የሀገራችንን ታሪክ ጠብቆ፣ ሕዝብን አክብሮ፣ ሉዓላዊነቷን እና ዳር ድንበሯን ለማስከበር በጽናት የቆመው የኢትዮጵያ መከላከያ ሠራዊት፣ ከዘመን ዘመን የተሻገረ የጀግንነትና የአይበገሬነት ተምሳሌት ነው።

የሀገራችን ሉዓላዊነትን በማስከበር፣ በሰላም ማስከበር ተልዕኮዎች በመሳተፍ እና በየዘመኑ የሚለዋወጡ የጸጥታ ፈተናዎችን በመጋፈጥ የሀገራችንን ክብር ከፍ ለማድረግ የተጫወተው ሚና የጎላ ነው።

በዘመናዊው ዓለም የጦርነት ስልቶችና የጸጥታ ስጋቶች እየተለዋወጡ በመምጣታቸው፣ የመከላከያ አቅምን በሰው ኃይል፣ በወታደራዊ ሳይንስ እና በዘመናዊ ቴክኖሎጂ ማጠናከር ወሳኝ ሆኗል።

ጠቅላይ ሚኒስትር ዐቢይ አሕመድ (ዶ/ር) ሀገራችን በቀጣናው የአየር የበላይነትን ለመፍጠር የሚያስችል አቅም ከመገንባት ባለፈ፣ በማንኛውም የጸጥታ ሁኔታ ለመሰማራት የሚችል፣ ዝግጁ፣ ብቁና ዘመናዊ ሠራዊት ለማደራጀት እየሠራች እንደምትገኝ ገልጸዋል።

በዚህም የሀገራችን መከላከያ ሠራዊት የሰው አልባ አውሮፕላኖችን፣ ሰው ሠራሽ አስተውሎትን፣ የሳይበር ደኅንነትን እና ሌሎች ዘመናዊ የቴክኖሎጂ ዘርፎችን በመጠቀም አቅሙን ለማሳደግ የሚደረጉ ጥረቶች ትኩረት እያገኙ ነው።

የሠራዊቱን ብቃት ለማሳደግ የሰው ኃይል ልማትና የሙያ ሥልጠና ወሳኝ ሚና አላቸው። በወታደራዊ ሳይንስ፣ በአመራር፣ በውጊያ ዝግጁነት እና በልዩ ተልዕኮዎች ላይ የሚሰጡ ሥልጠናዎች ሠራዊቱ የዘመኑን የጸጥታ ተግዳሮቶች በብቃት እንዲጋፈጥ የሚያግዙ መሠረታዊ ግብዓቶች ናቸው።

በተመሳሳይ የመከላከያ ኢንዱስትሪን ማጠናከር እና ወታደራዊ ቁሳቁስን በሀገር ውስጥ የማምረት አቅምን ማሳደግ የሀገራችንን የመከላከል አቅም ለማረጋገጥ አስፈላጊ ነው።

የድሮን ቴክኖሎጂ፣ የጦር መሳሪያ ጥገና፣ የተሽከርካሪዎች ማምረት እና መገጣጠም እንዲሁም የተለያዩ ወታደራዊ መሣሪያዎችን በሀገር ውስጥ ለማምረት የሚደረጉ ጥረቶች የውጭ ጥገኝነትን ለመቀነስና የሀገራችንን የቴክኖሎጂ አቅም ለማሳደግ ያላቸው ፋይዳ ከፍተኛ ነው።

ጠቅላይ ሚኒስትር ዐቢይ አሕመድ (ዶ/ር) ቀይ ቦኔት የለበሱ፣ ከአየር በፍጥነት የሚወርዱ ልዩ የአየር ወለድ ኃይሎች በአንድ ክንፍ ዓላማን፣ በሌላው ደግሞ ዲሲፕሊንን አንግበው የሚንቀሳቀሱ፣ ውጊያን የሚያስቀሩና ከተከሰተም በብቃት የሚያጠናቅቁ ጀግኖች መሆናቸውን መግለጻቸው ይታወሳል።

እነዚህ የሀገራችን ጀግኖች በተለያዩ ልዩ ወታደራዊ ተልዕኮዎች ላይ ለመሰማራት የሚያስፈልጋቸው ዝግጁነትና ሙያዊ ብቃት የሠራዊቱን የሰው ኃይል አቅም ከሚያጎለብቱ መሠረታዊ ጉዳዮች መካከል ዋነኞቹ ናቸው።

የሀገራችን መከላከያ ሠራዊት ከፖለቲካ ገለልተኛ ሆኖ ለሕገ መንግሥቱ፣ ለሀገራዊ ሉዓላዊነት እና ለሕዝብ ደኅንነት የሚቆም ብሔራዊ ተቋም መሆኑ የሚጠበቅበት መሠረታዊ ኃላፊነት ነው። የሠራዊቱ ዘመናዊነት ከትጥቅና ከቴክኖሎጂ በተጨማሪ በሙያዊ ሥነ-ምግባር፣ በሕግ ተገዢነትና በሕዝብ አገልግሎት መርሆዎች ላይ መመሥረት ይጠይቃል።

የሀገራችንን የመከላከል አቅም ማጠናከር የዛሬን የጸጥታ ስጋቶች ለመቋቋም ብቻ ሳይሆን፣ ለመጪው ትውልድ የተረጋጋች፣ ሉዓላዊነቷ የተከበረ እና በራሷ አቅም የምትተማመን ሀገር ለማስረከብ ወሳኝ ነው። ይህም በሰው ኃይል ልማት፣ በሳይንስና ቴክኖሎጂ፣ በሀገር ውስጥ ምርትና በተቋማዊ ብቃት ላይ የሚደረገውን ጥረት በቀጣይነት ማጠናከርን ይጠይቃል።

በኢንቲሃድ አብራር