የአንድ ሀገር ህልውና የሚለካው በድንበሩ ርዝመት ብቻ ሳይሆን፣ ያንን ድንበር በሚጠብቀው ሠራዊት ጽናት፣ ዘመናዊነትና ገለልተኝነት ነው። ባለፉት ስምንት ዓመታት የኢትዮጵያ መከላከያ ሠራዊት ከአንድ የፖለቲካ ሥርዓት ጠባቂነት ተላቆ፣ የሀገራዊ ሉዓላዊነት ጽኑ ዓምድ ለመሆን ያደረገው ጉዞ አዲስ የታሪክ ምዕራፍ የከፈተ ድንቅ ክስተት ነው። ይህ ሽግግር ተቋሙን ከፖለቲካዊ ወገንተኝነት ነጻ በማድረግ፣ ለሕገ-መንግሥታዊ ሥርዓቱ ብቻ የሚገዛ ብሔራዊና ፕሮፌሽናል የጦር ኃይል እንዲሆን መሠረት ጥሏል።

ባለፉት ስምንት ዓመታት በኢትዮጵያ መከላከያ ሠራዊት ውስጥ የታዩት መሠረታዊ እና ሁለንተናዊ ለውጦች ተቋሙን ከፖለቲካዊ ወገንተኝነት ነጻ በማድረግ ወደ ብሔራዊ እና ፕሮፌሽናል የጦር ኃይልነት የቀየሩ ናቸው።

ከመጋቢት 2010 ዓ.ም ጀምሮ የተካሄደው ይህ ጥልቅ ለውጥ ሠራዊቱ ከፖለቲካዊ ወገንተኝነት ወጥቶ ለሕገ መንግሥቱ እና ለሕዝብ ሉዓላዊነት ብቻ የሚቆም ብሔራዊ ተቋም እንዲሆን መሠረት ጥሏል። በተለይ ሠራዊቱ ከፖለቲካ ፓርቲዎች ተጽዕኖ ነጻ ሆኖ ለሕዝብ እና ለሕገ መንግሥት ብቻ ታማኝ እንዲሆን የሚደነግገው የመከላከያ አዋጅ ቁጥር 1286/2015 በሕግ ደረጃ እንዲጸና አድርጓል። ይህም ከዚያ ቀደም ሠራዊቱን የአንድ ሥርዓት ጠባቂ የሚያደርገውን አሠራር የሻረ ነው።

የጦር ኃይሎች ጠቅላይ አዛዥ ጠቅላይ ሚኒስትር ዐቢይ አሕመድ (ዶ/ር) እና መንግስታቸው ተቋሙን ለመገንባት የተከተሉት ስትራቴጂካዊ አመራር የሀገራችንን መከላከያ ከምድር እስከ አየር ሐይል እንዲሁም ከሳይበር እስከ ባሕር ድረስ ያለውን የጥበቃ አድማስ ያስፋፋ እና የኢትዮጵያን ብሔራዊ ክብር ከፍ ያደረገ ሆኗል።

ጠቅላይ ሚኒስትሩ ራሳቸው በመከላከያ ውስጥ ካላቸው ጥልቅ ወታደራዊ ልምድ በመነሳት ለሠራዊቱ የሰጡት አመራር ልዩና የታሪክ አሻራ ያረፈበት ነው። በተለይም በሀገራችን ላይ የተደቀነውን የህልውና አደጋ ለመቀልበስ በግንባር ተገኝተው ሠራዊቱን መምራታቸው ለተዋጊው ኃይል የማይታጠፍ ወኔን የሰጠና የኢትዮጵያዊነትን የጀግንነት ታሪክ በአዲስ መልክ የጻፈ ተግባር ነበር።

ጠቅላይ ሚኒስትሩ በወቅቱ "እኛ መሞት የምንፈልገው ኢትዮጵያ እንድትኖር ነው" በማለት ያስተላለፉት መልእክት የሠራዊቱን የውጊያ ሥነ ልቦና በእጅጉ ከፍ ከማድረጉም በላይ መሪና ተመሪ ለአንድ ዓላማ የሚሰውበትን የወንድማማችነት ጥምረት አጠናክሯል። ይህ በግንባር ተገኝቶ የመምራት ቁርጠኝነት የሠራዊቱ አመራርና አባላት ለሀገራችን ሉዓላዊነት ያላቸውን ታማኝነት እንዲያድሱና ለድል እንዲነሳሱ ከፍተኛ አስተዋጽኦ አድርጓል።

