ይህንን የሚማርከው የዓባያና የጫሞ ሐይቆች የተፈጥሮ ውበት፣ የሰው ልጅ ከደረሰበት አስደናቂ የምህንድስና ጥበብ ጋር ሲዋሃድ የሚፈጥረውን አስማት በዓይነ ሕሊናዎ አስበውት ያውቃሉ?

ኢትዮጵያ ያላትን የተፈጥሮ ጸጋ እና የቱሪዝም ዘርፍ ወደ አዲስ ከፍታ ለማውጣት በምታደርገው ሰፊ ስትራቴጂካዊ ጉዞ ላይ ትገኛለች።

ይህንን የሀገሪቱን ታላቅ የቱሪዝም ትንሳዔ እና አዳዲስ ተስፋዎች ከሚያሳዩን ዘመናዊ የምህንድስና ድንቆች መካከል፣ በአርባ ምንጭ ከተማ በሐይቅ ላይ የተገነባውና 360 ዲግሪ የሚሽከረከረው አዲሱ ሬስቶራንት ግንባር ቀደሙን ስፍራ ይይዛል።

ይህ ድንቅ የሀገር ውስጥ ምህንድስና ከዓለም አቀፍ ተሞክሮዎች ጋር እንዴት እንደሚተሳሰር፣ ለቱሪዝም ኢኮኖሚው ያለውን ሚና እና የሰነቀውን ቀጣይ ተስፋ  መመልከት ወቅታዊ የቱሪዝም አቅጣጫችንን ለመረዳት በእጅጉ ይረዳል።

የአርባ ምንጩ የምህንድስና ድንቅ፣ የተፈጥሮ ውበትን ከሰው ልጅ የፈጠራ ጥበብ ጋር በልዩ ሁኔታ ያገናኘ መድረክ ነው።

ይህ በሐይቁ ላይ የተገነባው ሬስቶራንት፣ እጅግ በሰከነ፣ ምቾት ባለውና በማይታወክ ፍጥነት 360 ዲግሪ በሚዞርበት ወቅት፤ እንግዶች በአንድ ቦታ ተቀምጠው የዓባያና የጫሞ ሐይቆችን ሰማያዊ ውበት፣ እንዲሁም በመካከላቸው የሚገኘውን አስደናቂውን የእግዜር ድልድይ ሙሉ ገጽታ ያለምንም መጋረድ እንዲመለከቱ ያስችላቸዋል።

ይህ ሥዕላዊ ትዕይንት፣ የሰውን ልጅ የምህንድስና ጥበብ ከተፈጥሮ ልምላሜ ጋር ያቆራኘ ሕያው ጥበብ ነው።

በዓለም ዙሪያ ያሉ በርካታ ሀገራት መሰል የስነ-ሕንፃ አሠራሮችን ለቱሪዝም መስህብነት እና ለሀገር ገጽታ ግንባታ በከፍተኛ ደረጃ ተጠቅመውባቸዋል።

ለዚህም ትልቅ ማሳያ የሚሆነው በካናዳ ቶሮንቶ የሚገኘው ታዋቂው የሲኤን ታወር (CN Tower) ሬስቶራንት ነው።ይህ ሥፍራ በየዓመቱ በሚሊዮን የሚቆጠሩ የውጭ ሀገር ጎብኚዎችን በመሳብ ለሀገሪቱ የቱሪዝም ኢኮኖሚ ግዙፍ ገቢ ያስገኛል።

ቱሪስቶች ወደዚያ የሚያቀኑት ምግብ ለመመገብ ብቻ ሳይሆን፣ ከፍታ ላይ ሆነው ሙሉ ከተማዋን እያዩ የመስተናገድን ልዩ ልምድ ፍለጋ ጭምር ነው።

በተመሳሳይ መልኩ የጀርመኑ በርሊን የቴሌቪዥን ማማ በአውሮፓ ውስጥ ረጅም ዓመታትን ያስቆጠረና እስከ ዛሬ ድረስ የከተማዋ የንግድ ማዕከል ሆኖ የሚያገለግል የቱሪስት መግነጢስ ሲሆን፣ በቻይናዋ ሻንጋይ የሚገኘው የኦሬንታል ፐርል ታወር የሚሽከረከር ሬስቶራንትም የሀገሪቱን ዘመናዊነትና የምህንድስና ልዕልና ለዓለም የሚያሳይ ትልቅ ተቋም ሆኗል።

እነዚህ ተሞክሮዎች በሙሉ የሚያሳዩት፣ ዘመናዊ ቱሪስቶች ለየት ያለ እይታ እና ትውስታ የሚሰጡ መዳረሻዎች ላይ ለመገኘት ከፍተኛ ፍላጎት እንዳላቸው ነው።

ይህ በአርባ ምንጭ የተጀመረው ፈር ቀዳጅ ሥራ ለኢትዮጵያ የቱሪዝም ዘርፍ ቀጣይ ተስፋ ትልቅ ማሳያ ነው። ሬስቶራንቱ የአርባ ምንጭን ከተማ ከተለመደው የተፈጥሮ መዳረሻነት ባሻገር፣ ወደ ዘመናዊ የስነ-ሕንፃ መዳረሻነት በማሸጋገር የጎብኚዎችን የቆይታ ጊዜ ያራዝመዋል።

አንድ ቱሪስት በአካባቢው ረዘም ላለ ጊዜ በቆየ ቁጥር ደግሞ ለሆቴሎች፣ ለትራንስፖርት እና ለሀገር በቀል ባህላዊ ምርቶች የሚያወጣው ወጪ ስለሚጨምር፣ የደቡብ ኢትዮጵያን የቱሪዝም ኮሪደር የኢኮኖሚ እንቅስቃሴ በከፍተኛ ደረጃ ያነቃቃዋል።

ከዚህም በተጨማሪ፣ ይህ ፕሮጀክት ለሀገር ውስጥ መሐንዲሶችና ባለሀብቶች ትልቅ የራስ መተማመንን ይፈጥራል። ወደፊት በውኃ ውስጥ ዘልቀው የሚገቡና የሚወጡ የፈጠራ ፅንሰ-ሃሳቦች በዱባይና በቻይና የባሕር ዳርቻዎች እንደሚታቀዱት ሁሉ፣ ይህ የአርባ ምንጭ ጅምር የሀገር ውስጥ ባለሙያዎች ይበልጥ ደፋርና የወደፊት የቱሪዝም ፕሮጀክቶች ላይ እንዲሳተፉ መነሳሳትን ይፈጥራል።

የኢትዮጵያ የቱሪዝም ማዕበል ወደ ተረጋጋና ወደ ላቀ ከፍታ እየተሻገረ ባለበት በዚህ ወቅት፣ እንደ አርባ ምንጩ የሚሽከረከር ሬስቶራንት ያሉ የፈጠራ ሥራዎች የሀገራችንን የተፈጥሮ ጸጋ ለዓለም ለማስተዋወቅ ትልቅ አቅም ናቸው።

ከበርካታ ፈተናዎች በኋላ የተገኘው ይህ አዲስ ተስፋ፣ ኢትዮጵያን ቀዳሚና ተመራጭ የቱሪዝም ማዕከል የማድረግ ጉዞዋን በእጅጉ ያፋጥነዋል።

በመሀመድ ፊጣሞ