናው ሊፈጠሩ የሚችሉ የውክልና ጦርነቶችንና ትርምሶችን በማስቀረት፣ ለጋራ ደህንነትና ለቀጣናዊ መረጋጋት የማዕዘን ድንጋይ ይሆናል። ሀገራችን የጀመረችውን ሁለንተናዊ የብልጽግና ጉዞ በልበ ሙሉነት እንድትቀጥል፣ ሰማይዋ የታጠረ፣ ምድሯም የተከበረ መሆኑን ይህ አዲስ ምዕራፍ በተግባር አረጋግጧል።

በበረከት ሽመልስ