የተባሩት መንግሥታት ድርጅት (ተመድ) ሕግ የኢትዮጵያን የባህር በር ጥያቄ  የሚደግፍ መሆኑን የዲፕሎማሲ እና የዓለም አቀፍ ግንኙነት ምሁሩ ፕሮፌሰር ብሩክ ኃይሉ ገለፁ።

በዚሁ የተመድ ሕግ እና መርህ መሰረት ተጠቃሚ የሆኑ እና የሚተዳደሩ በርካታ ሀገራት መኖራቸውንም ፕሮፊሰር ብሩክ ከኢቢሲ አዲስ ቀን የዜና መሰናዶ ጋር በነበራቸው ቆይታ ተናግረዋል።

የኢትጵያ ጥያቄ በሌለ ነገር ላይ ሳይሆን በተመድ ሕግ በአንቀፅ ተለይቶ በተደነገገ እና ዓለም አቀፉ ማህበረሰብም ተስማምቶበት እየተጠቀመበት በሚገኝ ሕግ እና መርህ ላይ የተመሰረተ ሕጋዊ ጥያቄ መሆኑን ገልፀዋል።

በዚህ ዓለም አቀፍ ሕግ እና ስምነት መሰረት እንደ ኢትዮጵያ ያለ ሀገር በአቅራቢያው ያለን ወደብ በሰላማዊ እና በዲፕሎማሲያዊ መንገድ ከመጠቀም በሕግ እስከ መጠየቅ የሚደርስ መብት እንዳለው ነው ፕሮፌሰር ብሩክ ያብራሩት።

ኢትዮጵያ የባህር በር ጥያቄዋን እያቀረበች ያለችው በዓለም አቀፍ የባሕር በር ድንጋጌዎች እና በፍትሐዊነት ላይ ተመስርታ በሰላማዊ እና በዲፕሎማሲያዊ መንገድ በመሆኑ ጥያቄው ፍፁም ተገቢነት ያለው መሆኑን አንስተዋል።

በመሆኑም እያንዳንዱ ኢትዮጵያዊ በእያንዳንዱ ዓለም አቀፍ መድረክ ላይ የሀገሩ አምባሳደር በመሆን የኢትዮጵያ የባህር በር ጥያቄ ተቀባይነት እንዲያገኝ ከማስተጋባት ጀምሮ የሚቻለውን ሁሉ አስተዋጽኦ ማበርከት እንዳለበት ነው ፕሮፌሰር ብሩክ ያመላከቱት።

በንፍታሌም እንግዳወርቅ

#EBCdotstream #ETV #Ethiopia #Seaport