አሜሪካ የራሷን ዘር-ተኮር እና የፍትህ መጓደል ታሪክ ያላስተካከለች ሀገር እንደመሆኗ መጠን የደቡብ አፍሪካን የሰብዓዊ መብት አያያዝ ትወቅሳለች።
ይሁንና ብዙዎች ይህንን ትችት ለፖለቲካዊ ፍጆታ እንጂ ለሰብዓዊ መብት መከበር ካለው እውነተኛ ፍላጎት የመነጨ አይደለም ሲሉ ይከራከራሉ።
የተባበሩት መንግሥታት ድርጅት የደቡብ አፍሪካን የመሬት ማሻሻያ አድናቆትን ገልጿል።
ይህም ለዘመናት የቆየውን ዘር-ተኮር የመሬት ይዞታ አለመመጣጠን ለማስተካከል የተወሰደ ወሳኝ እርምጃ መሆኑን አብራርቷል።
በተቃራኒው የአሜሪካ የውጭ ጉዳይ ሚኒስቴር ሪፖርት ደቡብ አፍሪካ ላይ የሰብዓዊ መብት ረገጣ፣ አድልዎ እና “አናሳ ዘርን ማሳደድ” የሚሉ ከባድ ክሶችን አቅርቧል።
እነዚህ ክሶች በደቡብ አፍሪካ መንግሥት ዘንድ “የተሳሳቱ እና ያልተፈተሸ መረጃ” ላይ የተመሰረቱ ናቸው በሚል በብርቱ ተቃውሞ ገጥሟቸዋል።
የፖለቲካ ተንታኝ የሆኑት ኢብራሂም ፋኪር የአሜሪካን ትችት በተሳሳተ መረጃ ላይ የተመሰረተ ነው ሲሉ አጣጥለውታል። ትችቱ የፖለቲካ አጀንዳን ለማስፈጸም እንደ መሳሪያ ያገለግላል ብለው ያምናሉ።
በተለይ ደግሞ አሜሪካ በእስራኤል እና ፍልስጤም መካከል ባለው ግጭት ላይ ካለው የደቡብ አፍሪካ አቋም ጋር የተያያዘ መሆኑን ይጠቅሳሉ።
ታዋቂው የሰብዓዊ መብት ተሟጋች ሻብናም ፓሌሳ ሞሃመድ ደግሞ ሁለቱንም ሀገራት በስርአታዊ የፍትህ መጓደል ላይ ያተኮረ ትችት አቅርበዋል።
እሳቸው ለሁለቱም ሀገራት መፍትሄ የሚሆነው ፍትሃዊ ስርዓትን በመዘርጋት ለሁሉም ዜጎች መብት ማስጠበቅ ሲሆን፣ ራሷ ያልተስተካከለ ታሪክ ያላት ሀገር ሌላኛዋን መውቀሷ ተገቢ አይደለም ይላሉ።
በሰለሞን ገዳ
