ብልጽግናን የማረጋገጥ ራዕይ - ጠቅላይ ሚኒስትሩ እንደገለጹት፤ ቱሪዝም ሀገራችን ካስቀመጠችው የብልጽግና ራዕይ ጋር ተናብቦ፣ ፈጣን የኢኮኖሚ ዕድገት ከሚያመጡ አምስት ዋና ዋና ዘርፎች አንዱ ሆኖ ተለይቷል።

ዓለም አቀፍ የሀብት ድርሻን መቋደስ - በዓለም ላይ በቱሪዝም ዘርፍ ከሚንቀሳቀሰው 12.6 ትሪሊየን ዶላር ግዙፍ ሀብት ውስጥ ኢትዮጵያ ተገቢውን ድርሻ እንድታገኝ ሰፊ ትኩረት ተሰጥቶ እየተሠራ መሆኑን አስገንዝበዋል።

ከፍተኛ የሥራ ዕድል ፈጠራ - በዓለም አቀፍ ደረጃ ከሚፈጠረው አዲስ የሥራ ዕድል 10.9 በመቶው ከቱሪዝም የሚገኝ በመሆኑ፣ ሀገራችን ለገጠማት የሥራ አጥነት ችግር መፍትሔ በማምጣት በኩል ዘርፉ ወሳኝ ሚና እንዳለው አብራርተዋል።

የጠቅላላ ኢኮኖሚው ሞተር - ቱሪዝም የኢንዱስትሪ ምርቶችን፣ የግብርና ውጤቶችን እና የጥቃቅን ንግዶችን ገበያ በማስፋት የጠቅላላ ኢኮኖሚውን ትሥሥር እንደሚያጠናክር እና የውጭ ቀጥታ ኢንቨስትመንትንም እንደሚስብ ጠቅላይ ሚኒስትሩ አስረድተዋል።

የተዛባ ብሔራዊ ትርክትን መቀየር - ጠቅላይ ሚኒስትሩ አበክረው እንደገለጹት፤ ቱሪዝም ኢትዮጵያ በረሃብ እና በችግር ብቻ የምትታወቅበትን የተሳሳተ የውጭ ትርክት በማረም፣ ትክክለኛውን እና በጎ ገጽታዋን ለዓለም ለማሳየት ትልቅ ፖለቲካዊ እና ዲፕሎማሲያዊ መሣሪያ ነው።

እጅግ ሰፊ የተፈጥሮ ጸጋዎች - ኢትዮጵያ ከከፍተኛው የራስ ዳሸን ተራራ እስከ ዝቅተኛው የዳሎል ስምጥ ሸለቆ፣ ልዩ የአየር ንብረት፣ እንዲሁም እጅግ ብርቅዬ የሆኑ የዕፅዋትና የዱር እንስሳት ሀብቶች ባለቤት መሆኗን ጠቅላይ ሚኒስትሩ አውስተዋል።

ታሪካዊ እና ባህላዊ ማዕከልነት - ኢትዮጵያ የሰው ልጅ መገኛ ከመሆን ባሻገር፣ እንደ ላሊበላ፣ ፋሲል፣ የሶፍ ዑመር ዋሻ እና ዓድዋ የመሳሰሉ አንፀባራቂ የታሪክ እና የቅርሶች ባለቤት መሆኗ ለዘርፉ ከፍተኛ አቅም መሆኑን ገልጸዋል። ቅርሶችን ከዕዳነት ወደ ሀብትነት መቀየር - ቀደም ሲል ቅርሶችን እንደ መከፋፈያ እና እንደ ዕዳ የማየት ችግር ነበረ፤ አሁን ግን የጋራ ሀብት እና የቱሪዝም መስህብ ሆነው እንዲለሙ እየተደረገ ነው ብለዋል።

የተዘረፉ ቅርሶችን የማስመለስ ስኬት - ባለፉት ጥቂት ዓመታት ብቻ ከ35 በላይ ወደ ውጭ ተዘርፈው የነበሩ የተለያዩ ታሪካዊ ቅርሶች እና ንዋየ ቅድሳቶች ወደ ሀገራችን እንዲመለሱ መደረጉን አረጋግጠዋል።

አራት መሠረታዊ የቱሪዝም ምሰሶዎች - ቱሪዝምን ለማሳደግ የመዳረሻ ስፍራዎችን፣ የማረፊያ ሆቴሎችን፣ የትራንስፖርት እና የዲጂታል መሠረተ ልማቶችን የማሟላት ሥራ በስፋት እየተሠራ ይገኛል።

