"ሀገርን ማልማት የትውልድ አደራ ነው፤ ኢትዮጵያችንን አልመንና አድምቀን ለቀጣዩ ትውልድ እናስረክባለን" የሚለው የጠቅላይ ሚኒስትር ዐቢይ አሕመድ (ዶ/ር) ንግግር፣ ባለፉት አምስት ዓመታት በኢትዮጵያ ምድር ለታየው ግዙፍ ሀገራዊ የልማት ዝላይ ዋነኛ ሞተር ሆኖ አገልግሏል።

ይህ አጭር ጊዜ ኢትዮጵያ በብዙ ፈተናዎች እና ማዕበሎች ውስጥ ያለፈችበት ቢሆንም፣ ከፈተናዎቹ ባልተናነሰ የሀገራችንን አዲስ መልክ የቀረጹና የታሪክ አቅጣጫን የቀየሩ ግዙፍ የመሰረተ ልማት ድሎች የተመዘገቡበት የታላቅ ትንሳዔ ዘመን ሆኗል።

ፖለቲካዊ ውጥረቶችና ዓለም አቀፍ ጫናዎች ሊያንበረክኩን ሲሞክሩ፣ መንግሥት ትኩረቱን በልማት ላይ በማድረግ "ኢትዮጵያ አትፈርስም፣ ይልቁንም ትገነባለች" የሚለውን መሪ ቃል በተግባር አሳይቷል። ይህ ጽኑ አቋም ኢትዮጵያን ከማፍረስ እና ከመገንባት ትርክት አውጥቶ፣ ፈተናዎችን ወደ እድል በመቀየር ግዙፍ ሀገራዊ ፕሮጀክቶችን እውን ማድረግ ወደሚያስችል የተግባር ምዕራፍ አሸጋግሯታል።

ጠቅላይ ሚኒስትሩ በተደጋጋሚ "የምናስባት ኢትዮጵያ እንደ ስሟ ከፍ ያለችና ያማረች መሆን አለባት" በማለት የሚያነሱት ሀሳብ፣ በተለይ በገጽታ ግንባታው መስክ አይነኬ የሚመስሉ ታሪካዊ ስኬቶችን አስመዝግቧል።

አዲስ አበባን በእውነትም "አዲስ" እና "አበባ" ለማድረግ የተሰሩት ዘመናዊ የኮሪደር ልማት ስራዎች፣ የሸገር ማስዋብ ፕሮጀክቶች፣ እንዲሁም የእንጦጦ፣ የአንድነት እና የወዳጅነት ፓርኮች ግንባታ የከተማዋን ገጽታ ከመሰረቱ ቀይረውታል።

ይህ ውበትና ልማት በመዲናዋ ብቻ ሳይወሰን ወደ ክልሎችም በመስፋፋት በገበታ ለሀገር እና በገበታ ለትውልድ ፕሮጀክቶች አማካኝነት የጎርጎራ፣ የወንጪ፣ የኮይሻ እና የሀላላ ኬላ ሪዞርቶች የኢትዮጵያን የተደበቀ የተፈጥሮ ጸጋ አውጥተው በማሳየት የቱሪዝም ኢኮኖሚውን አዲስ የደም ስር ዘርግተዋል።

እነዚህ ፕሮጀክቶች የተሰሩበት ፍጥነትና ጥራት፣ "አንጀምርም እንጂ ከጀመርን በጥራት እናጠናቅቃለን" የሚለውን አዲስ የስራ ባህል በኢትዮጵያ የቢሮክራሲ መዋቅር ውስጥ በጥልቅ የተከለ ነው።

