የዘመን መለወጫ ለኢትዮጵያውያን በቀን መቁጠሪያ ላይ ከሚሰፍር የቁጥር ሽግግር የዘለለ እጅግ ጥልቅ ትርጉም አለው።

የክረምቱ ከባድ ደመና ተገፍፎ በጠራው የመስከረም ሰማይ ሲተካ፣ ካለፈው የውጣ ውረድ ትዝታ ተላቅቀን በአዲስ መንፈስ እና በጽኑ ዓላማ ወደፊት የምንራመድበት ታላቅ የሕይወት ምዕራፍ ይከፈታል።

አሮጌውን ዓመት በክረምቱ ጭጋግ ሸኝተን አዲሱን ዘመን በብራ ብርሃን ዛሬ ስንቀበል በልባችን ውስጥ የሚፈጠረውን ነገን የማለም ስሜት እና የታደሰ ሥነ-ልቦና ቃላት ሊገልጹት ከሚችሉት በላይ ነው።

መስከረም ሲጠባ ምድራችን በክት ልብስ እንዳጌጠች ውብ ኮረዳ ቢጫ ቀሚሷን ትለብሳለች። የደፈረሱ ወንዞች ሲጠሩ፣ ሰማዩ በብርሃን ሲደምቅ፣ ከዐደይ አበባ መፍካት ጋር መስኩ ሁሉ ውበት ሲላበስ የተፈጥሮን የዕይታ ድግስ ብቻ ሳይሆን የልብ መረጋጋትንም አብረን እንቋደሳለን።

ወራት ተቆጥረው አዲሱ ዓመት ሲመጣ ከሰማዩ እና ከወንዞቹ መጥራት ጋር ተያይዞ የሚያመነጨው መንፈስን የማደስ ኃይል መጪው ጊዜ ብሩህ እና ሰላማዊ መሆኑን የሚያበስር ሕያው የተፈጥሮ ምስክር ነው።

ይህ የተፈጥሮ እና የሰው ልጅ ውብ የዘመን መተካካት ከዕይታም ባለፈ ሌላ ትልቅ የሕይወት ፍልስፍናን ያወርሰናል።

ወቅቱ በክረምቱ ዝናብ፣ ብርድ እና ጭቃ ሳይበገሩ ያፈሰሱት ላብ እና የዘሩት ዘር ወደ ተስፋ ፍሬ የሚሸጋገርበት የሽልማት ጊዜ ነው።

በጭቃ እና በድካም ውስጥ የተዘራው ፍሬ በቅሎ እና አሽቶ የድካምን ዋጋ ሲያስገኝ፣ ተፈጥሮ ራሷ ትዕግሥትን፣ አይበገሬነትን እና ከማንኛውም ፈተና በኋላ ብርሃን መኖሩን በተግባር ታስተምረናለች።

ይህ የትጋት ውጤት እያንዳንዱ የሕይወት ፈተና ወደሚያብብ የተስፋ ፍሬ እንደሚቀየር የሚያረጋግጥልን ጽኑ ቃል ኪዳን ነው።

እነሆ አዲሱ ዓመት አዲስ ተስፋን ሰንቆ መጥቷል! ይህ ዛሬ የተቀበልነው አዲስ ምዕራፍ የጀመርነው መልካም ጥረት ሁሉ የሚያብብበት፣ የምንመኘው ሰላም፣ መከባበር እና ወንድማማችነት ልክ እንደ ዐደይ አበባ ፈክቶ የሚታይበት እንዲሆን እንመኛለን።

አዲሱን የተፈጥሮ ብሩህነት ወደ ሕይወታችን አጋብተን፣ ይህን የታደሰ ተስፋ ሰንቀን በአዲስ መንፈስ ወደተሻለ የጋራ ከፍታ በፅናት እንጓዝ።

እንኳን ለ2019 አዲስ ዓመት በሰላም አደረሳችሁ! መልካም አዲስ ዓመት!

በለሚ ታደሰ