"አትመዝገቡ፣ አትምረጡ፣ ምርጫው አይካሄድም..." የሚሉ የማስፈራሪያ ድምጾች በየአቅጣጫው በሚያስተጋቡበትና የጥይት እሩምታ በሚሰማበት ፈታኝ ወቅት፣ በሚሊዮን የሚቆጠሩ ዜጎች ሌሊቱን በንቃት ጠብቀው በየምርጫ ጣቢያው ሲሰለፉ ማየት ምን ዓይነት ስሜት ይፈጥራል? ይህ የሰባተኛው ጠቅላላ ምርጫ ዋነኛ መገለጫ ሲሆን፣ ምርጫው ከፖለቲካ ፓርቲዎች ፉክክር ባለፈ የኢትዮጵያ ሕዝብ ሀገረ-መንግሥቱን ለማጽናት ያደረገው ታላቅ የትዕግስትና የጽናት ተጋድሎ ሆኖ በታሪክ ተመዝግቧል።

ጠቅላይ ሚኒስትር ዐቢይ አሕመድ (ዶ/ር) በሕዝብ ተወካዮች ምክር ቤት ተገኝተው የሰባተኛውን ጠቅላላ ምርጫ ሂደት፣ የሕዝቡን ውሳኔ አንድምታ እና የኢትዮጵያን ወቅታዊ የፖለቲካ አውድ አስመልክተው የሰጡት ሰፊ ማብራሪያ፣ ኢትዮጵያ አሁን ያለችበትን የፖለቲካ ሽግግር ጥልቀት በጉልህ የሚያሳይ ነው።

ምርጫው ራሱ የጥቃት ኢላማ በነበረበት ፈታኝ ወቅት፦

ካለፉት ጊዜያት የምርጫ ታሪኮች በተለየ መልኩ፣ የዘንድሮው ጠቅላላ ምርጫ ልዩ የሚያደርገው ፉክክሩ በፖለቲካ ኃይሎች የሃሳብ ልዩነት ላይ ብቻ የተመሠረተ አለመሆኑ ነው። ይልቁንም ምርጫውን የማይፈልጉና ባንዳዎችን የሚያሰማሩ ፀረ-ሰላም ኃይሎች፣ ራሱን ምርጫውን እንደ አንድ የጥቃት ኢላማ አድርገውት ነበር።

ይሁን እንጂ ችግሮችን በብልሃት የማለፍ የዳበረ ልምድ ያለው የኢትዮጵያ ሕዝብ፣ እነዚህን እገዳዎችና ማስፈራሪያዎች ወደ ጎን በመተው ከሃምሳ ሺህ በላይ በሚሆኑ የምርጫ ጣቢያዎች ታይቶ የማይታወቅ ነቂስ ተሳትፎ አድርጓል።

በዚህ ሂደት ውስጥ እጅግ ልብ የሚነካው ክስተት የአረጋውያን፣ የሕሙማን እና የሐዘንተኞች ተሳትፎ ነው። አዛውንቶች ሊኖሩም ላይኖሩም ለሚችሉበት የቀጣይ አምስት ዓመት ሳይሆን፣ በእነሱ ድምጽ የልጆቻቸው ሀገር ቀጣይነት መረጋገጥ ስላለበት ተደግፈው ወጥተዋል።

እናቶች ልጆቻቸውን አዝለው፣ ሕሙማን ከህመማቸው ታግለው፣ ዜጎች የጥይት ድምጽ እየተሰማ ሸብረክ ሳይሉ የሰጡት ድምጽ፣ ጽንፈኝነትንና ዘረኝነትን በአንድነት መቃወማቸውን በተግባር ያረጋገጠ ታላቅ መልእክት ነው።

የሕዝቡ "ባዶ ቼክ" እና የማይታጠፈው የመንግሥት ኃላፊነት፦

ጠቅላይ ሚኒስትሩ በንግግራቸው አበክረው የገለጹት ጉዳይ ቢኖር፣ ሕዝቡ ለመንግሥት የሰጠው ድምጽ "ባዶ ቼክ" መሆኑን ነው። ይህ ድምጽ መንግሥት የጀመራቸውን ዘርፈ ብዙ የኢኮኖሚ ማሻሻያዎችን እና የተመዘገቡ ስኬቶችን እውቅና የሰጠ ቢሆንም፣ በውስጡ ግን ጥብቅ አደራዎችን ያዘለ ነው።

ሕዝቡ በግልጽ እንዳስቀመጠው፣ የተጀመረው ሥርዓታዊ ሌብነትን የማጥፋት ጅምር መልካም ቢሆንም፣ አሁንም በመዋቅሩ ውስጥ ያሉ ሌቦችን በማጽዳት አገልግሎት አሰጣጥን ማሻሻል እጅግ አንገብጋቢ ጉዳይ ነው።

ይህ አደራ ቀላል አይደለም። አሁን የተሰጠውን "ባዶ ቼክ" በአግባቡ ሥራ ላይ አውሎ የተሟላ ሀገራዊ ብልጽግናን ማረጋገጥ ካልተቻለ፣ ዛሬ ጥይት ሳይፈራ ወጥቶ ድምጹን የሰጠው ሕዝብ፣ ነገ ደግሞ አንዳች ነገር ሳይፈራ በመንግሥት ላይ የተቃርኖ እርምጃ ከመውሰድ ወደኋላ እንደማይል ጠቅላይ ሚኒስትሩ በግልጽ አስቀምጠዋል። ይህ መረዳት ታማኝነትንና ሕዝብን ማክበርን የፖለቲካው ማዕከል ያደረገ ነው።

