ኢትዮጵያ 32ኛውን የተባበሩት መንግሥታት ድርጅት የአየር ንብረት ለውጥ ጉባኤ (ኮፕ 32) እንድታስተናግድ በአፍሪካ የተደራዳሪዎች ቡድን ተመርጣለች።

ለአፍሪካ አህጉር የተሰጠውን የኮፕ32 ጉባኤ አስተናጋጅነትን ተከትሎ ኢትዮጵያ የ2027ቱ ጉባኤ ለማስተናገድ ከወዲሁ ቅድመ ማረጋገጫ አግኝታለች።

ይህንን ተከትሎም በርካታ ዓለም አቀፍ መገናኛ ብዙኃን ስለኢትዮጵያ መመረጥ እየዘገቡ ይገኛል።

ሮይተርስ ኢትዮጵያ በአፍሪካ ተደራዳሪዎች የ COP32 የአየር ንብረት ጉባኤን እንድታስተናግድ መመረጧ በዓለም አቀፍ የአየር ንብረት ዲፕሎማሲ ውስጥ ያላትን አቋም ያጠናክራል ሲል ዘግቧል።

ዴይሊ ኔሽን በበኩሉ፤ ኢትዮጵያ የጉባኤው አዘጋጅ እንድትሆን መመረጧ በአየር ንብረት ለውጥ መከላከል ሥራዎች ላይ ላበረከተቻቸው ጉልህ አስተዋጽኦዎች ዕውቅና እንደመስጠት ነው ሲል ባለሙያዎችን ጠቅሶ ገልጿል።

ኤሶሺዬትድ ፕሬስ ደግሞ፤ ኢትዮጵያ እ.አ.አ በ2027 የሚካሄደውን ጉባኤ እንድታዘጋጅ ተመርጣለች፣ ይህ ውሳኔ በአፍሪካ ተደራዳሪዎች ቡድን የተደገፈ ነው ሲል አመላክቷል።

ኢትዮጵያ በ2027 የ COP32 የአየር ንብረት ጉባኤን ለማስተናገድ የአፍሪካ ሀገራትን ድጋፍ አግኝታለች፣ ይህም ለሀገሪቱ ትልቅ ዲፕሎማሲያዊ ስኬት መሆኑን የገለፀው ደግሞ ዘ ኒው አረብ የተሰኘው ሚዲያ ነው።

የሕንድ መገናኛ ብዙኃንም ኢትዮጵያ ኮፕ32ን እንድታስተናግድ የተደረገው ውሳኔ በአፍሪካ ሀገራት ላይ ከፍተኛ ተጽዕኖ እያሳደረ ያለውን የአየር ንብረት ለውጥ ተግዳሮቶችን ለመፍታት ያለውን አስቸኳይ ፍላጎት ያጎላል ሲሉ ገልፀዋል።

ፍራንስ 24 በበኩሉ፤ የአፍሪካ ተደራዳሪዎች ቡድን አባላት ኢትዮጵያ የአየር ንብረት ጉባኤን እንድታስተናግድ በይፋ መደገፋቸውን አንስቶ ዘግቧል።

ቲአርቲ አፍሪካ እና አፍሪካ ኔውስ ኢንተርናሽናል፤ ኢትዮጵያ ጉባኤውን ለማስተናገድ ያቀረበችው ጥያቄ ተቀባይነት በማግኘቱ ለምስራቅ አፍሪካዊቷ ሀገር ትልቅ ድል መሆኑን ገልጸዋል።

በጌትነት ተስፋማርያም

#Ebc #Ebcdotstream #Ethiopia #COP30 #COP32 #ClimateChange