የሠራዊቱ አባላት በመለዮአቸው እና በዩኒፎርማቸው እንዲኮሩ የተደረገበት መንገድ ሌላው የሪፎርሙ ትልቅ ስኬት ነው ። የሠራዊቱን ክብር ለመጠበቅና ወታደራዊ ዲሲፕሊንን ለማስፈን አዲስ ወታደራዊ አልባሳት በ2012 ዓ.ም እንዲተዋወቅ ተደርጓል።

ጠቅላይ ሚኒስትሩ በቅርቡ በተከበረው የልዩ ዘመቻዎች ኮማንዶ 65ኛው ዓመት በዓል ላይ እንደገለጹት ቀይ ቦኔት የለበሱት የኢትዮጵያ ጀግኖች "በአንድ ክንፋቸው ዓላማን በሌላኛው ክንፋቸው ደግሞ ዲሲፕሊንን የያዙ" የሀገራችን ልዩ ስጦታዎች ናቸው። አዲሱ የደንብ ልብስ ለውጥ የሠራዊቱን አባላት ወጥነት ያለው ቁመና እንዲኖራቸው ከማድረጉም ባለፈ ዩኒፎርሙን ለወንጀል ተግባር የሚጠቀሙ አካላትን ለመቆጣጠር እንዲቻል ተደርጎ የተቀረጸ ነው።

የሠራዊቱ አባላት በመለዮአቸው ብቻ ሳይሆን በኑሯቸውም ኩራት እንዲሰማቸው ለማድረግ ሰፊ ማሻሻያዎች እየተከናወኑ ናቸው። የሠራዊቱን አባላት የኑሮ ሁኔታ ለማሻሻል የደመወዝ ማሻሻያዎች እና የመኖሪያ ቤት ፕሮጀክቶች ተግባራዊ የተደረጉ ሲሆን፣ እነዚህ ማበረታቻዎች አባላቱ ቤተሰባቸውን አስቀምጠው በተልእኳቸው ላይ ብቻ እንዲያተኩሩ ትልቅ ሞራል ሆነዋል ።

በቴክኖሎጂ እና አቅም ግንባታ ረገድ የኢትዮጵያ መከላከያ ሠራዊት አዲስ ምዕራፍ ላይ ይገኛል። አየር ኃይላችን እስከ 2022 ዓ.ም ድረስ ወደ አምስተኛ ትውልድ ተዋጊ አውሮፕላኖች ለመሸጋገር እና የውጊያ አውሮፕላኖችን ቁጥር በእጥፍ ለማሳደግ እየሠራ ነው። በቅርቡ በቢሾፍቱ በተካሄደው ጥቁር አንበሳ የአየር ትርኢት ላይ የጦር ሃይሎች ጠቅላይ አዛዡ እንደገለጹት አየር ኃይላችን የሀገራችን ጋሻና የኩራት ምንጭ ሆኗል። ከዚህም ባለፈ ሀገራችን የራሷን ድሮኖች በስካይ ዊን (SkyWin) ፋብሪካ በስፋት ማምረት መጀመሯና የሆሚቾ አሙኒሽን ፋብሪካን በማስፋፋት የጦር መሣሪያ ፍላጎቷን በራስ አቅም መሸፈን መቻሏ ስትራቴጂካዊ ነጻነታችንን አረጋግጧል ።

በመከላከያ ሪፎርሙ ውስጥ እጅግ አዲስና ስትራቴጂካዊው ምዕራፍ ሠራዊቱ በሳይበር እና በስፔስ ዘርፍ የተጎናጸፈው የዝግጁነት ደረጃ ነው። ጠቅላይ ሚኒስትር ዐቢይ አሕመድ (ዶ/ር) በሥልጣን ዘመናቸው መጀመሪያ ላይ እንደገለጹት መከላከያ ሠራዊታችን የምድር እና የአየር ኃይልን ብቻ ሳይሆን የሳይበር እና የስፔስ ኃይልንም ያካተተ ዘመናዊ የጦር ክፍል መገንባት እንዳለበት አቅጣጫ አስቀምጠዋል። ይህ ራዕይ በተጨባጭ ወደ ተግባር ተተርጉሞ የሀገራችን የመከላከያ ሳይበር ደኅንነት ፖሊሲ በመከላከያ አዛዥነት እና ስታፍ ኮሌጅ ደረጃ ውይይት ተደርጎበት ወደ ሥራ እንዲገባ ተደርጓል።

