ኢትዮጵያ የጠቅላላ ሀገራዊ ምርት (GDP) የዲጂታል ኢኮኖሚ መሠረቷንና የመነሻ ዓመቷን በማሻሻል የአህጉራችን 5ኛዋ ግዙፍ ኢኮኖሚ መሆኗ ተረጋግጧል።

በብሔራዊ ስትራቴጂ ሚኒስትር ፍጹም አሰፋ (ዶ/ር) ይፋ በተደረገው መረጃ መሠረት በሐምሌ ወር በተጠናቀቀው የሒሳብ ዓመት የኢትዮጵያ ጠቅላላ ሀገራዊ ምርት 210.7 ቢሊዮን የአሜሪካ ዶላር ደርሷል።

በ2017 ዓ.ም (2024/25) መነሻ ዓመት ስሌት መሠረት የኢኮኖሚው መጠን 201.4 ቢሊዮን ዶላር ደርሶ የተመዘገበ ሲሆን ይህም ከቀድሞው ግምት ጋር ሲነፃፀር የ59 በመቶ ዕድገት አሳይቷል።

ይህ መዋቅራዊ የኢኮኖሚክስ ማሻሻያ (GDP Rebasing) ኢትዮጵያ ከተሰጣት የተዘጋጀ ቀመር ውጪ የራሷን የልማት አቅጣጫና እውነተኛ የሀብት ፍሰት በራሷ ጥናትና ዲዛይን በመቅረፅ የምትሠራ ሀገር መሆኗን ያሳያል።

ቀደም ሲል ጥቅም ላይ ይውል የነበረው የ2008 ዓ.ም (2015/16) የመነሻ ዓመት ስሌት በኢኮኖሚው ውስጥ የተፈጠሩ አዳዲስ መዋቅራዊ ለውጦችን የዘርፎችን መስፋፋት እንዲሁም እንደ ዲጂታል ፋይናንስ እና አገልግሎቶች ያሉ አዳዲስ የኢኮኖሚ እንቅስቃሴዎችን በበቂ ሁኔታ የማያንፀባርቅ ነበር።

የተሻሻለው አዲሱ የመረጃ ሥርዓት በቅርቡ የተካሄደውን የግብርና ቆጠራ የቤተሰብ ጥናቶችን እንዲሁም ለመጀመሪያ ጊዜ የመንግሥት የልማት ድርጅቶችና የሰብዓዊ (ትርፍ-አልባ ተቋማትን) ዲጂታል ኢኮኖሚ ያካተተ ነው።

በዚህም መሠረት የአፍሪካ ግዙፉ አየር መንገድ የኢትዮጵያ አየር መንገድ አስተዋፅኦ የሚገኝበት የአገልግሎት ዘርፍ 36 በመቶ ድርሻ በመያዝ የመጀመሪያውን ደረጃ ሲይዝ ግብርና በ32 በመቶ እንዲሁም ኢንዱስትሪ በ30 በመቶ ድርሻ ይከተላሉ።

ከማክሮ ኢኮኖሚክስ እና ከፖሊሲ አንፃር ይህ የስሌት ማሻሻያ በርካታ መሠረታዊ አንድምታዎች አሉት። የጂዲፒ ስሌቱ ማደግ የኢትዮጵያን የብድር እና የጂዲፒ ጥምርታ (Debt-to-GDP Ratio) በቁጥር ደረጃ እንዲቀንስ ያደርገዋል።

እንደ ኦክስፎርድ ኢኮኖሚክስ ትንታኔ ይህም ኢትዮጵያ በጂ-20 የጋራ ማዕቀፍ (G20 Common Framework) ሥር የምታካሂደውን የብድር ሽግሽግና ድርድር አወንታዊ የፋይናንስ ዘላቂነት አመልካች ይሰጠዋል።

ሆኖም የኦክስፎርድ ኢኮኖሚክስ ኢኮኖሚስት አሌክሳንደር ቬንተር እንዳመለከቱት የሕጋዊ ቁጥር ስሌቱ የብድር ጥምርታን በመቀንስ የሚከፈለው የብድር መጠን የብድር አገልግሎት ወጪ እና የውጭ ምንዛሪ ፍላጎት ግን መሬት ላይ እንዳለ ይቆያል።

ኢትዮጵያ በያዘችው የሒሳብ ዓመት የ10.2 በመቶ የኢኮኖሚ ዕድገት ታስመዘግባለች ተብሎ የሚጠበቅ ሲሆን ይህም የቴሌኮምና የባንክ ዘርፎችን ለውጭ ኢንቨስትመንት ክፍት ማድረግንና በዓለም አቀፍ የገንዘብ ድርጅት (IMF) የሚደገፈውን ነፃ የውጭ ምንዛሪ ተመን ማሻሻያን ያካተተ ነው።

የኢትዮጵያን አሁናዊ የኢኮኖሚ መጠን መዋቅራዊ ሽግግር እና ከዓለም አቀፍ አበዳሪዎች ጋር ያለውን ድርድር እውነተኛ ገጽታ ያሳያል።

በጌቱ ላቀው