በአፍሪካ ታይቶ የማያውቀው የዴሞክራሲ እርምጃ፦

በምርጫው ሂደት ውስጥ የገዢው ፓርቲ (ብልጽግና) ውሳኔ የኢትዮጵያን የዴሞክራሲ ባህል ወደ አዲስ ምዕራፍ ያሸጋገረ ነው። ፓርቲው ከምርጫው ስድስት ወራት በፊት ባደረገው ጥልቅ ውይይት፣ ምንም እንኳን አቅሙ ቢኖረውም ከ85 በመቶ በላይ የምክር ቤት ወንበር ላለመወዳደር ታሪካዊ ውሳኔ አሳልፏል። ቀሪውን 15 በመቶ ወንበር ተፎካካሪ ፓርቲዎች ከመንግሥት ተጽዕኖ ሙሉ በሙሉ ነፃ በሆነ መንገድ ብቻቸውን እንዲወዳደሩበት ተደርጓል።

ይህ ዓይነቱ ገዢ ፓርቲ በገዛ ፈቃዱ ወንበር የሚተውበት አሠራር በኢትዮጵያ ብቻ ሳይሆን በመላው አፍሪካ ታይቶ የማይታወቅ የዴሞክራሲያዊ ቀናኢነት ማሳያ ነው።

ከዚህም ባለፈ፣ ፓርቲው በቀጣዩ ሀገራዊ የምክክር መድረክ ላይ ከሚያቀርባቸው ዋነኛ አጀንዳዎች አንዱ የሥልጣን ዘመን ገደብን የተመለከተ ነው።

በሥልጣን ላይ ያለ መንግሥት ከሁለት የምርጫ ዘመን በላይ መቆየት እንደሌለበት የሚያስቀምጠው ይህ አጀንዳ፣ በአፍሪካ ፖለቲካ ውስጥ ሕገ-መንግሥትን እያሻሻሉ የሥልጣን ዕድሜን ከማራዘም አባዜ ፈጽሞ ያፈነገጠ እና ለነገዋ ኢትዮጵያ ጽኑ ዴሞክራሲያዊ መሠረት የሚጥል ነው።

የሰላም ተስፋ እና የሀገራዊ ምክክሩ ጉዞ፦

በመጨረሻም ጠቅላይ ሚኒስትሩ የሰላም እና ጸጥታ ሁኔታ ላይ ሰፋ ያለ ማብራሪያ ሰጥተዋል። መንግሥት ከሕዝብ ጋር ባደረጋቸው ከ225 በላይ መድረኮች እና በፓርቲ ደረጃ በተካሄዱ ከ4,000 በላይ ውይይቶች፣ በኢትዮጵያ ታሪክ ታይቶ በማያውቅ መልኩ ዜጎች በነፃነት አጀንዳዎቻቸውን አንስተዋል።

የዚህ ሰፊ የሕዝብ ውይይት ትልቁ ትሩፋት ደግሞ፣ ቀደም ሲል በስፋት ይስተዋሉ የነበሩ የብሔርና የሃይማኖት ግጭቶች በእጅጉ መቀነሳቸው ነው።

አሁን አልፎ አልፎ በተወሰኑ አካባቢዎች የሚታዩት ግጭቶች ህዝብ ከህዝብ የሚጋጭባቸው ሳይሆኑ፣ የኢትዮጵያን መረጋጋት የማይፈልጉ ኃይሎች ባንዳዎችን በማሰማራት የሚፈጥሩት ትንኮሳ ነው።

ይሁን እንጂ የኢትዮጵያን የጸጥታ ተቋማት አቅማቸውንና የቴክኖሎጂ አጠቃቀማቸውን በከፍተኛ ሁኔታ እያሳደጉ የመጡ ሲሆን፣ ይህንን መደበኛ ያልሆነ የሽምቅ ውጊያ ለመቆጣጠር ከሕዝቡ ጋር በጥብቅ ትብብር እየሠሩ ይገኛሉ።

ምንም እንኳን የሕግ ማስከበሩ ሥራ ተጠናክሮ ቢቀጥልም፣ መንግሥት አሁንም በኦሮሚያ እና በአማራ ክልሎች ትጥቅ አንስተው ለሚንቀሳቀሱ ኃይሎች የሰላም በሩን ክፍት አድርጎ አስቀምጧል።

በርካቶች ድርድሮችን አድርገው ወደ ሰላማዊ ሕይወት እንደተመለሱት ሁሉ፣ ቀሪዎቹም የትጥቅ ትግል ወደ ድል እንደማያደርስ ተገንዝበው፣ በመመካከር እና በመቀራረብ የጋራ ሀገርን በጋራ ለመገንባት እንዲመጡ መንግሥት ጥሪውን አቅርቧል።

እውነተኛው አሸናፊነት የሚረጋገጠው በመነጋገርና አብሮ በመሥራት መሆኑን የዘንድሮው ጠቅላላ ምርጫ በግልጽ አስመስክሯል።