ሠራዊቱ በሰው ሠራሽ አስተውሎት (AI) እና የሳይበር መከላከያ ቴክኖሎጂን ከወታደራዊ ምርምርና ልማት ጋር በማቀናጀት ማንኛውንም የማይታይ የጠላት ጥቃት ቀድሞ የመለየትና የማክሸፍ ብቃት እንዲኖረው ተደርጓል። ይህ በሳይበር በኩል የተደረገው ዝግጅት ሀገራችንን በዲጂታል ሉዓላዊነት ረገድ ከጥቃት ከመጠበቁም በላይ የሠራዊቱን የመረጃ የበላይነት በማረጋገጥ ማንኛውንም የውጭ ትንኮሳ በቴክኖሎጂ ለማምከን ያስችለዋል።

ላለፉት ሦስት አሥርተ ዓመታት ፈርሶ የነበረውን የባሕር ኃይል ዳግም በማቋቋም፣ በአዲስ አበባ ዋና መምሪያ ማዕከልና በቢሾፍቱ ዘመናዊ የሥልጠና ማዕከል ተገንብቷል። የባሕር ኃይሉ አባላት የለበሱት ውብ ዩኒፎርም እና ብሔራዊ ምልክቶች በወታደሩ ዘንድ ትልቅ የሥነ ልቦና ልዕልናን ፈጥረዋል። ይህ የባሕር ኃይል ግንባታ በቀጣናው እያደገ የመጣውን የባሕር ላይ ንግድ ፍሰት ደኅንነትና የኢትዮጵያን የረጅም ጊዜ የጂኦ-ፖለቲካዊ ጥቅሞች ለማስጠበቅ ትልቅ መሠረት የሚጥል ነው።

ጠቅላይ ሚኒስትር ዐቢይ አሕመድ (ዶ/ር) እንዳሉት ኢትዮጵያ የሰላም ምንጭ እንጂ የማንም ሀገር ወራሪ ሆና አታውቅም፤ ወደፊትም አትሆንም። ሆኖም ግን የሀገራችንን ብሔራዊ ጥቅም የሚጋፋና ሉዓላዊነታችንን የሚፈታተን ማንኛውም ኃይል ሠራዊቱ በደረሰበት የላቀ የዝግጁነት ደረጃ እና በታጠቀው ዘመናዊ ቴክኖሎጂ ተመጣጣኝና የማያዳግም ምላሽ ለመስጠት በተሟላ ቁመና ላይ ይገኛል።

ይህ በቴክኖሎጂ፣ በሰው ኃይል እና በጠንካራ አመራር የተገነባው የኢትዮጵያ መከላከያ ሠራዊት አሁን ላይ የቀጣናው የሰላም ዋስትናና የማይናወጥ የሀገር ሉዓላዊነት ዓምድ ሆኗል ።

ባጠቃላይ፣ ባለፉት ስምንት ዓመታት የተመዘገቡት እነዚህ ሁለንተናዊ ስኬቶች የሚያረጋግጡት አንድ እውነት አለ፤ እርሱም ሠራዊታችን ዛሬ ላይ የቴክኖሎጂ የበላይነትን የታጠቀ፣ በወታደራዊ ዲሲፕሊን የታነጸና ከፖለቲካ ወገንተኝነት የጸዳ የሕዝብ አለኝታ መሆኑን ነው። ይህ ስምንት ዓመታት የፈጀ የሪፎርም ጉዞ ኢትዮጵያን ወደፊትም በማይናወጥ ጽናት ሊያሻግራት የሚችልና የቀጣናው የሰላም ዋስትና እንዲሆን ያስቻለ የታሪክ ዐሻራ ነው።

በለሚ ታደሰ