የኢትዮጵያ የልማት የጀርባ አጥንት የሆኑት ግዙፍ የመሰረተ ልማት ፕሮጀክቶች ባለፉት አምስት ዓመታት ልዩ ትኩረት ተሰጥቷቸው የደረሱበት ደረጃ የኢትዮጵያውያንን አንገት ቀና ያደረገ ታሪካዊ ክስተት ነው። በተለይም ታላቁ የኢትዮጵያ ሕዳሴ ግድብ የገጠሙትን የዲፕሎማሲ፣ የፋይናንስ እና የውስጥ የጸጥታ ፈተናዎች ሁሉ በብልሃት ተቋቁሞ የተሳካ የውኃ ሙሌት ከማካሄድ አልፎ ኃይል ወደ ማመንጨት መሸጋገሩ የኢትዮጵያውያንን የማይበገር አንድነት ያረጋገጠ ህያው ምስክር ነው።

ይህ ግዙፍ የኃይል ማመንጫ ፕሮጀክት ኢትዮጵያ የራሷን ብርሃን ፈጥራ ለጎረቤቶቿም የምትተርፍበትን መንገድ ጠርጓል። ከዚህ ጎን ለጎን የኢኮኖሚ ትስስር የሚያሳልጡ በሺዎች የሚቆጠሩ ኪሎ ሜትሮች የአስፋልት መንገዶች፣ ግዙፍ የኢንዱስትሪ ፓርኮች፣ እጅግ ዘመናዊ የሆኑ የሳይንስ ሙዚየሞች እና የቴክኖሎጂ መሰረተ ልማቶች ኢትዮጵያን ከጫፍ ጫፍ በዘመናዊነት እያስተሳሰሯት ይገኛሉ።

ይህ የመሰረተ ልማት ዝላይ በግብርናው ዘርፍ ከተመዘገበው ተዓምራዊ ስኬት ጋር ሲደመር የኢትዮጵያን አዲስ የብልጽግና መልክ ይበልጥ ያደምቀዋል። "ከምንለምንበት እጅ፣ ወደምንሰጥበት ክንድ መሸጋገር አለብን" በሚለው የጠቅላይ ሚኒስትር ዐቢይ አሕመድ (ዶ/ር) የጽኑ እምነት መሪነት፣ ኢትዮጵያ በስንዴ ምርት ራሷን ችላ ታሪኳን በመቀየር ለውጭ ገበያ ማቅረብ መቻሏ የዘመናት የታሪክ ጠባሳን የሻረ ትልቅ የኢኮኖሚ እና የስነ-ልቦና ድል ነው።

በበጋ መስኖ የተጀመረው ይህ የግብርና አብዮት፣ኢትዮጵያ ያላትን የውኃ እና የመሬት ሀብት አሟጦ በመጠቀም የምግብ ዋስትናን ለማረጋገጥ እየተደረገ ላለው ጉዞ አስተማማኝ መሰረት ጥሏል፤ ዜጎችም በምድራቸው ላይ ሰርተው ማደግ እንደሚችሉ የተግባር ማረጋገጫ ሆኗል።

ባለፉት አምስት ዓመታት በኢትዮጵያ የታየው ጉዞ፣ እንቅፋቶችን ወደ ድል መወጣጫነት በመቀየር "በመደመር" ዕሳቤ ሀገርን ከፍ የማድረግ ተግባራዊ ጉዞ ነው።

መንግሥት የጀመራቸውን የልማት ራዕዮች ለሰከንድም ሳያቋርጥ ኢትዮጵያን የብልጽግና ተምሳሌት ለማድረግ የሚያደርገው ጥረት አኩሪ ውጤቶችን አምጥቷል።

ጠቅላይ ሚኒስትሩ በተደጋጋሚ እንደሚያነሱት "ትላንትን እናመሰግናለን፣ ዛሬን እንሰራለን፣ ነገን ደግሞ በአሸናፊነት እንረከባለን" እንደሚሉት ሁሉ፣ ይህ የአምስት ዓመታት የልማት እና የግንባታ ማዕበል ኢትዮጵያን ወደ ታሰበላት የታላቅነት ማማ የሚያደርሳት የትንሳዔዋ ብሩህ ማሳያ ሆኖ በታሪክ ገጽ ላይ በደማቁ ተጽፏል።