የገበታ ፕሮጀክቶች አበርክቶ - "ገበታ ለሸገር"፣ "ገበታ ለሀገር" እና "ገበታ ለትውልድ" በተሰኙ ሀገራዊ ጅምሮች እንደ እንጦጦ፣ ወንጪ፣ ጎርጎራ፣ አርባ ምንጭ እና ጅማ ያሉ አስደናቂ የመዳረሻ ስፍራዎች መገንባታቸውን አንሥተዋል።

የሁሉም አካላት የነቃ ተሳትፎ - በቱሪዝም መሠረተ ልማት ግንባታ ላይ የመንግሥትን ጥረት በመደገፍ የግሉ ዘርፍ፣ ወዳጅ ሀገራት እና ጠቅላላ ሕዝቡ በከፍተኛ ሁኔታ እገዛ እያደረጉ መሆኑን ጠቅሰው አመስግነዋል።

ዘመናዊ የመገበያያ ሥፍራዎች (Malls) - ጠቅላይ ሚኒስትሩ እንዳብራሩት፣ ቱሪስቶች ሲመጡ ገንዘብ አውጥተው እና ሸምተው እንዲሄዱ ለማድረግ የሚያስችሉ እጅግ ዘመናዊ የገበያ ማዕከላት በአዲስ አበባ ከተማ እየተገነቡ ነው።

የጥራት እና ነባር ይዘትን የማስቀጠል ትኩረት - የብሔራዊ ቤተመንግሥትን እና የፋሲል ግቢን ጨምሮ እየተከናወኑ ያሉ የቅርስ እድሳቶች ቅርሶቹ እንዳይበላሹ ነባር (ኦሪጅናል) ይዘታቸውን በጠበቀ እና ከፍተኛ ጥራት ባለው መንገድ እየተሠሩ መሆኑን አስምረውበታል።

MICE ቱሪዝምን ማሳደግ - ስብሰባዎችን፣ ማበረታቻዎችን፣ ኮንፈረንሶችን እና ኤግዚቢሽኖችን ያማከለ (MICE) ቱሪዝም ላይ ትኩረት መደረጉን እና ይህም ከተለመደው የቱሪዝም ዓይነት እስከ አምስት እጥፍ ገቢ እንደሚያስገኝ ጠቅላይ ሚኒስትሩ አስረድተዋል።

ዓለም አቀፍ የጎብኚዎች እና የገቢ ዕድገት - በዚህ ዓመት ብቻ ከ1.4 ሚሊዮን በላይ የውጭ ጎብኚዎች ኢትዮጵያን የጎበኙ ሲሆን፣ ከዘርፉም ከ5.2 ቢሊዮን ዶላር በላይ የውጭ ምንዛሬ ገቢ ለሀገራችን መገኘቱን በአኃዝ አስደግፈው አቅርበዋል።

የሀገር ውስጥ ቱሪዝም መነቃቃት - ዘንድሮ ከ50 ሚሊዮን በላይ ኢትዮጵያውያን በተለያዩ የሀገራችን ክፍሎች ጉብኝት በማድረግ ከ79 ቢሊዮን ብር በላይ የሀገር ውስጥ የቱሪዝም የገንዘብ ዝውውር መፍጠር ችለዋል ነው ያሉት።

የኮንፈረንስ ቱሪዝም ስኬት - አዲስ አበባ ያላትን የዲፕሎማሲ ማዕከልነት እና የኢትዮጵያ አየር መንገድን የመገናኛ ትሥሥር በመጠቀም፣ በዚህ ዓመት ብቻ 204 ዓለም አቀፍ ኮንፈረንሶች በኢትዮጵያ መካሄዳቸውን ገልጸዋል። ማስተዋወቅ ሥራ አስፈላጊነት -  መዳረሻዎችን ከመገንባት ባሻገር የሁለተኛ ትውልድ ኢትዮጵያውያን (ዳያስፖራዎች) ጉብኝት፣ የዓለም አቀፍ ኢንፍሉዌንሰሮች ሥራ እና የሚዲያ ተቋማት ዘገባዎች ለዘርፉ ስኬት እጅግ ወሳኝ መሆናቸውን ጠቅላይ ሚኒስትሩ አስገንዝበዋል።

የሁሉም ዜጋ የጋራ ኃላፊነት - የቱሪዝም ስኬት የጥቂቶች ብቻ ሳይሆን፣ ከታክሲ ሾፌሮች፣ ከሆቴል ሠራተኞች እና የኪነ-ጥበብ ባለሙያዎች ጀምሮ ጠቅላላ ዜጎች ኢትዮጵያን በተገቢው ክብር የመግለጥ እና በጎ ገጽታዋን ለቱሪስቶች የማሳየት ኃላፊነት እንዳለባቸው ጠቅላይ ሚኒስትሩ ጥሪያቸውን አስተላልፈዋል።